އިންޑިއާއިން އޮސްޓްރޭލިއާއަށް އެތެރެވުން ވަގުތީ ގޮތުން މަނާކޮށް، ވަންނަ މީހުންނަށް ބޮޑު ޖޫރިމަނާއެއް ނުވަތަ ފަސް އަހަރުގެ ޖަލު ހުކުމެއް އަންނަ ގޮތަށް ނިންމި ނިންމުމަކީ "ރޭސިސްޓް" ނިންމުމެއް ކަމަށް ތުހުމަތުކޮށްފި އެވެ.
މިއަދުން ފެށިގެން އޮސްޓްރޭލިއާގެ އެއްވެސް ރައްޔިތަކު އިންޑިއާއިން އެ ގައުމަށް ވަނުން މަނާ ވާނެ އެވެ. އޭގެ ކުރިން އޮސްޓްރޭލިއާއިން ވަނީ މޭ 15 ގެ ނިޔަލަށް ދެ ގައުމުގެ ދެމެދުގައި ކުރާ ހުރިހާ ވައިގެ ދަތުރެއް ކެންސަލްކޮށްފަ އެވެ.
އަލަށް އަމަލު ކުރަން ފެށި އުސޫލުގެ ދަށުން އޮސްޓްރޭލިއާއަށް އަންނަން ކަނޑައަޅާ ތާރީހުގެ 14 ދުވަސް ކުރިން އިންޑިއާއަށް ގޮސްފައިވާ ނަމަ އޮސްޓްރޭލިއާއަށް އެތެރެވުން މަނާ ވާނެ އެވެ.
އެ އުސޫލާ ހިލާފުވެއްޖެ ނަމަ ފަސް އަހަރުގެ ޖަލު ހުކުމެއް ނުވަތަ 51,121 އެމެރިކާ ޑޮލަރުގެ ޖޫރިމަނާއެއް އަންނާނެ އެވެ. ބައެއް ހާލަތްތަކުގައި ޖޫރިމަނާއާ އެކު ޖަލަށް ލެވޭނެ އެވެ. ވަގުތީ ގޮތުން ގެންނަ މި ބަދަލު މޭ 15 ގައި މުރާޖައާ ކުރާނެ އެވެ.
އެއީ "ރޭސިސްޓް" ނުވަތަ ނަސްލީ ތަފާތު ކުރުން ގެންގުޅޭ ނިންމުމެއް ކަމަށް ކުރާ ތުހުމަތުތަކާ ގުޅިގެން ބޮޑު ވަޒީރު ސްކޮޓް މޮރިސަން ވިދާޅުވީ މީގެ އަހަރެއް ކުރިން ޗައިނާއަށް ކުރާ ދަތުރުތައް ހުއްޓާލުމުން ވެސް މިފަދަ ތުހުމަތު ކުރި ކަމަށެވެ.
"ބަލިމަޑުކަމެއްގައި ސިޔާސީ ކަމެއް ނުވަތަ ފިކުރީ ވިސްނުމެއް ނޯންނާނެ. މިއީ ސިޔާސީ ކަމަކާ އެއްވެސް ގުޅުމެއް އޮތް ނިންމުމެއް ނޫން. މި ދައްކަނީ ވައިރަހެއްގެ ވާހަކަ،" ސިޑްނީގެ ރޭޑިއޯއަކަށް އޭނާ ވިދާޅުވި އެވެ.
ތަފާސްހިސާބުތައް ދައްކާ ގޮތުގައި އޮސްޓްރޭލިއާގެ 9000 ރައްޔިތުން އިންޑިއާގައި އެބަ އުޅެ އެވެ. އޭގެ ތެރެއިން 600 މީހުންނަކީ ހައި ރިސްކު މީހުންނެވެ.
އޮސްޓްރޭލިއާގެ މީޑިއާއިން ރިޕޯޓު ކުރާ ގޮތުގައި އެ ގައުމުގެ ރައްޔިތުން ގައުމަށް އެތެރެވެއްޖެ ނަމަ އެއީ ޖިނާއީ ކުށެއްގެ ގޮތުގައި މީގެ ކުރިން ދުވަހަކު ވެސް ބަލާފައެއް ނުވެ އެވެ.
އޮސްޓްރޭލިއާ ސަރުކާރުން ބުނީ އާ އުސޫލު އެކުލަވާލީ ސިއްހީ ފަރާތްތަކުން ދިން ނަސޭހަތަށް ބިނާކޮށް މުޖުތަމައު ރައްކާތެރި ކުރުމަށް ކަމަށެވެ. އިންޑިއާއިން ކޮވިޑުގެ އާ ވޭރިއެންޓެއް ފެނިފައި ވާއިރު، ފާއިތުވި 10 ދުވަހު ވެސް ކޭސްތައް އުޅުނީ ތިން ލައްކައިން މަތީގަ އެވެ.
އިންޑިއާއިން އޮސްޓްރޭލިއާއަށް ވަންނަ މީހުންގެ ތެރޭގައި ވެސް ޕޮޒިޓިވް ކޭސް ގިނަކަން ވަނީ ފާހަގަވެފަ އެވެ. ފޮރިން މިނިސްޓަރު މެރީސް ޕެއިން ވިދާޅުވީ މާޗް މަހުން ފެށިގެން ގައުމަށް އެތެރެވި މީހުންގެ ތެރެއިން ކަރަންޓީނުގައި ތިއްބާ ކޮވިޑަށް ޕޮޒިޓިވްވި މީހުންގެ 57 ޕަސެންޓު އައީ އިންޑިއާއިން ކަމަށެވެ.
ނަމަވެސް އޮސްޓްރޭލިއާގެ އާބާދީގެ 2.6 ޕަސެންޓުގެ ގޮތުގައިވާ އިންޑިއާ ދަރިކޮޅު މީހުން ބުނީ މި އުސޫލަކީ އެ މީހުންނާ މެދު ކުށްވެރިންގެ ގޮތުގައި ދެކި "ދެ ވަނަ ދަރަޖައިގެ ރައްޔިތުން" ކަމަށް ކަނޑައަޅާ އުސޫލެއް ކަމަށެވެ.
