ޗައިނާއިން ޖައްވީ ޕްރޮގްރާމް ފުޅާ ކުރުމުގެ ގޮތުން ޖައްވުގައި މުޅިން އާ ސްޓޭޝަނެއް ގާއިމް ކުރަން ބޭނުންވާ ފުރަތަމަ މޮޑިއުލް ޖައްވަށް ފޮނުވައިފި އެވެ.
ޓިއަންހޭ މޮޑިއުލް ޖައްވަށް ފޮނުވަން ލޯންޗު ކުރީ ވެންޗަންގް ސްޕޭސް ލޯންޗު ސެންޓަރުން "ލޯންގް މާޗް 5ބީ ވައި2" ރޮކެޓެއްގަ އެވެ.
ޗައިނާއިން އުއްމީދު ކުރަނީ 2022 ވަނަ އަހަރު ފެށުމުގެ ކުރިން މުޅިން އަލަށް ހަދާ ޖައްވީ ސްޓޭޝަން ބޭނުން ކުރުމަށެވެ.
މިހާރު ޖައްވުގައި ހުންނަނީ އެންމެ ސްޓޭޝަނެކެވެ. ނަމަވެސް އިންޓަނޭޝަނަލް ސްޕޭސް ސްޓޭޝަން (އައިއެސްއެސް) ގެ ނަން ދީފައިވާ އެ ތަން ޗައިނާއަށް ބޭނުން ކުރުމުގެ ހުއްދައެއް ނުދެ އެވެ.
ދުނިޔޭގެ ބާރުގަދަ ގައުމުތަކާ އަޅާ ބަލާއިރު، ޗައިނާއިން ޖައްވީ ޕްރޮގްރާމްތައް ފެށީ ވަރަށް ލަހުންނެވެ. އެ ގައުމުގެ އެސްޓްރޮނޮޓަކު އަލަށް ޖައްވަށް ދިޔައީ 2003 ވަނަ އަހަރެވެ. ނަމަވެސް ޗައިނާއަކީ ރަޝިއާ އާއި އެމެރިކާއަށް ފަހު ޖައްވަށް އެންމެ ފުރަތަމަ މީހުން ފޮނުވި ތިން ވަނަ ގައުމެވެ.
މީގެ ކުރިން ޗައިނާއިން ވަނީ ދެ ސްޓޭޝަނެއް ޖައްވުގައި ގާއިމްކޮށްފަ އެވެ. ނަމަވެސް އެ ދެ ތަނަކީ ވަގުތީ ގޮތުން ގާއިމް ކުރި ތަންތަނަށް ވާތީ، އެސްޓްރޮނޮޓުންނަށް ބޭނުން ކުރެވުނީ ކުޑަ ދުވަސްކޮޅަކަށެވެ.
އެއާ ހިލާފަށް މި ފަހަރު ޖައްވުގައި ހަދަން މަސައްކަތް ކުރާ ސްޓޭޝަނަކީ މަދުވެގެން ދިހަ އަހަރު ބޭނުން ކުރެވޭނެ ތަނެކެވެ.
ޗައިނާ ސަރުކާރުން ބުނީ އެ ސްޓޭޝަން ފުރިހަމަ ކުރަން ބޭނުންވާ އެކި ބައިތައް ދިހަ ފަހަރެއްގެ މަތިން ޖައްވަށް ފޮނުވަން ޖެހޭނެ ކަމަށެވެ.
ޖައްވީ ސްޓޭޝަން ގާއިމް ކުރުމުގެ އިތުރުން ހަނދާއި މާސްއަށް އިންސާނުން ފޮނުވުމުގެ މަސައްކަތް ޗައިނާއިން ދަނީ ކުރަމުންނެވެ. އޭގެ އިތުރުން ދުނިޔޭގެ އެންމެ ބޮޑު ރޭޑިއޯ ޓެލެސްކޯޕް ހެދުމުގެ މަސައްކަތް ވެސް އެ ގައުމުގައި ދަނީ ކުރަމުންނެވެ.
ޗައިނާއިން ވަނީ ރަޝިއާއާ ގުޅިގެން ހަނދު ކައިރީގައި "ލޫނާ" ޖައްވީ ސްޓޭޝަނެއް ގާއިމް ކުރަން ވެސް ނިންމާފަ އެވެ.
