އެމެރިކާއަށް ލިބެމުންދާ އޮކްސްފޯޑް ކޮވިޑް ވެކްސިނުގެ 60 މިލިއަން ޑޯޒް އެހެން ގައުމުތަކަށް ބަހާލާނެ ކަމަށް ވައިޓް ހައުސްއިން ބުނެފި އެވެ.
އެ ވެކްސިނުގެ ރައްކާތެރިކަން އެމެރިކާގައި ކަށަވަރުކޮށް، ހުއްދަ ދިނުމާއެކު އެހެން ގައުމުތަކަށް އެކްސްޕޯޓް ކުރަން ފަށާނެ އެވެ. ނަމަވެސް މިކަމަށް އަދި މަސްތަކެއް ހޭދަވާނެ ކަމަށް ބެލެވެ އެވެ.
މިހާތަނަށް އެމެރިކާގައި އޮކްސްފޯޑް ވެކްސިނަށް ހުއްދަ ދީފައި ނުވި ނަމަވެސް، އެ ވެކްސިނުގެ ބޮޑު ސްޓޮކެއް އެ ގައުމުގައި ރައްކާކޮށްފައި އެބަ ހުއްޓެވެ.
އެހެންކަމުން ބައެއް ގައުމުތަކުން ވެކްސިނަށް ޖެހި ހާލުގައި އުޅޭ އިރު، އެމެރިކާއިން އެ ތަކެތި ފޯރުކޮށްދީފައި ނުވާތީ ފާޑުކިޔުން އަމާޒުވެފައި ވެއެވެ.
މިދިޔަ މަހު ރައީސް ޖޯ ބައިޑެން ވަނީ އޮކްސްފޯޑް ވެކްސިނުގެ ހަތަރު މިލިއަން ޑޯޒް ކެނެޑާ އާއި މެކްސިކޯއަށް ހަދިޔާ ކުރައްވަން ވައުދުވެ ވަޑައިގެންފަ އެވެ. އެ ދެ ގައުމުގައި ވެސް އެ ވެކްސިނަށް ހުއްދަ ދީފައި ވެއެވެ.
އޭގެ އިތުރުން އިންޑިއާއަށް ދިމާވެފައިވާ ކާރިސާގެ ސަބަބުން ވެސް އެމެރިކާއަށް ދަނީ އެ ގައުމުގެ ސިއްހީ ރިސޯސްތައް ހިއްސާ ކުރުމަށް ޕްރެޝަރު ބޮޑުވަމުންނެވެ.
ވައިޓް ހައުސްއިން ބުނީ ފުޑް އެންޑް ޑްރަގް އޮތޯރިޓީގެ ހުއްދަ ލިބުމާއެކު 10 މިލިއަން ޑޯޒް ގައުމުތަކަށް ފޮނުވާނެ ކަމަށެވެ. އިތުރު 50 މިލިއަން ޑޯޒް ހުރީ އުފެއްދުމުގެ މަރުހަލާގަ އެވެ.
ވައިޓް ހައުސްގެ ތަރުޖަމާނު ޖެން ސާކީ ވިދާޅުވީ ވެކްސިން އެކްސްޕޯޓް ކުރުމުގެ ކުރިން އެފްޑީއޭއިން އޭގެ ރައްކާތެރިކަން ކަށަވަރު ކުރާނެ ކަމަށެވެ.
އިއްޔެ އެމެރިކާއިން ބުނީ އިންޑިއާގައި ވެކްސިން އުފައްދަން ހުރި ދަތިތައް ނައްތާލުމުގެ ގޮތުން އެ ގައުމަށް ބޭނުންވާ ސާމާނު އެކްސްޕޯޓް ކުރުމުގެ ހުއްދަ ދޭނެ ކަމަށެވެ.
އިންޑިއާގައި ވެކްސިން އުފައްދާ ކުންފުނިތަކުން ބުނެފައި ވަނީ ސަޕްލައިއަށް އަސަރު ކުރީ މިދިޔަ ފެބްރުއަރީ މަހުން ފެށިގެން ވެކްސިން އުފައްދަން ބޭނުންވާ ތަކެތި އެކްސްޕޯޓް ކުރުން އެމެރިކާއިން މަނާ ކުރުމުން ކަމަށެވެ.
ވައިޓް ހައުސްއިން ނެރުނު ބަޔާނެއްގައި ބުނީ ބައިޑެން އާއި އިންޑިއާގެ ބޮޑު ވަޒީރު ނަރެންދްރަ މޯދީ ފޯނުން ވާހަކަފުޅު ދެއްކެވި ކަމަށާއި އޮކްސިޖަނާއި، ވެކްސިނަށް ބޭނުންވާ ސާމާނާއި އެހެނިހެން ތަކެތި ވެސް ފޯރުކޮށްދޭނެ ކަމުގެ ޔަގީންކަން ދެއްވާފައިވާ ކަމަށެވެ.
