ޕެރިސް (އޭޕްރީލް 26) - ފޯރިގަދަ މެޗަކަށް ފަހު ފަހަތުން އަރައި ލިޔޯން 3-2 އިން ބަލިކޮށް ލިލް އިން ފްްރެންޗް ލީގުގެ އެއް ވަނަ އަށް އަލުން ޖެހިލައިފި އެވެ.
ލީގުގައި ރޭ މެޓްޒް އަތުން މޮޅުވެ ޕީއެސްޖީ އެއް ވަނަ އަށް އެރި އެވެ. އަދި މޮނާކޯ އިން މިރޭ ކުރިން ކުޅުނު މެޗުން އެންޖާސް އަތުން މޮޅުވެ ދެ ވަނަ އަށް ޖެހިލިއިރު، ލިލް މެޗަށް ނުކުތީ ލީގުގެ ތިން ވަނައިގައި އޮވެ އެވެ. މޮޅުވެގެން ނޫން ގޮތަކަށް ލިލް އަށް އަލުން އެއް ވަަނަ އަށް އެރެން ނެތުމުން އެ ޓީމު ވަނީ ތަފާތު ހިތްވަރެއް ދައްކައި މެޗުގެ ނަތީޖާ އަނބުރާލައިފަ އެވެ.
ލިލް އިން މިރޭ ހޯދި މޮޅާ އެކު އަލުން އެއް ވަނަ އަށް ޖެހިލީ 34 މެޗުން 73 ޕޮއިންޓް ހޯދައިގެންނެވެ. ޕީއެސްޖީ ދެ ވަނައިގައި އޮތީ 34 މެޗުން 72 ޕޮއިންޓާ އެކު އެވެ. ތިން ވަނައިގައި އޮތް މޮނާކޯ އަށް 34 މެޗުން ލިބިފައިވަނީ 71 ޕޮއިންޓެވެ. އަދި މިރޭ ބަލިވި ލިޔޯން ހަތަރެއްގައި އޮތީ 34 މެޗުން 67 ޕޮއިންޓް ހޯދައިގެންނެވެ.
އަމިއްލަ ދަނޑުގައި ކުޅުނު ލިޔޯނުން ފުރަތަމަ 35 މިނިޓް ތެރޭ ދެ ގޯލުގެ ލީޑެއް ނެގި އެވެ. ލިޔޯނަށް މެޗުގެ 20 ވަނަ މިނިޓްގައި ލީޑުނަގައިދިނީ މެކްސެން ކަކޭރޭ ނެގި ހުރަހަކުން އަލްޖީރިއާގެ ފޯވާޑް އިސްލާމް ސްލިމާނީ އެވެ. މެޗުގެ 35 ވަަނަ މިނިޓްގައި ލިޔޯނުން ލީޑުފުޅާކުރީ ލިލްގެ ޕޯޗުގީސް ޑިފެންޑަރު ހޯސޭ ފޮންޓް އަތުން ބައިކޮޅަށް ވަން ގޯލަކުންނެވެ.
ފުރަތަމަ ހާފުގެ އިތުރު ވަގުތުގައި ލިލް އަށް ކުޅޭ ތުރުކީ ފޯވާޑް ބުރަކް ޔިލްމާޒް ވަނީ ގޯލެއް ޖަހައި އެ ޓީމަށް އުއްމީދެއް ހޯދައިދީފަ އެވެ. ދެ ވަނަ ހާފްގެ ކުޅުން ފެށިގެން 15 މިނިޓް ތެރޭ ޖޮނަތަން ޑޭވިޑް ވަނީ ލިލް އަށް އެއްވަރުކޮށްދިނެވެ.
ބަދަލު ކުޅުންތެރިއެއްގެ ގޮތުގައި ކުޅެން އެރި ޔޫސެފް ޔަަޒީޝީ ދިން ބޯޅައަކުން ލިލް މޮޅުކޮށްދިން ގޯލު ޖެހީ މި ވަގުތު ރަނގަޅު ފޯމެއްގައި ހުރި ޔިލްމާޒް އެވެ.
ލިލްގެ މި މޮޅާ އެކު ފްރާންސް ލީގުގެ ފަހު މެޗުތަކަށްދާއިރު، ލީގުގެ ރޭސް ވަނީ ފޯރިގަދަވެފަ އެވެ. ރޭހުގައި އޮތީ ލިލް އާއި ޕީއެސްޖީ އަދި މޮނާކޯ އެވެ. މީގެއިން ކޮންމެ ޓީމަކަށް ވެސް ބާކީ އޮތީ ހަތަރު މެޗެވެ.
