ލަންޑަން (އޭޕްރީލް 29) - އާސެނަލްގެ ކޯޗުކަމާ ހަވާލުވުމުގެ ކުރިން އެ ޓީމަށް ކުރިން ކޯޗުކޮށްދިން އުނާއި އެމެރީއާ ވާހަކަ ދެއްކި ކަމަށް އާސެނަލްގެ މިހާރުގެ ކޯޗު މިކޭލް އާޓެޓާ ބުނެފި އެވެ.
އާސެން ވެންގާ 2018 ވަަނަ އަހަރު އާސެނަލް ދޫކޮށްލުމުން އެ ޓީމާ ހަވާލުވީ އެމެރީ އެވެ. އޭނާ ވަނީ 2019 ވަނަ އަހަރުގެ ނޮވެމްބަރުގެ ނިޔަލަށް އެ ޓީމަށް ކޯޗުކޮށްދީފަ އެވެ. އެމެރީ ވަކިކޮށްފައި ވަގުތީ ކޯޗެއްގެ ޒިންމާ ހަވާލުކުރީ އާސެނަލްގެ ކުރީގެ ކުޅުންތެރިޔާ ފްރެޑީ ލިޔުންބާގްއާ އެވެ. އާޓެޓާ، އާސެނަލާ ހަވާލުވީ 2019 ގެ ޑިސެމްބަރު 20 ވަނަ ދުވަހު އެވެ.
ޔޫރޮޕާ ލީގުގެ ސެމީ ފައިނަލުގައި މިރޭ އާސެނަލް ގޮވައިގެން އާޓެޓާ ނުކުންނާނީ އެމެރީ ހަވާލުވެހުރި ސްޕެއިންގެ ވިޔަރެއާލްއާ ދެކޮޅަށެވެ. މެޗުގެ ކުރިން އޮތް ނޫސްވެރިންގެ ބައްދަލުވުމުގައި އާޓެޓާ ވަނީ އެމެރީއާ ބެހޭގޮތުން ވާހަކަ ދައްކައިފަ އެވެ.
"އަަހަރެން އާސެނަލާ ހަވާލުވުމުގެ ކުރިން އެމެރީއާ ވާހަކަ ދެއްކިން. އޭނަ ވަރަށް އެހީތެރިވެދިން މި ކަމުގައި. ބައެއް ފަހަރު ކްލަބްތަކުން ވަކިކުރާ ކޯޗުން ދެން ހަވާލުވާ ކޯޗަކާ މެދު އެހާ ގާތްކަމެއް ނުހުރޭ. އެކަމަކު އެ ފަހަރު ކަންތައްތައް ދިޔައީ ތަފާތުކޮށް. އެމެރީ ވެވުނު ވަރަކުން އަހަންނަށް އެހީވި،" އާޓެޓާ ބުންޏެވެ.
އެމެރީ ވަނީ އާސެނަލާ އެކު 2019 ވަނަ އަހަރު ޔޫރޮޕާ ލީގުގެ ފައިނަލުގައި ކުޅެފަ އެވެ. ފައިނަލުގައި މައުރީޒިއޯ ސާރީގެ ޗެލްސީ އަތުން ބަލިވީ އެވެ. އާސެނަލްގައި ކޮންމެ ގޮތެއް ވިޔަސް އާޓެޓާގެ ނަޒަރުގައި ޔޫރޮޕާ ލީގުގައި އެމެރީގެ ކާމިޔާބީއަކާ އަޅާނުކިޔޭނެ އެވެ. އެމެރީ ވަނީ ސެވިއްޔާ އަށް ޖެހިޖެހިގެން ތިން އަހަރު ޔޫރޮޕާ ލީގު ހޯދައިދީފަ އެވެ.
މިދިޔަ އަހަރުގެ ޖުލައި މަހު ވިޔަރެއާލްގެ ކޯޗަކަށް ހަމަޖެއްސި އެމެރީ ވަނީ އެ ޓީމާ އެކު މިހާތަނަށް ރަނގަޅު މަސައްކަތްތަކެއް ކޮށްފަ އެވެ. އެމެރީ ބުނީ އާސެނަލްގައި އާޓެޓާ ބޭނުންވާ ކަންތައްތައް ހާސިލްކުރަން އެކަށީގެންވާ ވަގުތު ދީފިނަމަ ތަފާތު ފެންނާނެ ކަމަށެވެ.
"އާޓެޓާ އަކީ މޮޅު ކޯޗެއް. އޭނަގެ ގޭމްޕްލޭނުން އެ ތަފާތު އެބަފެނޭ. މީގެ ވަރަށް މުހިއްމު އޭނަ އެ ކުރާ މަސައްކަތަށް ވަގުތު ދިނުން،" އެމެރީ ބުންޏެވެ.
އާސެނަލާއި ވިޔަރެއާލް މީގެ ކުރިން ޔޫރަޕްގައި ކުޅުނު ހަތަރު މެޗު ވެސް ކުޅުނީ ޗެމްޕިއަންސް ލީގުގަ އެވެ. މިހާތަނަށް ވިޔަރެއާލަށް އާސެނަލް ބަލިކުރެވިފައިނުވެ އެވެ. ދެ މެޗު އެއްވަރުވިއިރު، އަނެއް ދެ މެޗުން ވިޔަރެއާލްވީ ބައްޔެވެ.
ވިޔަރެއާލާއި އާސެނަލް މިރޭ ކުޅޭ މެޗު ފަށާނީ ރާއްޖެ ގަޑިން 12 ޖަހާއިރު އެވެ.
