އދ. ދަނގެތީ މިސްކިތުގައި ބަހައްޓާފައި ހުރި ފަންޑު ފޮށި ރޭ ވަގަށް ގެންދިޔުމުން އެ ރަށުގައި ނުތަނަވަސްކަން ބޮޑުވެއްޖެ އެވެ.
ވަގަށް ގެންދިޔަ ފަންޑު ފޮއްޓަކީ، އެ ރަށުގެ ފަގީރު އާއިލާތަކަށް އެހީވުމަށްޓަކައި ރަށުގެ ރައްޔިތުންގެ އިސްނެގުމަށް ބަހައްޓާފައި ހުރި ފަންޑު ފޮއްޓެކެވެ. އެ ފަންޑުގައި ގާތްގަނޑަކަށް ހައެއްކަ ހާސް ރުފިޔާ ހުންނާނެ ކަމަށްވެ އެވެ.
އެ ރަށަކީ ވައްކަމުގެ މައްސަލަތައް އާންމު ރަށަކަށް ނުވާތީ މީގެކުރިން ވެސް އެހެން ފަންޑު ފޮށި ބަހައްޓާފައި ހުންނާތީ، އެ ފަންޑު ފޮށި މިސްކިތުގައި ހުރީ އެއްވެސް ސޭފްޓީއަކާ ނުލަ އެވެ. ރޭ ގާތްގަނޑަކަށް 9:15 ހާއިރު ފަންޑު ފޮށި ވަގަށް ގެންދިޔައީ މިސްކިތުގައި މީހުން ތަރާވީސް ނަމާދު ކުރަން ތިއްބަ އެވެ.
ފުލުހުންގެ މީޑިއާ އޮފިޝަލް ވިދާޅުވި ގޮތުގައި އެ މައްސަލަ ރޭ ހުށަހެޅުމާ އެކު މައްސަލަ ތަހުގީގުކުރަން ވަނީ ފަށައިފަ އެވެ. މިހާތަނަށް މައްސަލާގައި މީހަކު ހައްޔަރުކޮށްފައި ނުވެ އެވެ. ވަގަށް ގެންދިޔަ ފަންޑު ފޮށި މީހުން ދިރިއުޅޭ ގޯއްޗެއް ތެރެއިން ފެނިފައިވީ ނަމަވެސް، އޭގައި ހުރި ފައިސާތައް އަދި ނުހޯދޭ ކަމަށް އޮފިޝަލް ވިދާޅުވި އެވެ.
ދަނގެތީގައި މީގެކުރިން މިފަދަ ކަމެއް ހިނގާފައި ނެތުމުން، ރަށު ރައްޔިތުން ރޭ ވަނީ ވަރަށް ބޮޑަށް ނުރުހުން ފާޅުކޮށްފަ އެވެ. އެގޮތުން، އެ ރަށު ފުލުސް އޮފީސް ދޮށަށް ބައެއް މީހުން އެއްވެ، ތަހުގީގު އަވަސްކުރުމަށް ގޮވާލާފައިވެ އެވެ.
މިކަމާ ގުޅޭ ގޮތުން އެ ރަށުގެ ކައުންސިލްގެ ބަހެއް ނުލިބުނެވެ.
ފުލުހުންގެ ރިކޯޑްތައް ދައްކާ ގޮތުން، ކޮންމެ ރޯދަ މަހަކާއެކު ވެސް ވައްކަމުގެ މައްސަލަތައް ގިނަވެ އެވެ. މާލޭގައި ވެސް އާރުޑީސީގެ އޮފީސް ހަފުތާއެއްގެ ތެރޭގައި ދެ ފަހަރެއްގެ މަތިން ވަނީ ފަޅާލައިފަ އެވެ.
