އިންޑިއާގައި ކޮވިޝީލްޑް ވެކްސިން އުފައްދަން ދަތިވެފައިވާ މައްސަލަ ހައްލު ކުރުމުގެ ގޮތުން ވެކްސިން އުފައްދަން ބޭނުންވާ ސާމާނު އެކްސްޕޯޓު ކުރުމުގެ ހުއްދަ އެމެރިކާއިން ދީފި އެވެ.
އޮކްސްފޯޑް ޔުނިވާސިޓީން ކޮވިޑާ ދެކޮޅަށް ތައްޔާރު ކުރި މި ވެކްސިން އިންޑިއާގައި އުފައްދަނީ ސިރަމް އިންސްޓިޓިއުޓުންނެވެ. އެ ތަނުން ބުނެފައި ވަނީ ވެކްސިނަށް ބޭނުންވާ ބައެއް ތަކެތި އެކްސްޕޯޓް ކުރުން މަނާކޮށްފައި ވާތީ ޕްރޮޑަކްޝަނަށް އަސަރުކޮށްފައިވާ ކަމަށެވެ.
ދެ ވަނަ ރާޅެއްގައި ވަރަށް ބޮޑަށް ހާލަތު ގޯސްވެފައިވާ އިންޑިއާގެ ވެކްސިން ޕްރޮގްރާމްގެ ދުވެލި އަވަސް ނުކުރެވި ވަނީ ވެސް ބޭނުންވާ މިންވަރަށް ވެކްސިން ނުލިބިގެންނެވެ. އެހެންކަމުން އެމެރިކާއިން ނިންމީ މި ދަނޑިވަޅުގައި އެހީވުމުގެ ގޮތުން މަނާކުރި ތަކެތި އެކްސްޕޯޓް ކުރުމުގެ ހުއްދަ ދޭށެވެ.
ވައިޓް ހައުސްއިން ބުނީ އިންޑިއާގެ ކުންފުނިތަކަށް ވެކްސިން ހަދަން ބޭނުންވާ ތަކެތީ ދޭނެ ކަމަށެވެ. ރައީސް ޖޯ ބައިޑެން ވިދާޅުވީ ބަލިމަޑުކަމުގެ ކުރީކޮޅު އިންޑިއާއިން އެމެރިކާއަށް އެހީވި ގޮތަށް އެމެރިކާ އިން ވެސް އިންޑިއާއަށް އެހީވާނެ ކަމަށެވެ.
އެމެރިކާގައި އޮކްސްފޯޑް ވެކްސިނަށް އަދި ހުއްދަ ދީފައި ނުވި ނަމަވެސް، އެ ގައުމުގައި ގިނަ އަދަދެއްގެ މި ވެކްސިން ރައްކާކޮށްފައި އެބަ ހުއްޓެވެ. އިންޑިއާ ހާލުގައި ޖެހިފައިވާ މި ދަނޑިވަޅުގައި އެ ތަކެތި ފޯރުކޮށްދޭން ނިންމާފައި ނުވާތީ އެމެރިކާއަށް ފާޑުކިޔުން އަމާޒުވެ އެވެ. ނަމަވެސް ރިޕޯޓުތައް ބުނާ ގޮތުން އެމެރިކާ ސަރުކާރުން ދަނީ އެކަމާ މެދު ގޮތެއް ނިންމަން ވިސްނަމުންނެވެ.
