އެމެރިކާގެ ރައީސް ޖޯ ބައިޑެންގެ ސަރުކާރުގެ ވިސްނުމާއި ސައުދީ އަރަބިއްޔާގެ ވިސްނުމުގެ 90 ޕަސެންޓު އެއް ގޮތް ކަމަށް ސައުދީ ވަލީ އަހުދު އަމީރު މުހައްމަދު ބިން ސަލްމާން ވިދާޅުވެއްޖެ އެވެ.
ޓީވީ ޗެނަލަކަށް ދެއްވި އިންޓަވިއުގައި ސައުދީ ވަލީ އަހުދު ވިދާޅުވީ އެމެރިކާއަކީ މުހިއްމު ބައިވެރިއެއް ކަމަށާއި ވިސްނުމުގައި ހުރި ތަފާތުތައް ހައްލު ކުރަން މަސައްކަތް ކުރަމުންދާ ކަމަށެވެ.
ނަމަވެސް ދާހިލީ ކަންކަމުގައި އެއްވެސް ޕްރެޝަރެއް އަދި ބައިވެރިވުމެއް ބަލައިނުގަންނާނެ ކަމަށް އެމަނިކުފާނު ވިދާޅުވި އެވެ.
ސައުދީ އަރަބިއްޔާގައި ގިނަ ބާރުތަކެއް ލިބިވަޑައިގެންފައިވާ ވަލީ އަހުދު އެފަދަ ގޮތަކަށް ވާހަކަފުޅު ދެއްކެވިއިރު، މީގެ ކުރިން ބައިޑެން ވިދާޅުވީ އެމަނިކުފާނާ ބައްދަލު ނުކުރައްވާނެ ކަމަށެވެ. ބައިޑެން ވިދާޅުވީ ބައްދަލުކުރައްވާނީ ހަމައެކަނި ރަސްގެފާން ސަލްމާންއާ ކަމަށެވެ.
އެމެރިކާގެ ކުރީގެ ރައީސް ޑޮނަލްޑް ޓްރަމްޕްގެ ސަރުކާރުން ސައުދީ ވަލީ އަހުދާ ގާތް ގުޅުމެއް ބޭއްވި ނަމަވެސް، އިންސާނީ ހައްގުތަކާއި ޔަމަނު ހަނގުރާމައިގެ މައްސަލާގައި ބައިޑެންގެ ސަރުކާރުން ވަލީ އަހުދާ މެދު ގާތްކޮށެއް ނުދެކެ އެވެ.
މި އަހަރުގެ ކުރީކޮޅު އެމެރިކާއިން ނެރުނު ޖާސޫސީ ރިޕޯޓެއްގައި ވަލީ އަހުދަށް ތުހުމަތު ކުރައްވާފައިވަނީ 2018 ވަނަ އަހަރު ސައުދީ ނޫސްވެރިޔާ ޖަމާލް ހަޝޮއްގީ މަރާލުމުގައި ދައުރެއް އަދާކުރެއްވި ކަމަށެވެ. ނަމަވެސް ވަލީ އަހުދު އެކަން ދޮގު ކުރައްވަ އެވެ.
