ކޮވިޑުގެ ހާލަތު ގޯސްވަމުން ދާތީ ތުރުކީގައި ފުރަތަމަ ފަހަރަށް މިއަދު މެންދުރު ފަހުން ފެށިގެން ލޮކްޑައުން ތަންފީޒު ކުރަން ތައްޔާރުވެއްޖެ އެވެ.
ލޮކްޑައުން ކުރާނެކަން އެންގުމާއެކު ޓްރެފިކް ބާރު ބޮޑުވެ، ޝޮޕިން މޯލްތައް ފުރިފައިވާ ކަމަށް ރިޕޯޓުތައް ބުނެ އެވެ. ބައެއް މީހުން ދަނީ ވެރިރަށް އިސްތަންބޫލް ދޫކޮށް ދިޔުމަށް ވެސް މަސައްކަތް ކުރަމުންނެވެ.
މި ބަލިމަޑުކަން ފެށުނު ފަހުން މީގެ ކުރިން ތުރުކީ ލޮކްޑައުންކޮށްފައެއް ނުވެ އެވެ. މިދިޔަ އަހަރު ތުރުކީއިން އަވަސް ފިޔަވަޅު އަޅާ، އަދަދުތައް ހިފެހެއްޓުމުން ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) ތައުރީފް ވެސް ލިބުނެވެ.
ނަމަވެސް އޭގެ އެއް ފަހަރު ފަހުން ތުރުކީއަކީ މިހާރު އެންމެ ހާލަތު ގޯސް އެއް ގައުމެވެ. ޔޫރަޕްގައި ބަލި ފެތުރޭ ރޭޓް އެންމެ މަތިކޮށް އުޅެނީ ވެސް ތުރުކީގަ އެވެ.
ކޮވިޑު ޖެހިގެން ތުރުކީއިން މިހާތަނަށް މަރުވީ 39،000 މީހުންނެވެ. އެ ގައުމުގެ ސިއްހީ ނިޒާމު ހަރުދަނާވުމުގެ ސަބަބުން ހާލަތު އޮތީ ކޮންޓްރޯލްވެފައި ކަމަށް އޮފިޝަލުން ބުނެ އެވެ. ނަމަވެސް ކޭސްތައް އިތުރުވާ ރޭޓުން ކޮންޓްރޯލް ގެއްލިދާނެ ކަމުގެ ބިރު އެބަ އޮތެވެ.
ފެބްރުއަރީ މަހު ދުވާލަކު 6،000 ކޭސް ފެނުނުއިރު، މިހާރު 60،000 ކޭސް ދަނީ ފެންނަމުންނެވެ. މިގޮތަށް ދިމާވީ މާ އަވަހަށް ފިޔަވަޅުތަކަށް ލުއި ދިނުމުން ކަމަށް ރިޕޯޓުތައް ބުނެ އެވެ.
ތުރުކީގެ 82 މިލިއަން މީހުންގެ ތެރެއިން 22 މިލިއަން މީހުންނަށް ވެކްސިން ޖަހާފައި ވާއިރު، އެ ގައުމުގެ ގިނައިން ބޭނުން ކުރަނީ ޗައިނާގެ ވެކްސިނެވެ.
