އދ. ދަގެނތީ މިސްކިތުގައި މީހުން ނަމާދަށް ތިއްބައި އެތަނުގައި ހުރި ފަންޑު ފޮށި ވަގަށް ނެގި މައްސަލައިގައި ދެ މީހަކު ހައްޔަރުކޮށްފި އެވެ.
އެ ފަންޑު ފޮއްޓަކީ އެ ރަށުގައި ތިބި ފަގީރުންނަށް އެހީވުމަށް ފައިސާ ޖަމާކުރަން ބެހެއްޓި ފަންޑު ފޮއްޓެކެވެ.
ފުލުހުންގެ މީޑިއާ އޮފިޝަލް މިއަދު ވިދާޅުވި ގޮތުގައި، މި މައްސަލާގައި ކޯޓު އަމުރެއްގެ ދަށުން ދެ މީހަކު އިއްޔެ ވަނީ ހައްޔަރުކޮށްފަ އެވެ. އެއީ 26 އަހަރާއި 31 އަހަރުގެ ދިވެހި ދެ ފިރިހެނުންނެވެ.
އެ ރަށަކީ ވައްކަމުގެ މައްސަލަތައް އާއްމު ރަށަކަށް ނުވާތީ، އެ ފަންޑު ފޮށި މިސްކިތުގައި ހުރީ އެއްވެސް ސޭފްޓީއަކާ ނުލަ އެވެ.
ފަގީރު އާއިލާތަކަށް އެހީވުމަށް ރަށުގެ ރައްޔިތުން އިސްނަގައިގެން ބަހައްޓާފައި ހުރި ފަންޑު ފޮށީގައި ގާތްގަނޑަކަށް ހައެއްކަ ހާސް ރުފިޔާ ހުންނާނެ ކަމަށްވެ އެވެ.
މީގެ ކުރިން މި ރަށުގައި މިފަދަ ކަމެއް ހިންގާފައި ނުވާތީ، ރަށުގެ ރައްޔިތުން ރޭ ވަނީ ވަރަށް ބޮޑަށް ނުރުހުން ފާޅުކޮށްފަ އެވެ. އެގޮތުން އެ ރަށު ފުލުސް އޮފީސް ދޮށަށް ބައެއް މީހުން އެއްވެ، ތަހުގީގު އަވަސްކުރުމަށް ވަނީ ގޮވާލާފަ އެވެ.
