ޒިކުރާ މިސްކިތް ހުރި ބިމުގައި މިސްކިތެއް ހިމެނޭހެން 10 ބުރީގެ އިމާރާތެއް އެޅުމަށް އެސްޖޭ ކޮންސްޓްރަކްޝަން ކުންފުންޏަށް އިކުއިޓީގެ ގޮތުގައި ދިން ފައިސާ އަނބުރާ ހޯދުމަށް އެޓާނީ ޖެނަރަލްގެ އޮފީހުން ސިވިލް ކޯޓަށް މައްސަލަ ހުށަހަޅައިފި އެވެ.
އެ އޮފީހުގެ ކޮމިއުނިކޭޝަން ޑިރެކްޓަރު ހުސެއިން ހަސަން މިއަދު "އަދަދު"އަށް ވިދާޅުވީ ހޯމަ ދުވަހު ސިވިލް ކޯޓަށް ދައުލަތުގެ ފަރާތުން ހުށަހެޅި މައްސަލާގައި އެދުނީ އިކުއިޓީގެ ގޮތުގައި އެ ކުންފުންޏަށް ދޫކުރި 30 މިލިއަން ރުފިޔާ އަނބުރާ ހޯދަން ކަމަށެވެ.
ކުރީގެ ރައީސް މައުމޫން އަބްދުލްގައްޔޫމްގެ ބައްޕާފުޅުގެ ހަނދާނުގައި ބިނާކޮށްފައި ހުރި މިސްކިތް ތަޅާލުމަށް ފަހު އެތަނުގައި "ދާރުލް ޒިކުރާ"ގެ ނަމުގައި 10 ބުރީގެ އިމާރާތެއް އަޅަން ނިންމީ ރައީސް އަބްދުﷲ ޔާމީންގެ ސަރުކާރުގަ އެވެ. އެ ނިންމުމުގެ ދަށުން އިސްލާމިކް މިނިސްޓްރީ އާއި އެސްޖީ ކުންފުންޏާ ދެމެދު، 130 މިލިއަން ރުފިޔާ ޖުމްލަ މަޝްރޫއުއަށް ލިބޭ ގޮތަށް ސޮއިކުރި އެވެ.
ނަމަވެސް އެ އެއްބަސްވުމަށް އެއް އަހަރުވެގެން ދިޔައިރު ވެސް އިމާރާތުގެ މަސައްކަތް ނުފެށެ އެވެ. އަދި، އެ އެއްބަސްވުމުގައި އިސްލާމިކް މިނިސްޓްރީގެ އިދާރީ ގޯސްތަކެއް ހަދާފައި ހުރި ކަމަށް ބުނެ މަސައްކަތް ހުއްޓުނެވެ. އޭގެފަހުން ސަރުކާރު ބަދަލުވެ، އޭރުގެ އިސްލާމިކް މިނިސްޓްރީން އުޅުނީ ބަޔަކަށް ނާޖައިޒު ފައިދާ ނަގައިދިނުމަށް ކަމަށް ބުނެ މައްސަލަ ތަހުގީގު ކުރި އެވެ.
ތަހުގީގުން ހާމަވީ، މަޝްރޫއު ޕްލޭންކޮށްފައިވަނީ އެސްޖޭ ކުންފުންޏަށް 10 ފްލޯގެ އިމާރާތުގެ ތެރެއިން ހަ ފްލޯ ދިނުމަށްފަހު ސަރުކާރަށް ހަތަރު ފްލޯ ލިބޭ ގޮތަށް ކަމާއި ނަމަވެސް، ކުންފުންޏާ އެކު މިނިސްޓްރީން ހެދި އެއްބަސްވުމުގައި އެއާ ހިލާފަށް އޮތީ، ކުންފުންޏަށް ހަތް ފްލޯ އަދި ސަރުކާރަށް ތިން ފްލޯ ލިބޭ ގޮތަށް ކަމެވެ.
އެއީ އިދާރީ އޮޅުމެއް ކަމާއި އެކަން އިސްލާހު ކުރުމަށް އޭރުގެ އިސްލާމިކް މިނިސްޓަރު އަހުމަދު ޒިޔާދު މަސައްކަތް ކުރެއްވި ކަމަށް ބުނި ނަމަވެސް، ދައުލަތުން ވަނީ ރަސްމީ ހައިސިއްޔަތު ނަހަމަ ގޮތުގައި ބޭނުން ކުރުމުގެ ދައުވާ އުފުލައި އޭނާގެ މައްޗަށް ޝަރީއަތް ފަށައިފަ އެވެ.
އެއްބަސްވުން އުވާލި މައްސަލާގައި އެސްޖޭ ކުންފުނިން ބަދަލުގެ ގޮތުގައި 111 މިލިއަން ރުފިޔާ ހޯދުމަށް މީގެކުރިން މައްސަލަ ހުށަހެޅި ނަމަވެސް، އެ ކޯޓުން ވަނީ އެ ކުންފުނިން އެއްބަސްވުމާ އެއްގޮތަށް މަސައްކަތް ކޮށްފައިނުވާ ކަމަށް ބުނެ ބަދަލު ނަގައި ނުދޭން ނިންމާފަ އެވެ. އެއްބަސްވުން އުވާލުން ގާނޫނާ ހިލާފު ނޫން ކަމަށް ސިވިލް ކޯޓުން ކުރި ހުކުމް، އެސްޖޭއިން ވަނީ ހައި ކޯޓުގައި އިސްތިއުނާފުކޮށްފަ އެވެ.
