ޕެރިސް (އޭޕްރީލް 28) - ޔުއެފާ ޗެމްޕިއަންސް ލީގުގެ ސެމީ ފައިނަލުގައި ޕީއެސްޖީގެ ދެ ތަރިން ކަމަށްވާ ކީލިއަން އެމްބާޕޭ އާއި ނޭމާ ހުއްޓުވަން ޖެހޭކަމާ މެދު ނުވިސްނާނަމަ ހަމަނިދި ލިބޭ ކަމަށް މެންޗެސްޓާ ސިޓީގެ ކޯޗު ޕެޕް ގާޑިއޯލާ ބުނެފި އެވެ.
މި ސީޒަނުގައި ޕީއެސްޖީން ވަނީ އެމްބާޕޭ އާއި ނޭމާގެ މޮޅު ކުޅުމާ އެކު މި މުބާރާތުގެ ނޮކައުޓު ބުރުގައި ބާސެލޯނާ އާއި އެންމެ ފަހުގެ ޗެމްޕިއަން ބަޔާން މިއުނިކް ކަޓުވާލައިފަ އެވެ. ސިޓީގެ ކޯޗު ގާޑިއޯލާ އެކަން ފާހަގަކޮށް ބުނީ އޭނާ އަށް ނިދަން ފަސޭހަވާނީ އެ ދެ ކުޅުންތެރިންނާ މެދު ނުވިސްނާނަމަ ކަމަށެވެ.
"އަހަރެން ރޭ ވަރަށް ރަނގަޅަށް ނިދޭތޯ މަސައްކަތްކުރިން. ހަމަ އެ ގޮތަށް ނިދުނު. އެ ގޮތަށް ނިދުނީ އެ ކަހަލަ (ނޭމާ އާއި އެމްބާޕޭ) ކުޅުންތެރިންނާ މެދު ނުވިސްނާތީ. އެކަމާ ވިސްނިނަމަ އެހެން ގޮތަކަށް އެކަން ދާނީ،" މިރޭގެ މެޗުގެ ކުރިން އޮތް ނޫސްވެރިންގެ ބައްދަލުވުމުގައި ގާޑިއޯލާ ބުންޏެވެ.
"އަހަރެމެން އެ މީހުން ހުއްޓުވަން މަސައްކަތްކުރާނީ ޓީމެއްގެ ގޮތުގައި. އެކަމަކު އެ ކަމަށް މަސައްކަތްކުރިޔަސް އަހަރެެން ހަނދާން ނައްތާލައިގެން ނުވާނެ އަމިއްލަ ގޭމް ކުޅެން،"
މިއީ ސިޓީން ގާޑިއޯލާ ހަވާލުވި ފަހުން ކުޅޭ ފުރަތަމަ ސެމީ ފައިނަލް އެވެ. އަދި އެ ކްލަބްގެ ތާރީހުގައި ކުޅޭ ދެ ވަަނަ ސެމީ ފައިނަލް އެވެ. ގާޑިއޯލާ ބުނީ ސިޓީ އަކީ ޔޫރަޕްގެ ގަދަ ބާރެއްތޯ ގިނަ މީހުން އުފައްދާ ސުވާލަށް ޖަވާބުދޭން ޕީއެސްޖީ މެޗަކީ ރަނގަޅު ޓެސްޓެއް ކަމަަށެވެ.
ސިޓީގެ ކޯޗު ގާޑިއޯލާ.-- ފޮޓޯ: އޭއެފްޕީ
"އަހަރެމެންނަކީ މި ލީގުގެ އެލީޓުންނެއް ނޫން. އެކަަމަކު އެ ކެޓަގަރީގައި އަހަރެެމެންގެ ނަން އޮންނާނެ މި ކަހަލަ މެޗުތަކުގައި ތަފާތެއް ދައްކައިފިއްޔާ. ސިޓީގެ މިހާރު ތިބި ވެރިން މި ކްލަބާ ހަވާލުވިއިރު ބޭނުންވީ އަހަރެމެން އިންގްލެންޑްގެ އެއް ވަނަ އަށް ގެންދަން. މިހާރު މި ތިބީ އެ މަގާމުގައި. ދެން ޔޫރަޕްގެ މޮޅު ޓީމުތަކުގެ ތެރެއަށް ވަނުން މަސައްކަތަކީ،" ގާޑިއޯލާ ބުންޏެވެ.
