ލަންޑަން (މެއި 1) - އިނގިރޭސި ޕްރިމިއާ ލީގުގެ މެޗެއްގެ ތެެރެއިން ކުޅުންތެރިއަކު ރޯދަ ވިއްލަން ބޭނުންނަމަ އެ އިންތިޒާމު ހަމަޖެހޭނެ ގޮތްތަކެއް ލީގުން ކަނޑައަޅައިފި އެވެ.
މިދިޔަ ހޯމަ ދުވަހު ލީގުގައި ލެސްޓާ ސިޓީ އާއި ކްރިސްޓަލް ޕެލަސް ކުޅުނު މެޗުގެ މެދުން ވަނީ ކުޑަ ވަގުތު ކޮޅަކަށް ކުޅުން މެދުކަނޑާލައިފަ އެވެ. އެއީ ލެސްޓާ ސިޓީގެ ޑިފެންޑަރު ވެސްލީ ފޮފާނާ އާއި ކްރިސްޓަލް ޕެލަސްގެ މިޑްފީލްޑަރު ޗެއިކް ކުޔާޓޭ ރޯދަ ވިއްލަން ވަގުތު ދިނުމުގެ ގޮތުންނެވެ. މިއީ ލީގުގެ ތާރީހުގައި މެޗެއް މެދުކަނޑާލުމަށް ފަހު ކުޅުންތެރިއަކު ރޯދަ ވިއްލަން ފުރުސަތު ދިން ފުރަތަމަ ފަހަރެވެ.
އެކަމަށް އިޝާރާތްކޮށް ލީގުން ވަނީ ހުރިހާ ކްލަބަކަށް ހާއްސަ އެންގުމަކާ އެކު މެއިލް އެއް ފޮނުވައިފަ އެވެ. އެއީ މެޗެއް ފެށުމުގެ ކުރިން ރޯދަ އަށް ހުރި ކުޅުންތެރިންގެ ކަންކަން ރެފްރީގެ ސަމާލުކަމަށް ގެނައުމަށާއި މެޗުގެ މެދުން އެ ކުޅުންތެރިއަކު ރޯދަ ވިއްލަން ފުރުސަތު ދޭނެތޯ ނިންމާނީ ދެ ޓީމުގެ ކެޕްޓަނުންނާ ވާހަކަ ދެއްކުމަށް ފަހު ކަމަށެވެ. ދެ ޓީމުގެ ކެޕްޓަނުން ރުހޭނަމަ ރޯދަ ވިއްލަން ވަގުތު ކޮޅަކަށް މެޗު ހުއްޓާލަން ރެފްރީ ނިންމާނެ އެވެ.
ޕްރިމިއާ ލީގުން މި ގޮތަށް ކަނޑައެޅި އެންމެ ބޮޑު ސަބަބަކީ މި ދުވަސްވަރަކީ ލީގުގެ މުހިއްމު މެޗުތަކެއް ކުރިއަށްދާ ދުވަސްތަކެއް ކަމަށްވެފައި ގިނަ އަދަދެއްގެ މުސްލިމް ކުޅުންތެރިން ރޯދަ އަށް ހުރެ މެޗުތަކުގައި ކުޅެމުން އަންނާތީ އެވެ.
ޔޫރޮޕާ ލީގުގައި ބުރާސްފަތި ދުވަހުގެރޭ ކުޅުނު މެޗުގެ ތެރެއިން މެންޗެސްޓާ ޔުނައިޓެޑްގެ މިޑްފީލްޑަރު ޕައުލް ޕޮގްބާ ވެސް ވަނީ ރޯދަ ވިއްލައިފަ އެވެ.
ދާދި ފަހުން އިނގިރޭސި ގިނަ ކްލަބްތަކެއްގެ އޮފިޝަލުންތަކެއްގެ މެދުގައި ކުރެވުނު ސާވޭއެއްގައި ބުނާގޮތުން ރޯދަ އަށް ހުރެ މެޗު ކުޅޭ ގިނަ ކުޅުންތެރިން ރޭގަނޑު ވަގުތުގައި އެކަށީގެންވާ ވަރަށް ފެން ބޭނުންކުރަން ވަނީ އަންގައިފަ އެވެ. އަދި ބައެއް ކްލަބްތަކުގައި ރޯދަ މަހަށް ހާއްސަކޮށް ބައެއް މުސްލިމް ކުޅުންތެރިންނަށް މީލް ޕްލޭނެއް އެކުލަވާލަ އެވެ.
