ގްރޭޓާ މާލެ ސަރަހައްދު ހިމެނޭ ގޮތަށް ތިން ސަރަހައްދެއްގައި އެމްޕީއެލްއިން ދެމުން އައި ބަހުގެ ހިދުމަތް ހުއްޓާލުމުން އަހަރެއްގެ މައްޗަށް 60 މިލިއަން ރުފިޔާ ސަލާމަތް ކުރެވޭނެ ކަމަށް އެ ކުންފުނީގެ މެނޭޖިން ޑިރެކްޓަރު ޝާހިދު އަލީ ވިދާޅުވެއްޖެ އެވެ.
އެމްޕީއެލްއިން ދެމުން އައި ބަހުގެ ހިދުމަތް އެމްޓީސީސީގެ ދަށަށް ބަދަލު ކުރަނީ އަންނަ މަހުން ފެށިގެންނެވެ. އަދި މިކަމާ ގުޅޭ މަޝްވަރާތައް ދެ ކުންފުނީގެ މެދުގައި ކުރެވި މުޅި ހިދުމަތް އެއްކޮށް އަންނަ މަހުން ފެށިގެން އެމްޓީސީސީގެ ދަށަށް ބަދަލު ކުރެވޭނެ އެވެ.
އެމްޕީއެލްގެ ޓްރާންސްޕޯޓް ލިންކް މެދުވެރިކޮށް ބަހުގެ ހިދުމަތް ދެމުން އަންނަ ސަރަހައްދުތަކަކީ ގްރޭޓާ މާލެ، ލ. އަތޮޅު އަދި އައްޑޫ ސިޓީ އާއި ފުވައްމުލައް ސިޓީ އެވެ. އެމްޕީއެލްއިން ބޮޑު ހަރަދެއް ކޮށްގެން ޓްރާންސްޕޯޓް ޑިވިޝަނެއް ގާއިމުކުރުމުގެ މަސައްކަތް ފެށީ 2016 ވަނަ އަހަރު އެވެ. އަދި އެންމެ ފުރަތަމަ ހިދުމަތް ދޭން ފެށީ އައްޑޫ ސިޓީގަ އެވެ.
އެމްޕީއެލްގެ ސަތޭކަ މިލިއަނެއްހާ ރުފިޔާގެ އިންވެސްޓްމަންޓެއް
އެމްޕީއެލްގެ ޓްރާންސްޕޯޓް ލިންކް ހިދުމަތް ގާއިމުކުރަން އެ ކުންފުނިން ސަތޭކާ މިލިއަނެއްހާ ރުފިޔާ އިންވެސްޓް ކުރި އެވެ. ނަމަވެސް ހިދުމަތް ދެމުން ދިޔަ ތިން ސެކްޓާ ހިންގަމުން ދިޔައީ ގެއްލުމުގަ އެވެ.
އެމްޕީއެލްއިން މި ހިދުމަތް ފޯރުކޮށް ދޭން ބޮޑު ހޭދައެއް ކުރަމުން ދިޔަ އިރު، މި ހިދުމަތަކީ އާންމު ދަތުރުފަތުރުގެ ހިދުމަތެއް ކަމުން މިކަހަލަ ނިޒާމުތައް ގިނައިން ހިންގަނީ ގެއްލުމުގައި ސަރުކާރުން ސަބްސިޑައިޒް ކޮށްގެން ކަަމަށެވެ. އަދި ސަރުކާރުގެ ސިޔާސަތުގެ ތެރެއިން ޓްރާންސްޕޯޓު މެންޑޭޓު ވަންނަނީ އެމްޓީސީސީގެ ދަށަށް ކަމުން އެ ބަދަލު ގެންނަން ނިންމީ ކަމަށް ވިދާޅުވި އެވެ.
ފިނޭންސް މިނިސްޓްރީ މެދުވެރިކޮށް ކުރިއަށްދާ މަޝްވަރާތަކުގައި ބަހުގެ ހިދުމަތް ބަދަލު ކުރަން ނިންމި ނަމަވެސް އިންވެސްޓް ކުރި ފައިސާއާ ގުޅޭގޮތުން އަދި ގޮތެއް ނުނިމެ އެވެ.
ޝާހިދު ވިދާޅުވީ މިވީ މުއްދަތުގެ ތެރޭގައި ޑިޕްރިޝިއޭޓް ވެފައިވުމާ އެކު މިހާރު އެސެޓްތަކުގެ އަގު ހުރީ ގާތްގަނޑަކަށް 70 މިލިއަން ރުފިޔާ ކަމަށެވެ.
އެމްޕީއެލްއިން ބަހުގެ ހިދުމަތް ދޭން ގެންގުޅޭ ބަސްތަކަކީ ރާއްޖޭގައި މި ހިދުމަތައް ބޭނުންކުރާ އެންމެ ފެންވަރު ރަނގަޅު ބަސްތަކެވެ. އަދި އެ ކުންފުނީގެ ބަހުގެ ތެރޭގައި ޑަބަލް-ޑެކާ ބަސް ވެސް ހިމެނެ އެވެ. މި ހުރިހާ ބަހަކާއި، އެމްޕީއެލްގެ ޓްރާންސްޕޯޓް ޑިވިޝަންގެ ހުރިހާ މުވައްޒަފުން އެމްޓީސީސީގެ ދަށަށް ބަދަލު ވާނެ އެވެ.
ޝާހިދު ވިދާޅުވި ގޮތުގައި މި ހިދުމަތްތައް ހުއްޓާލުމާ އެކު އެމްޕީއެލްގެ ޓްރާންސްޕޯޓް ލިންކް ހިދުމަތުގެ ތެރެއިން ދެމުން ދިޔަ ބަހުގެ ހިދުމަތާއި ފެރީގެ ހިދުމަތްތައް އެއްކޮށް ހުއްޓާލާނެ އެވެ. އަދި، ކުރިއަށް އޮތް ތަނުގައި އެ ކުންފުނީގެ ފޯކަސް ހުންނާނީ ބަނދަރުތަކާ ގުޅޭ މަސައްކަތަށް އެކަނި ކަަމަށް ޝާހިދު ވިދާޅުވި އެވެ.
އެމްޕީއެލްގެ ދަށުން ހިންގަމުން ދިޔަ ބަހުގެ ހިދުމަތް އެމްޓީސީސީގެ ދަށަށް ބަދަލު ކުރުމުން ދެން ރާއްޖޭގައި ބަހުގެ ހިދުމަތްދޭ ހުރިހާ ރަށެއްގައި އެ ހިދުމަތް ދޭނީ އެމްޓީސީސީންނެވެ.
