ޕެރިސް (މެއި 2) - ފްރެންޗް ލީގުގައި ރޭ ނީސް އަތުން 2-0 އިން މޮޅުވެ، ލިލް އަލުން ލީގުގެ އެއް ވަަނަ އަށް ޖެހިލައިފި އެވެ.
ރޭގެ މެޗަށް ލިލް ނުކުތްއިރު އެއް ވަނައިގައި އޮތީ ޕީއެސްޖީ އެވެ. އެއީ ރޭ ފުރަތަމަ ކުޅުނު މެޗުން ލެންސް އަތުން 2-1 އިން ޕީއެސްޖީ މޮޅުވުމުންނެވެ. ބާކީ ތިން މެޗަށް ނުކުންނައިރު ލިލް އެއް ވަނައިގައި އޮތީ 35 މެޗުން 76 ޕޮއިންޓާ އެކު އެވެ. ދެ ވަނައިގައި އޮތް އެންމެ ފަހުގެ ޗެމްޕިއަނަށް ލިބިފައިވަނީ 35 މެޗުން 75 ޕޮއިންޓެވެ.
ޕީއެސްޖީ ދަނޑުގައި ރޭ ކުޅުނު މެޗުގައި އެ ޓީމަށް 33 ވަނަ މިނިޓްގައި ލީޑުނަގައިދިނީ ޖޫލިއަން ޑްރެކްސްލާ ދިން ބޯޅައަކުން ނޭމާ އެވެ. މިއީ އަނިޔާގެ ސަބަބުން މި ސީޒަނުގެ ގިނަ މެޗުތަކެއް ގެއްލުނު ނޭމާ މި ފަހަރު ލީގުގައި ޖެހި ހަތް ވަނަ ގޯލެވެ. ނޭމާ ތަނަވަސްކޮށްދިން ފުރުސަތަކުން މެޗުގެ 59 ވަނަ މިނިޓްގައި މާކުއިނިއޯސް ވަނީ ޕީއެސްޖީ އަށް ލީޑުފުޅާކޮށްދީފަ އެވެ. އޭގެ ދެ މިނިޓް ފަހުން ލެންސްގެ އިގްނާޝިއަސް ގަނާގޯ ވަނީ ގޯލެއް ޖަހައި އެ ޓީމަށް އުއްމީދެއް ހޯދައިދީފަ އެވެ. އެކަމަކު އިތުރު ގޯލެއް ޖެހޭގޮތެއްނުވި އެވެ.
ލަނޑު ޖެހުމަށް ފަހު ޕީއެސްޖީގެ ނޭމާ އުފާފާޅުކުރަނީ.-- ފޮޓޯ: އޭއެފްޕީ
މެޗަށް ފަހު ޕީއެސްޖީގެ ކޯޗު މައުރީސިއޯ ޕޮޗެޓީނޯ ބުނީ ކުޑަކަޅުވާ އަށް ލިބިފައިވާ އަނިޔާއެއްގެ ސަބަބުން މި މެޗުގައި ޕީއެސްޖީގެ ތަރި ކީލިއަން އެމްބާޕޭ ރިސްކުކުރަން ބޭނުންނުވި ކަމަށެވެ. އެއީ ޗެމްޕިއަންސް ލީގުގެ ސެމީ ފައިނަލް ދެ ވަނަ ލެގަށް އޭނާ ފިޓްކުރުމުގެ ބޭނުމުގައި ކަމަށް ޕޮޗެޓީނޯ ބުންޏެވެ.
ލިލް އަށް ރޭގެ މެޗުގައި ލީޑުނަގައިދިނީ 13 ވަނަ މިނިޓްގައި ތުރުކީގެ ފޯވާޑް ބުރަކް ޔިލްމާޒް އެވެ. މިއީ ޖޮނަތަން ޑޭވިޑް ދިން ބޯޅައަކުން ޔިލްމާޒް ޖެހި ގޯލެކެވެ. ދެ ވަނަ ހާފްގެ ކުޅުން ފެށިގެން ތިން މިނިޓް ތެރޭ ނީސްގެ ޖޯޑަން ލޮޓޮންބާ އަށް ދެ ވަނަ ރީނދޫ ކާޑާ އެކު ރަތް ކާޑެއް ދެއްކި އެވެ.
ނީސްގެ އެއް ކުޅުންތެރިއަކު މަދުވުމުގެ ފައިދާނަގައި މެޗުގެ 55 ވަނަ މިނިޓްގައި ލިލް އިން ދެ ވަނަ ގޯލެއް ޖެހި އެވެ. މި ގޯލު ޖެހީ މެހެމެތު ޒަކީ ސެލީކް އެވެ.
ލީގުގައި ލިލް އަށް ދެން ބާކީ އޮތީ ލެންސާއި ސެއިން އެޓިއެން އަދި އެންޖާސްއާ ދެކޮޅަށް ކުޅޭ މެޗުތަކެވެ. މި ތިން މެޗުން މޮޅުވެގެން 2011 ވަަނަ އަހަރަށް ފަހު ފުރަތަމަ ފަހަރަށް ލިލް އަށް ފްރާންސްގެ ޗެމްޕިއަންކަން ހޯދޭނެ އެވެ. އެ ޓީމުން އެ ފަހަރު ލީގު ތަށި އުފުލާލީ 57 އަހަރު ތެރޭ ފުރަތަމަ ފަހަރަށެވެ.
