މާލޭ ސިޓީ ކައުންސިލްގެ ބާރުތައް މާލޭ ސިޓީގެ މޭޔަރު ކަމަށް އަލަށް އިންތިހާބުވެވަޑައިގެންނެވި ޑރ. މުހައްމަދު މުއިއްޒަށް ބަދަލު ކުރުމުގެ މަރުހަލާ އިއްޔެ ފަށައިފި އެވެ.
މުއިއްޒުގެ އެދިވަޑައިގަތުމަކަށް މާލޭގެ މިހާރުގެ މޭޔަރު ޝިފާ މުހައްމަދު ވަނީ އޭނާއާ އިއްޔެ ބައްދަލު ކުރައްވައިފަ އެވެ. އެ ބައްދަލުވުން ބޭއްވީ އަލަށް ހަވާލުވާ ކައުންސިލުގެ ބާރުތައް ބަދަލު ކުރުމާ ގުޅޭގޮތުން މަޝްވަރާ ކުރުމަށެވެ.
މުއިއްޒު ވިދާޅުވީ ބާރުތައް ބަދަލު ކުރުމަށް ދޭންޖެހޭ އެއްބާރުލުން ސިޓީ ކައުންސިލުން ދެމުން އަންނަ ކަމަށެވެ. އޭނާގެ މަގުސަދަކީ ސިޓީ ކައުންސިން މިހާރު ކުރިއަށްދާ މަސައްކަތްތަކާއި މާލީ ހާލަތު ދެނެގަތުން ކަމަށާއި އެއިރުން ކައުންސިލާ ހަވާލުވާ ފުރަތަމަ ދުވަހު ވެސް މަސައްކަތްތައް ފެށޭނެ ކަމަށް މުއިއްޒު ވިދާޅުވި އެވެ.
"އަދި ކޮމެޓީއެއް ނުނަގަން. އެ ބޭފުޅުން ވިދާޅުވީ ގުޅާނަމޭ ޑޮކިއުމެންޓޭޝަނާއި ޕްރެޒެންޓޭޝަން ފަދަ ކަންކަން ހަމަޖައްސައިފައި،" މުއިއްޒު ވިދާޅުވި އެވެ.
މާލޭ މޭޔަރަކަށް އިންތިހާބުވި ޑރ. މުއިއްޒާއި މާލޭގެ މޭޔަރު ޝިފާ ބައްދަލު ކުރައްވަނީ: ސިޓީ ކައުންސިލްގެ ބާރުތައް ބަދަލު ކުރުމުގެ މަރުހަލާ ވަނީ ފަށައިފައި-- ފޮޓޯ: މުއިއްޒު ޓްވިޓާ
މިއީ މާލޭ ސިޓީގެ މޭޔަރުކަމަށް ވެރިކަން ހިންގާ މޯލްޑިވިއަން ޑިމޮކްރެޓިކް ޕާޓީ ފިޔަވައި އެހެން ޕާޓީއެއްގެ މީހަކަށް ލިބުނު ފުރަތަމަ ފަހަރެވެ. މިފަހަރުގެ އިންތިހާބުގައި މާލޭ ސިޓީ ކައުންސިލްގެ މެޖޯރިޓީ ވެސް ހޯދީ އިދިކޮޅު، ޕްރޮގްރެސިވް ޕާޓީ އޮފް މޯލްޑިވްސްގެ ފަރާތުންނެވެ.
ލާމަރުކަޒީ ގާނޫނަށް އަލަށް ގެނައި އިސްލާހުތަކާއެކު ގިނަ ބާރުތަކެއް ކައުންސިލްތަކަށް ލިބެ އެވެ. އޭގެ ތެރޭގައި މާލީ މިނިވަންކަމާއި އަމިއްލައަށް ޕްރޮޖެކްޓްތައް ހިންގުން ފަދަ ބާރުތައް ހިމެނެ އެވެ.
އިންތިހާބު ކާމިޔާބު ކުރެއްވުމަށް ފަހު މުއިއްޒު ވިދާޅުވީ އޭނާގެ އަމާޒަކީ މާލޭ ރައްޔިތުންނަށް ދިމާވެފައިވާ މައްސަލަތައް ހައްލު ކުރުން ކަމަށެވެ. ބޯހިޔާވަހިކަމަކީ މާލެއަށް ކުރިމަތިވެފައިވާ އެންމެ ބޮޑު މައްސަލައަށް ވާއިރު މަގާމާ ހަވާލުވާ ފުރަތަމަ ދުވަހު ވެސް އެކަން ހައްލު ކުރުމުގެ މަސައްކަތް ފައްޓަވާނެ ކަމަށް މުއިއްޒު ވިދާޅުވި އެވެ.
އިންތިހާބުވި އާ ކައުންސިލަރުން ހުވާ ކުރަން މިހާރު ހަމަޖައްސައިފައިވަނީ ފެށޭ މަހުގެ 18 ވަނަ ދުވަހު އެވެ.
