މަސައްކަތްތެރިންގެ ހައްގުތަކާ ގުޅޭ ގާނޫނުތައް އަވަހަށް ފާސްކޮށް، ހައްގުތައް ކަށަވަރުކޮށްދިނުމުގެ ސްޕީޑު ހަލުވިކުރަން އިދިކޮޅުން ސަރުކާރަށް މިއަދު ގޮވާލައިފި އެވެ.
މަސައްކަތްތެރިންގެ ދުވަހާ ގުޅިގެން ޕީޕީއެމާއި ޕީއެންސީން ނެރުނު ބަޔާނުގައި ވަނީ، މި ވެރިކަމުގައި މަސައްކަތްތެރިންނަށް ވީ ވައުދުތައް ނުފުއްދޭ ކަމަށް ބުނެ ކަންބޮޑުވުންފާޅުކޮށްފަ އެވެ. އެންމެ ކުޑަ އުޖޫރައަކީ މި ސަރުކާރުގެ ވައުދެއްކަން ފާހަގަކުރަމުން ބުނެފައި ވަނީ މިހާތަނަށް އެކަން ނުވެ އޮތީ ސަރުކާރުގެ އިިހްލާސްތެރިކަމެއް ނެތުމުން ކަމަށެވެ.
"މަސައްކަތްތެރިންގެ ދުވަހެއް ފާހަގަކުރެވޭއިރު ސަރުކާރުގެ އެކި ލެވެލްތަކުން ނެރުއްވާ ބަޔާންތަކާއި ދައްކަވާ ވާހަކަތަކަށް އަމަލީ ސިފައެއް ނުގެނެވޭތީ ކަންބޮޑުވުންފާޅުކުރަމެވެ،" އިދިކޮޅުގެ ބަޔާނުގައިވެ އެވެ.
އެންމެ ކުޑަ އުޖޫރަ ކަނޑައެޅުމުގެ ގާނޫނު ފާސްކޮށްފައިވާ އިރު ސަރުކާރުން މިއަދު ޔަގީންކަން ދިނީ މި އަހަރުގެ ތެރޭގައި އެކަން ތަންފީޒުކުރަން ފަށާނެ ކަމަށެވެ.
ޕީޕީއެމާއި ޕީއެންސީން ބުނީ މަސައްކަތްތެރިންގެ ދުވަސް މި އަހަރު އަރާ ހަމަކުރިއިރު ހައްގުތައް ގެއްލިފައިވާ ކަމަށެވެ. އެތައް ބައެއްގެ ވަޒީފާ ގެއްލި ނިކަމެތިވެ މަގުމަތިވެފައިވާ ކަމަށެވެ.
މަސައްކަތްތެރި އަންހެނުންނަށް ވަޒީފާގެ މާހައުލުގައި ކުރިމަތިވާ ޖިންސީ ގޯނާ އާއި ޖިންސީ ފުރައްސާރައިގެ އިންސާފު ހޯދައިދިނުމުގައި ސަރުކާރު ފޭލްވެފައި ކަމަށް ވެސް ބުންޏެވެ.
ބަޔާނުގައި ބުނިގޮތުގައި ރިސޯޓްތަކުގައި މަސައްކަތް ކުރާ މުވައްޒަފުންނަށް ހިތްދަތި އެތައް ކަމެއް ކުރިމަތިވެފައިވާއިރު މަސްވެރިން ބާނާ މަހަށް ހަމަ އަގެއް ނުލިބެ އެވެ.
"ކޯވިޑް-19ގެ ހާލަތުގައި ރެ އާއި ދުވާލު އިސް ސަފުގައި މަސައްކަތްކުރާ ސިއްހީ އެހީތެރިންނާއި ފަންނީ މުވައްޒަފުންނަށް ހައްގު އުޖޫރައެއް ނުލިބެ އެވެ،" ބަޔާނުގައިވެ އެވެ.
އިދިކޮޅުން ބުނި ގޮތުގައި މި ސަރުކާރުން ވެރިކަމަށް އައީ މަސައްކަތްތެރިންގެ ވެސް ހައްގު ހިމާޔަތްކުރާނެ ކަމުގެ ގިނަ ވައުދުތަކަކާ އެކުގަ އެވެ. އެކަމަކު އެކަން ފުރިހަމަ ނުވާ ކަމަށާއި އެކަންކަން ފުއްދަން ސަރުކާރުން މަސައްކަތް ކުރަން އިދިކޮޅުން ގޮވާލި އެވެ.
