މެންޗެސްޓާ (މެއި 4) - ޔުއެފާ ޗެމްޕިއަންސް ލީގުގެ ސެމީ ފައިނަލުގެ ދެ ވަނަ ލެގުގައި މިރޭ ރަށުންބޭރުގައި މެންޗެސްޓާ ސިޓީއާ ދެކޮޅަށް ކުޅޭ މެޗުގެ ފުރަތަމަ އެގާރައިގައި ކީލިއަން އެމްބާޕޭ ބޭނުންކުރުމާ މެދު ގޮތެއް ނިންމާނީ ފަހު ވަގުތު ކަމަށް ޕީއެސްޖީ ކޯޗު މައުރީސިއޯ ޕޮޗެޓީނޯ ބުނެފި އެވެ.
އުމުރުން 22 އަހަރުގެ އެމްބާޕޭ މިދިޔަ ހޮނިހިރު ދުވަހު ލެންސާ ދެކޮޅަށް ޕީއެސްޖީ ކުޅުނު މެޗުގައި އަނިޔާގެ ސަބަބުން ކުޅެފައެއް ނުވެ އެވެ. އަނިޔާވެފައިވަނީ އެމްބާޕޭގެ ކުޑަކަޅުވާ އަށެވެ. ޕޮޗެޓީނޯ ބުނީ އެމްބާޕޭގެ އަނިޔާގެ ކަންތައްތައް ވަރަށް ގާތުން މޮނިޓާ ކުރަމުން އަންނަ ކަމަށާއި ގޮތެއް ނިންމާނީ ފަހު ވަގުތު ކަމަށެވެ.
"އަހަރެމެން މި އަންނަނީ އެމްބާޕޭގެ ހާލަތު ވަރަށް ކައިރިން ބަަލަމުން. އޭނަ އަށް ނުވާ ވަރުގެ ކަމެއް އަހަރެމެން ނުކުރާނަން،" މެޗުގެ ކުރިން އޮތް ނޫސްވެރިންގެ ބައްދަލުވުމުގައި ޕޮޗެޓީނޯ ބުންޏެވެ.
ފައިނަލްގެ ޖާގައެއް ހޯދަން ސިޓީ ދަނޑުގައި މިރޭ ކުޅޭ މެޗުން ޕީއެސްޖީ އަށް މޮޅުވުން މަޖުބޫރެވެ. މިދިޔަ ހަފްތާގައި ޕީއެސްޖީ ދަނޑުގައި ސިޓީ އޮތީ 2-1 އިން މޮޅުވެފަ އެވެ. މިދިޔަ އަހަރުގެ ފައިނަލުގައި ބަޔާން މިއުނިކް އަތުން ބަލިވި ޕީއެސްޖީ އަށް މި ފަހަރުގެ ފައިނަލުން ފުރުސަތު ހޯދަން ކުރަން ޖެހޭ މަސައްކަތް އުނދަގޫވިޔަސް ޕޮޗެޓީނޯ އުއްމީދު ދޫކޮށެއް ނުލަ އެވެ.
"އަހަރެމެން ކޮންމެހެން ބެލިޔަސް ރަނގަޅުކުރަން ޖެހޭ އެއް ކަމަކީ ލަނޑު ޖަހަން ލިބޭ ފުރުސަތުގެ ބޭނުން ހިފުން. އެކަން ރަނގަޅުކުރަން ކޮންމެ ހެނެއް ވެސް ޖެހޭ،" ޓޮޓެންހަމް ގޮވައިގެން 2019 ވަަނަ އަހަރުގެ ޗެމްޕިއަންސް ލީގުގެ ފައިނަލުގައި ކުޅުނު ޕޮޗެޓީނޯ ބުންޏެވެ.
ގާޑިއޯލާ (ކ) އާއި ޕޮޗެޓީނޯ.-- ފޮޓޯ: އޭއެފްޕީ
ސިޓީން އެ ކްލަބް ތާރީހުގައި މީގެ ކުރިން ޗެމްޕިއަންސް ލީގުގެ ފައިނަލުގައި ވާދަކޮށްފަ އެއް ނުވެ އެވެ. މީގެ 51 އަހަރު ކުރިން އެ ޓީމު ކުޅެފައިވަނީ ޔުއެފާ ކަޕް ވިނާސް ކަޕްގެ ފައިނަލުގަ އެވެ. މިއީ ސިޓީން ޗެމްޕިއަންސް ލީގުގެ ސެމީ ފައިނަލުގައި ކުޅޭ ދެ ވަނަ ފަހަރެވެ. މި ފަހަރުގެ ޗެމްޕިއަންސް ލީގުގައި އަދި މެޗަކުން ބަލިނުވެ އޮތް ސިޓީ މިރޭ ޕީއެސްޖީއާ އެއްވަރުކޮށްލައިގެން ވެސް ފައިނަލުން ފުރުސަތު ލިބޭނެ އެވެ. އެކަމަކު ސިޓީގެ ކޯޗު ޕެޕް ގާޑިއޯލާގެ ވިސްނުން ހުރީ އެއްވަރުކޮށްލައިގެން އެކަން ކުރާ ގޮތަކަށް ނޫނެވެ.
"ވަރަށް ކުޑަ އެޑްވާންޓޭޖެއް އޮތީ. އެ އަށް ފޯކަސް ކޮށްގެން އަހަރެމެން ފަރުޖައްސާލައިގެން ނުވާނެ. އަހަރެން ކުޅުންތެރިންނަށް ދޭނީ ހަމައެއް މެސެޖެއް. އެއީ ހަމަ މީގެ ހަ މަސް ކުރިން ވެސް ދެއްކި ވާހަކަ. މޮޅެއް ހޯދަން ނޫން ގޮތަށް މެޗަށް ނުކުތުމުގެ ވިސްނުމެއް ނެތް. މިއީ ހަމަ މުޅިން ތަފާތު މެޗެއް،" ގާޑިއޯލާ ބުންޏެވެ.
ސިޓީގެ ކޯޗުކަމާ ގާޑިއޯލާ 2016 ވަނަ އަހަރު ހަވާލުވި ފަހުން މިއީ އެ ޓީމު ސެމީ ފައިނަލުގައި ކުޅޭ ފުރަތަމަ ފަހަރެވެ. މީގެ ކުރިން ބާސެލޯނާ ގޮވައިގެން ޗެމްޕިއަންސް ލީގު ތަށި ދެ ފަހަރު އުފުލާލާފައިވާ ގާޑިއޯލާ އެންމެ ފަހުން ފައިނަލަކަށް ނުކުތީ 2011 ވަަނަ އަހަރު ބާސެލޯނާއާ އެކު އެވެ. އޭގެ ފަހުން ބަޔާން މިއުނިކާ ހަވާލުވުމަށް ފަހު މިހާރު ސިޓީގައި ހުރި ގާޑިއޯލާ އަށް އަދި ފައިނަލެއްގައި ވާދަކުރުމުގެ ފުރުސަތު ނުލިބެ އެވެ.
ސިޓީގެ އިއްތިހާދު ސްޓޭޑިއަމްގައި ޕީއެސްޖީއާ ދެކޮޅަށް ކުޅޭ މެޗު ފަށާނީ ރާއްޖެ ގަޑިން 00:00 ގަ އެވެ.
