ލެސްޓާ (އޭޕްރީލް 27) - އިނގިރޭސި ޕްރިމިއާ ލީގުގައި މިރޭ ފަހަތުން އަރައި ކްރިސްޓަލް ޕެލަސް 2-1 އިން ބަލިކޮށް ލެސްޓާ ސިޓީން ތިން ވަނައިގައި ލީޑު ދަމަހައްޓައިފި އެވެ.
މި މޮޅާ އެކު ލެސްޓާ ލީގުގެ ތިން ވަަނައިގައި އޮތީ 33 މެޗުން 62 ޕޮއިންޓާ އެކު އެވެ. ހަތަރެއްގައި އޮތް ޗެލްސީ އަށް ވަނީ 33 މެޗުން 58 ޕޮއިންޓް ލިބިފަ އެވެ. ފަސް ވަނައިގައި އޮތް ވެސްޓް ހޭމަށް 33 މެޗުން 55 ޕޮއިންޓް ލިބިފައިވާއިރު، ހަ ވަނައިގައި ލިވަޕޫލް އޮތީ 33 މެޗުން 54 ޕޮއިންޓާ އެކު އެވެ. ހަތް ވަނައިގައި އޮތް ޓޮޓެންހަމަށް 33 މެޗުން ވަނީ 53 ޕޮއިންޓް ލިބިފަ އެވެ. އަދި އެވަޓަން އަށް ވަނައިގައި އޮތީ 32 މެޗުން 52 ޕޮއިންޓާ އެކު އެވެ.
ލެސްޓާގެ ކިންގް ޕަވާ ސްޓޭޑިއަމްގައި މިރޭ ކުޅުނު މެޗުގެ ފުރަތަމަ ހާފުގައި ކްރިސްޓަލް ޕެލަސް އިން ރަނގަޅަށް ކުޅެ ލީޑުނެގި އެވެ. މެޗުގެ 12 ވަނަ މިނިޓްގައި އެބްރެޗީ އެޒޭ ހުސްކޮށްލާފައި ދިން ބޯޅައެއް ހޯދައި ޕެލަސް އަށް ލީޑުނަގައިދިނީ ވިލްފްރިއެޑް ޒަހާ އެވެ.
ފުރަތަމަ ހާފުގައި ނަތީޖާ ހަމަހަމަކުރަން ލެސްޓާ އިން ކުރި މަސައްކަތް ނާކާމިޔާބުވީ ނަމަވެސް ދެ ވަނަ ހާފްގެ ކުޅުން ފެށިގެން ފަސް މިނިޓް ތެރޭ ބެލްޖިއަމްގެ ފުލްބެކް ޓިމޮތީ ކަސްޓާނިއާ ވަނީ ލެސްޓާ އަށް އެއްވަރުކޮށްދީފަ އެވެ. ކަސްޓާނިއާ މި ގޯލު ޖެހީ މި ވަގުތު ތަފާތު ފޯމެއްގައި ހުރި ލެސްޓާގެ ފޯވާޑް ކެލެޗީ އިހެނާޗޯ ދިން ބޯޅައަކުންނެވެ. މިއީ ސީޒަނުގެ ފުރަތަމަ މެޗަށް ފަހު ކަސްޓާނިއާ ޖެހި ފުރަތަމަ ގޯލެވެ.
ޕެލަސްގެ ކްރިސްޓިއަން ބެންޓެކޭ އަށް އަލުން އެ ޓީމަށް ލީޑުނަގައިދޭން ލިބުނު ބޯޅަތަކުގެ ބޭނުމެއް ނުހިފުނެވެ. ލެސްޓާ މޮޅުކޮށްދިން ގޯލު ޖެހީ މެޗުގެ 80 ވަނަ މިނިޓްގައި އިހެނާޗޯ އެވެ. ޖޯނީ އެވަންސް މަތިން ފޮނުވާލި ބޯޅައެއް ކޮންޓްރޯލްކޮށްލުމަށް ފަހު ޕެލަސްގެ ދެ ކުޅުންތެރިން ދޭތެރެއިން އިހެނާޗޯ ފޮނުވާލި ބޯޅަ އަމާޒުވީ ގޯލުގެ މަތީ ދާގަނޑަށެވެ. އެ ބޯޅަ ގޯލަށް ވަންއިރު ޕެލަސްގެ ކީޕަރު ވިސެންޓޭ ގައީޓާ ހުރީ ހަރަކާތް ހުއްޓިފަ އެވެ.
ލެސްޓާގެ ކޯޗު ބްރެންޑަން ރޮޖާސް ބުނީ ސީޒަންގެ މި ހިސާބުން އެންމެ މުހިއްމު ކަމަކީ ނަތީޖާ ނެރުން ކަމަށާއި އެކަން ހާސިލްކުރެވުމުން ހިތްހަމަޖެހޭ ކަމަށެވެ.
