ކުރީގެ ސަރުކާރުގައި ކޮރަޕްޝަންގެ ހާއްޔެއްގެ ގޮތުގައި ސިފަކުރި ފެނަކައިގައި ކޮރަޕްޝަނަށް ހުޅުވިފައި ހުރި ހުރިހާ ދޮރުތަކަށް ބަންދުކޮށްފައިވާ ކަމަށާއި އެތަނުގައި ކޮރަޕްޝަންގެ އެއްވެސް އަމަލެއް މިހާރު ނުހިނގާނެ ކަމުގެ ޔަގީންކަން މެނޭޖިން ޑިރެކްޓަރު އަހްމަދު ސައީދު ދެއްވައިފި އެވެ.
ގިނަ ރަށްރަށަށް ކަރަންޓުގެ ހިދުމަތް ދެމުން އަންނަ އަދި ކުރީގެ ސަރުކާރުގައި ވެސް ސިޔާސީ ވަޒީފާތައް ގިނަ، ފެނަކަ ކޯޕަރޭޝަންގައި ހިޔާނާތުގެ ގިނަ މައްސަލަތަކަކަށް ތުހުމަތުވެ އެންޓި ކޮރަޕްޝަން ކޮމިޝަނުން ތަހުގީގު ކުރި އެވެ. އެ މައްސަލަތައް ކޮޅެއްގައި ނުޖެހި އުޅެނިކޮށް، މި ވެރިކަމުގައި ވެސް ފެނަކައިގެ ގިނަ މައްސަލަތަކެއް ވަނީ ފެންމަތިވެފަ އެވެ.
ކޮރަޕްޝަނާ ދެކޮޅަށް، ނަޒާހަތްތެރި ކަމުގެ ވައުދުގައި ސޮއިކޮށްގެން ތިބި ކުންފުނީގައި ހިޔާނާތުގެ މައްސަލަތަކެއް ހިނގާ ކަން އޭސީސީއަށް ހުށަހެޅީ އެތަނުގެ މުވައްޒަފުންތަކެކެވެ. މުދަލާއި ތަކެތި ހޯދުމާއި މަޝްރޫއުތައް ހަވާލުކުރުމުގައި އުސޫލާ ހިލާފަށް ހިންގާފައިވާ ކަމަށް ތުހުމަތުކުރެވުނު 22 މައްސަލައެއް އޭސީސީން ބެލި އެވެ.
މިކަން ރައީސް އޮފީހުގެ ސަމާލުކަމަށް އޭސީސީން ގެނައުމުން، އެކަން އިސްލާހުކުރަން ފެނަކައަށް އެންގި އެވެ.
ފެނަކައިގެ އެމްޑީ ސައީދު ވިދާޅުވީ އެ ކުންފުނި ކޮރަޕްޝަނުން ސަލާމަތްވެފައިވާ ކަމުގެ ޔަގީންކަން ދެއްވާ ކަމަށެވެ.
"ޔަގީންކަން އަރުވަން ފެނަކައިގެ ތެރޭގައި މިއަދު ނުހިނގާނެ، ނުހިންގޭނެ ކޮރަޕްޝަންގެ އަމަލެއް އަދި ވައްކަމުގެ އެއްވެސް އަމަލަކަށް މަގުފަހިވާ ކަމެއް ވެސް ފެނަކައިގެ ތެރޭގައި ނުހިންގާނެ، ނުހިންގޭނެ،" "އަދަދު"ގެ "ކުޅިކޮށް" ޝޯގައި ސައީދު ވިދާޅުވި އެވެ.
ޝޯގައި ސައީދަށް އަމާޒުކުރި ސުވާލުތަކަށް ޖަވާބު ދެއްވަމުން އޭނާ ވިދާޅުވީ އޭސީސީއަށް މިހާރު ހުށަހަޅާފައިވާ މައްސަލަތަކުގައި ވެސް ކޮރަޕްޝަނެއްގެ ކަމެއް ސާބިތު ނުވާ ކަމަށާއި އެންމެ ކުޑަ މިނުން ހުއްޓަސް ހުންނާނީ އުސޫލީ ކުދިކުދިން ގޯސްތައް ކަމަށެވެ.
އެ މައްސަލަތަކުން 99.99 ޕަސެންޓް މައްސަލާގައި އެއްވެސް ގޯހެއް ނެތްކަމަށް ނިންމާފައިވާކަން ވެސް ސައީދު ފާހަގަ ކުރެއްވި އެވެ.
ސައީދު ވިދާޅުވި ގޮތުގައި، ފެނަކައާ މެދު ކޮރަޕްޝަންގެ އިނގިލިތައް ދިއްކުރަނީ ކުރިން ކަން ކުރަމުން ގޮސްފައިވާ ގޮތުންނެވެ.
"ފެނަކައާ ދިމާއަށް އެ އިނގިލި ދިއްކުރާނެ، ދިއްކުރަން ޖެހޭ ވަރަށް ބައިވަރު ސަބަބު އެބަހުރި، ސަބަބަކީ ފެށުނީންސުރެ އެތަނަކީ ވަރަށް ބައިވަރު ނާޖައިޒު ފައިދާތަކާއި ވައްކަމާއި ފަސާދައަށް ވަރަށް ބޮޑަށް ދޮރުތަކެއް ހުޅުވިފަ ހުރި ތަނެއް،" ސައީދު ވިދާޅުވި އެވެ.
ނަމަވެސް، މިހާރު އެ ދޮރުތައް ބަންދުކޮށް ފެނަކަ އިސްލާހުކޮށްފައިވާކަން ސައީދު ފާހަގަ ކުރެއްވި އެވެ. އެފަދަ ދޮރުތަކުން ފައިދާ ނަގަމުން ދިޔަ މީހުންގެ ޝަކުވާ މިހާރު އޮންނާނެ ކަމަށާއި ތަންތަނަށް ފެނަކައާ ގުޅޭ ޝަކުވާތައް ހިފައިގެން ދަނީ އެހެންވެ ކަމަށް އޭނާ ވިދާޅުވި އެވެ.
"އިންސާނީ ތަބިއްޔަތުގަ ވެސް މަންފާއެއް ހުއްޓޭ ކަމުގައިވާ ނަމަ ޝަކުވާ އުފުލާނެ،" ސައީދު ވިދާޅުވި އެވެ.
ސައީދު ވިދާޅުވީ، އޭނާއާ ގުޅޭ ކޮރަޕްޝަންގެ މައްސަލައެއް ނޯންނާނެ ކަމުގެ އަދި ސާބިތު ނުވާނެ ކަމުގެ ވެސް 100 ޕަސެންޓް ޔަގީންކަން ދެއްވަން ކެރޭނެ ކަމަށެވެ. ނަމަވެސް، އެފަދަ މައްސަލައެއް ފެންމަތިވެ، އިސްތިއުފާ ދޭން ޖެހިއްޖެ ނަމަ އެކަން ކުރައްވާނެ ކަަމަށް ވެސް ވިދާޅުވި އެވެ.
