ރާއްޖެ އާއި ދުނިޔޭގައި މިހާރު ކުރިއަށްދާ އެޑެކްސެލް އޭ ލެވެލްސް އިމްތިހާނުގެ ޕޭޕަރުތައް ލީކް ވެފައިވާތީ މި އިމްތިހާނު ކެންސަލްކޮށް އާ އިމްތިހާނެއް ބާއްވައިދޭން ގޮވާލައި ބެލެނިވެރިން މިއަދު އަޑުއުފުލައިފި އެވެ.
އެޑިއުކޭޝަން މިނިސްޓްރީ ހިމެނޭގޮތަށް ސަރުކާރުގެ ގިނަ އޮފީސްތަކެއް ހިންގާ ވެލާނާގެ ކައިރިއަށް އެއްވި 10 ވަރަކަށް ބެލެނިވެރިން ތިބީ އެކި ޝުއޫރުފާޅުކޮށްފައިވާ ލިއުންތައް ހިފައިގެންނެވެ. އެ ގަނޑުތަކުގައި އެޑިއުކޭޝަން މިނިސްޓަރު ޑރ. އައިޝަތު އަލީ އާއި ޑިޕާޓްމަންޓް އޮފް ޕަބްލިކް އެގްޒަމިނޭޝަން (ޑީޕީއީ) ހިންގުމާ ހަވާލުވެވަޑައިގެން ހުންނެވި މުހައްމަދު އިހުސާންގެ އިސްތިއުފާއަށް ގޮވާލައިފައިވެ އެވެ.
އިމްތިހާން އަލުން ބާއްވަން ގޮވާލައި މުޒާހަރާ ކުރަނީ: އެޑިއުކޭޝަން މިނިސްޓަރުގެ އިސްތިއުފާއަށް ވެސް ވަނީ ގޮވާލައިފައި-- ފޮޓޯ: ހުސައިން ޝަޔާހް/ އަދަދު
މިއަދު 1:30ގައި އޮންނަ ކެމިސްޓްރީ ޕޭޕަރު އިންޓަނެޓްގައި މިއަދު ހެނދުނު ލީކް ކޮށްލާފައިވާއިރު މިދިޔަ ހަފުތާގައި ވަނީ ފިޒިކްސް ޕޭޕަރާއި ބައޮލޮޖީ ޕޭޕަރު ވެސް ލީކް ކޮށްލައިފަ އެވެ. ޕޭޕަރުތައް ލީކް ކުރަނީ ރާއްޖޭން ބޭރުންނެވެ.
މިނިސްޓްރީ ދޮށަށް އެއްވި ބެލެނިވެރިން "އަދަދު" އަށް ބުނީ ގިނަ ޓެސްޓް ޕޭޕަރުތަކެއް ލީކް ވެފައި ވަނިކޮށް ކުދިން ލައްވައި އެ ޕޭޕަރުތައް ހެދުވުމަކީ ގަބޫލު ކުރެވޭ ކަމެއް ނޫން ކަމަށެވެ. އަދި ޕޭޕަރުތައް ލީކްވުމުން ވެސް އެޑިއުކޭޝަނުން އިމްތިހާނު ފަސް ނުކުރާތީ ކަންބޮޑު ވާ ކަމަށް އެ ބެލެނިވެރިން ބުންޏެވެ.
"މި ޕޭޕަރުތައް ހަދަން ވީމައި ކުދިން ސްޓްރެސްވޭ. ކޮންފިޑެންސް ދަށްވޭ. މި ޕޭޕަރުތައް ހަދައިގެން އަޅުގަނޑުމެން ކުދިންނަށް ފަސްކޮށް ދޭންވީ ޗީޓް ކުރަން ތޯ؟" ބެލެނިވެރިއަކު ބުންޏެވެ.
ޕޭޕަރުތައް ލީކްވުމާ ގުޅިގެން ސްރީ ލަންކާ އާއި ޕާކިސްތާނުން މި އިމްތިހާނު ކެންސަލް ކޮށްފައިވާއިރު ރާއްޖޭން ކެންސަލް ނުކުރަންވީ ސަބަބެއް ނުވިސްނޭ ކަމަށް ބެލެނިވެރިން ބުންޏެވެ. ބެލެނިވެރިންގެ ޑިމާންޑަކީ އޮކްޓޫބަރު/ނޮވެމްބަރުގައި އަލުން މި އިމްތިހާނު ބޭއްވުމެވެ.
މީގެ ކުރިން ބާއްވާ އެޑެކްސެލް އިމްތިހާނުތަނުގައި ގްރޭޑް ދެނީ ބޭރުން ކަމަށް ވިނަމަވެސް މި އިމްތިހާނުގެ ގްރޭޑް ދެނީ ރާއްޖޭން ކަމަށް ބުނެ ވެސް ބެލެނިވެރިން ވަނީ ކަންބޮޑުވުން ފާޅު ކޮށްފަ އެވެ. އެފަދަ ބަދަލު ތަކާއެކު އިމްތިހާނު ބޭއްވިއިރު އެކަން އެޑިއުކޭޝަން މިނިސްޓްރީން ކުދިންނާއި ބެލެނިވެރިންނަށް ނާންގާ ކަމަށް ވެސް ބުންޏެވެ.
ވެލާނާގޭ ދޮށުގައި ބެލެނިވެރިން މުޒާހަރާ ކުރަނީ: ޑިމާންޑް ކުރީ އާ އިމްތިހާނެއް ބޭއްވުމަށް-- ފޮޓޯ: ހުސައިން ޝަޔާހް/އަދަދު
ޑީޕީއީ ހިންގުމާ ހަވާލުވެވަޑައިގެން ހުންނެވި އިހުސާން ރޭ ރާއްޖެ ޓީވީގައި ވިދާޅުވީ ޕޭޕަރު ލީކްވާ މައްސަލައިގައި އިނގިރޭސިވިލާތުގެ އެ އިމްތިހާނު ދޭ އެގްޒެމިނޭޝަން ބޯޑާ މަޝްވަރާ ކުރަމުން އަންނަ ކަމަށެވެ. ރާއްޖޭގެ ހުށަހެޅުމަކީ ލީކްވި ޓެސްޓްތައް އަލުން ދިނުން ކަމަށް އޭނާ ވިދާޅުވި އެވެ.
އެޑިއުކޭޝަން މިނިސްޓަރު އައިޝަތު އަލީ މިދިޔަ ހަފްތާގައި ވިދާޅުވީ އެޑެކްސެލްއިން ގޮތެއް ނިންމަންދެން ރާއްޖޭގައި އިންތިހާނު ކުރިއަށް ގެންދާނެ ކަމަށެވެ.
