ކެބިނެޓާއި ސިޔާސަތުތަކަށް ވެސް ބަދަލު ގެނައުން ހިމަނައިގެން މުޅި ސަރުކާރުގެ ހިންގުމަށް ބަދަލު ގެންނަވަން ރައީސް އިބްރާހިމް ސޯލިހް ނިންމެވުމާ އެއްގޮތަށް މިހާރު ކުރިއަށް ދަނީ އެ ބަދަލުތަކާ ގުޅޭ ގޮތުން ކޯލިޝަން ޕާޓްނަރުންނާ އެކު މަޝްވަރާތައް ކަމަށް ރައީސް އޮފީހުގެ ތަރުޖަމާން މުހައްމަދު މަބްރޫކް އަޒީޒް މިރޭ ވިދާޅުވެއްޖެ އެވެ.
ރައީސް އޮފީހުގައި ކުރިއަށްދާ ޕްރެސް ކޮންފަރެންސްގައި މަބްރޫކް ވިދާޅުވީ ލޯކަލް ކައުންސިލް އިންތިހާބަށް ފަހު ރައީސް ސޯލިހް ވިދާޅުވެފައިވާ ގޮތަށް ސަރުކާރު ހިންގުމަށް ގެންނަން ޖެހޭ ބަދަލުގެ މަސައްކަތްތައް އެމަނިކުފާނު ފައްޓަވާފައިވާ ކަމަށެވެ. އެ ބަދަލުތައް އަންނާނީ އެ މަޝްވަރާތަކަށް ފަހުގައި ކަމަށް ވިދާޅުވި އެވެ.
މަބްރޫކް ވިދާޅުވި ގޮތުގައި ކެބިނެޓަށް އިތުރު ވަޒީރުން އައްޔަން ކުރެއްވުމާއި އެއް ވުޒާރާގައި ހުންނެވި ވަޒީރު އަނެއް ވުޒާރާއަށް ބަދަލުކުރުމަކީ ޖުމްލަ ހައްލުގެ ތެރެއިން ކުޑަ މިންވަރެކެވެ. ސަރުކާރުން ރައްޔިތުންނަށް ވެފައިވާ ވައުދުތައް އަވަސް މިނެއްގައި ފުއްދައި ރައްޔިތުން ބަލައިގަންނަ މިންވަރަށް ނަތީޖާ ނެރެދޭން އެއަށް ވުރެން ގިނަ ވިސްނުންތަކެއް ރައީސް ގެންގުޅުއްވާ ކަމަށް ވިދާޅުވި އެވެ.
"އެކަންކަމާ މެދު ކޯލިޝަން ޕާޓްނަރުންނާ އެކު ފުޅާދާއިރާއެއްގައި މަޝްވަރާތައް އެބަދޭ،" މަބްރޫކް ވިދާޅުވި އެވެ.
ރައީސް އޮފީހުގައި ކުރިއަށްދާ ނޫސްވެރިންގެ ބައްދަލުވުމުގައި މަބްރޫކް ވާހަކަ ދައްކަވަނީ: ސަރުކާރުގެ ހިންގުމަށް ބަދަލު ގެންނަވަނީ ނަތީޖާ ނެރުން ހަލުވި ކުރަން ކަމަށް ވިދާޅުވި. -- ފޮޓޯ/ރައީސް އޮފީސް
މަބްރޫކް ވިދާޅުވި ގޮތުގައި އެ މަޝްވަރާ ނިމުމުގެ ކުރިން އިތުރަށް އެކަމުގައި ދެއްވޭނެ ތަފްސީލެއް ނެތެވެ.
މި ވެރިކަން އުފެއްދި ކޯލިޝަންގައި ހިމެނިވަޑައިގަންނަވަނީ އެމްޑީޕީގެ އިތުރުން ޖުމްހޫރީ ޕާޓީ އާއި އަދާލަތު ޕާޓީގެ އިތުރުން އެމްއާރުއެމް އެވެ.
ކެބިނެޓުގައި އެކި ޕާޓީތައް ތަމްސީލްކުރައްވާ ވަޒީރުން ވެސް ބަދަލުކުރައްވަން ނިންމަވާފައިވާ އިރު އެ ބަދަލު ގެންނަވާ ސަބަބަކީ ރައީސް ލީޑަރުންނަށް ފޮނުއްވި ސިޓީގައި ވިދާޅުވެފައިވާ ގޮތުގައި ބައެއް ވުޒާރާތަކުން އެކަށީގެންވާ ވަރަށް މަސައްކަތް ނުކުރުމެވެ.
އެކި ވުޒާރާތައް ހިންގުމުގައި، ސިޔާސީ މަގާމްތަކަށް ކޯލިޝަން ޕާޓީތަކުން ވަޑައިގެންނެވި ބޭފުޅުންގެ އެހީތެރިކަމާއި އެއްބާރުލުން ނުލިބޭ މައްސަލަ ވެސް ރައީސް ވަނީ ލީޑަރުންގެ ސަމާލުކަމަށް ގެންނަވައިފަ އެވެ. މިކަމުގެ ސަބަބުން ސިޔާސަތުތަކާއި މަސައްކަތްތައް ތަންފީޒުކުރަން ހުރަސްތައް މެދުވެރިވާ ކަމަށް ވެސް ވިދާޅުވެފައިވެ އެވެ.
ކެބިނެޓަށް ގެންނަވަން ނިންމެވި ބަދަލުތައް މިހާތަނަށް އާއްމުކޮށްފައި ނުވިޔަސް "އަދަދު"އަށް ކަށަވަރުވެފައިވާ ގޮތުގައި މުހިއްމު އެއް ބަދަލެއްގެ ގޮތުގައި ފިޝަރީޒް މިނިސްޓަރު، ޒަހާ ވަހީދު މަގާމުން ވަކިކޮށް، އެ މިނިސްޓްރީ ހިންގަވަން އެންވަޔަރަމެންޓް މިނިސްޓަރު ޑރ. ހުސެއިން ރަޝީދު ހަމަޖައްސަވާނެ އެވެ.
އެންވަޔަރަމެންޓް މިނިސްޓްރީ އަށް އައްޔަންކުރައްވަން ރައީސަށް ފެނިވަޑައިގަންނަވާ އެންމެ ގާބިލް އެއް ނަމުގެ ތެރޭގައި ރައީސް އޮފީހުގެ ޕޮލިސީ ސެކްރެޓަރީ އައިމިނަތު ޝައުނާ ހިމެނިވަޑައިގަންނަވާ ކަން އެނގިފައިވެ އެވެ.
ކެބިނެޓުގައި ދެން ބަދަލު އަންނާނެ ކަމަށް ބެލެވޭ ވުޒާރާއަކީ، ހަޔަ އެޑިއުކޭޝަން މިނިސްޓްރީ އެވެ. އެ ވުޒާރާ ހިންގަވަނީ އެމްއާރުއެމްގެ ސްލޮޓެއްގައި ކެބިނެޓަށް ވަޑައިގަތް ޑރ. އިބްރާހިމް ހަސަން އެވެ. މީގެ އިތުރުން ޓެލެކޮމިއުނިކޭޝަން މިނިސްޓްރީއަށް ވެސް އާ ވަޒީރަކު އައްޔަންކުރައްވާނެ ކަމަށް ވެ އެވެ.
