އިންޑިއާއިން އޮސްޓްރޭލިއާއަށް އެތެރެވުން ވަގުތީ ގޮތުން މަނާކޮށް، ވަންނަ މީހުންނަށް ބޮޑު ޖޫރިމަނާއެއް ނުވަތަ ފަސް އަހަރުގެ ޖަލު ހުކުމެއް އަންނަ ގޮތަށް ހަމަޖައްސައިފި އެވެ.
ހެލްތު މިނިސްޓްރީން ބުނީ އެ ބަދަލަކީ އިންޑިއާއިން އޮސްޓްރޭލިއާއަށް އެތެރެވެ، ކަރަންޓީނުގައި ތިބި މީހުންނަށް ބަލި ޖެހިފައިވާ ނިސްބަތަށް ބެލުމަށް ފަހު ގެނައި ބަދަލެއް ކަމަށެވެ.
އިންޑިއާއިން އޮސްޓްރޭލިއާއަށް ކުރާ ހުރިހާ ވައިގެ ދަތުރެއް މި ހަފްތާގެ ކުރީކޮޅު ކެންސަލް ކުރި އެވެ.
ތަފާސްހިސާބުތައް ދައްކާ ގޮތުގައި 9000 އޮސްޓްރޭލިއާ ރައްޔިތުން އިންޑިއާގައި އެބަ އުޅެ އެވެ. އޭގެ ތެރެއިން 600 މީހުންނަކީ ހައި ރިސްކު މީހުންނެވެ.
އޮސްޓްރޭލިއާގެ މީޑިއާއިން ރިޕޯޓު ކުރާ ގޮތުގައި އެ ގައުމުގެ ރައްޔިތުން ގައުމަށް އެތެރެވެއްޖެ ނަމަ އެއީ ޖިނާއީ ކުށެއްގެ ގޮތުގައި މީގެ ކުރިން ދުވަހަކު ވެސް ބަލާފައެއް ނުވެ އެވެ.
އޭބީސީއަށް މައުލޫމާތު ދިން ޑޮކްޓަރަކު ބުނީ އެފަދަ ނިންމުމެއް ނިންމަން ޖެހޭ ވަރުގެ ނުރައްކަލެއް އިންޑިއާއިން އަންނަ މީހުންގެ ފަރާތުން އޮތް ކަމަށް އަދި ނުބެލެވޭ ކަމަށެވެ.
ސަރުކާރުގެ ނިންމުން ތަންފީޒު ކުރަނީ އަންނަ ހޯމަ ދުވަހުން ފެށިގެންނެވެ. އެގޮތުން އޮސްޓްރޭލިއާއަށް އަންނަން ކަނޑައަޅާ ތާރީހުގެ 14 ދުވަސް ކުރިން އިންޑިއާއަށް ގޮސްފައިވާ ނަމަ އޮސްޓްރޭލިއާއަށް އެތެރެވުން މަނާ ވާނެ އެވެ.
އެ އުސޫލާ ހިލާފުވެއްޖެ ނަމަ ފަސް އަހަރުގެ ޖަލު ހުކުމެއް ނުވަތަ 51,121 އެމެރިކާ ޑޮލަރުގެ ޖޫރިމަނާއެއް އަންނާނެ އެވެ. ބައެއް ހާލަތްތަކުގައި ޖޫރިމަނާއާ އެކު ޖަލަށް ލެވޭނެ އެވެ. ވަގުތީ ގޮތުން ގެންނަ މި ބަދަލު މޭ 15 ގައި މުރާޖައާ ކުރާނެ އެވެ.
ހެލްތު މިނިސްޓަރު ގްރެގް ހަންޓް ނެރުއްވި ބަޔާނެއްގައި ވިދާޅުވީ އެފަދަ ނިންމުންތައް ކުޑަ ކަމެއްގެ ގޮތުގައި ސަރުކާރުން ނުނަގާ ކަމަށާއި ނަމަވެސް އޮސްޓްރޭލިއާގެ އާއްމު ސިއްހަތު ހިމާޔަތް ކުރުމަށާއި ކަރަންޓީނު ނިޒާމު ފެއިލްވިޔަ ނުދީ ހިންގަން މި ބަދަލު ގެންނަން ޖެހޭ ކަމަށެވެ.
އިންޑިއާއިން އަންނަ މީހުން ޖަލަށް ދާން ޖެހޭނެ ކަމަށް އޮސްޓްރޭލިއާއިން ބުނެފައި ވާއިރު، އެ ގައުމުން ވަނީ އިންޑިއާއަށް ސިއްހީ އެހީ ފޯރުކޮށްދީފަ އެވެ. އޭގެ ތެރޭގައި ވެންޓިލޭޓަރާއި ސިއްހީ އެހީތެރިން ކޮވިޑް ބަލި މީހުންނަށް ފަރުވާ ދޭއިރު ލާން ޖެހޭ ޕީޕީއީ ހިމެނެ އެވެ.
އިންޑިއާގެ ޖުމްލަ ކޮވިޑް ކޭސްތައް 19 މިލިއަނަށް އަރާފައި ވާއިރު، ދެ ލައްކައަށް ވުރެ ގިނަ މީހުން މަރުވެފައި ވެއެވެ. މި ނިމުނު ހަފްތާގައި ކޮންމެ ދުވަހަކު ވެސް ތިން ލައްކައަށް ވުރެ ގިނަ މީހުން ޕޮޒިޓިވްވެ އެވެ. އިއްޔެ އެ އަދަދު ވަނީ ހަތަރު ލައްކައާ ގާތްކޮށްފަ އެވެ.