"ތެދެއް. އިނގިރޭސި ޕްރިމިއާ ލީގަކީ މުހިއްމު މުބާރާތަކީ. އެކަމަކު އެންމެ ފުރިހަމަވާނީ ޗެމްޕިއަންސް ލީގު،"
މިހާރު ޕީއެސްޖީއާ ހަވާލުވެ ހުރި ކޯޗު މައުރީސިއޯ ޕޮޗެޓީނޯ ވަނީ 2019 ވަނަ އަހަރު ޓޮޓެންހަމް ގޮވައިގެން ޗެމްޕިއަންސް ލީގުގެ ކުއާޓާ ފައިނަލުން ސިޓީ ކަޓުވާލައިފަ އެވެ. ޕޮޗެޓީނޯ ބުނީ މާޒީގައި ކޮށްފައި ހުރި ކަމަކުން މީގެ ލިބޭނެ މޮޅެއް ނެތް ކަމަށެވެ.
"އަަހަރެމެން ޕެޕް ގާޑިއޯލާއާ ބެހޭގޮތުން ވާހަކަ ދައްކާއިރު ގަބޫލުކުރަންޖެހޭ މި ވާހަކަ ދެކެވެނީ ދުނިޔޭގެ އެންމެ މޮޅު އެއް ކޯޗާ ބެހޭގޮތުން ކަން. އަހަރެން ގާޑިއޯލާ ބަލައިގަންނަނީ އޭނަ ހޯދާ ޓްރޮފީތަކާ ހެދިއެއް ނޫން. ފުޓްބޯޅަ އަށް އޭނަ އެ ގެންނަ ބަދަލާ އޭނަގެ ލެގަސީއާ މެދު ވަރަށް ހިތްހަަމަޖެހޭ،" ޕޮޗެޓީނޯ ބުންޏެވެ.
ކޯޗިން ކެރިއަރުގައި ގާޑިއޯލާ އާއި ޕޮޗެޓީނޯ ވަނީ 18 ފަހަރު ކުރިމަތިލައިފަ އެވެ. ރެކޯޑް ރަނގަޅީ ގާޑިއޯލާގެ އެވެ. އޭނާ ވަނީ 10 މެޗުން މޮޅުވެފަ އެވެ. ޕޮޗެޓީނޯ އަށް ތިން މޮޅު ހޯދުނުއިރު، ފަސް މެޗު ނިމުނީ އެއްވަރުވެގެންނެވެ.
ޔޫރަޕްގައި ރަށުންބޭރުގައި ސިޓީ އެންމެ ފަހުން ކުޅުނު 16 މެޗުގެ ތެރެއިން ވަނީ 11 މެޗުން މޮޅުވެފަ އެވެ. ރަށުންބޭރުގައި ސިޓީ އެންމެ ފަހުން ކުޅުނު 17 މެޗުން ވަނީ މޮޅުވެފަ އެވެ. ޕީއެސްޖީ ވަނީ އެންމެ ފަހުން އެ ޓިމު ކުޅުނު 25 މެޗުގެ ތެރެއިން 19 މެޗުން މޮޅުވެފަ އެވެ. ޗެމްޕިއަންސް ލީގުގައި ޕީއެސްޖީ ދަނޑުގައި ކުޅުނު ލެގުން ބާސެލޯނާއާ 1-1 އިން އެއްވަރުވިއިރު، ބަޔާން އަތުން 1-0 އިން ވީ ބައްޔެވެ.
ސިޓީ އާއި ޕީއެސްޖީގެ މެޗު ފަށާނީ މިރޭ 22:00 ގަ އެވެ.
