ކޮވިޑުގެ ހާލަތު މާ ބޮޑަށް ގޯސްވުމުގެ ސަބަބުން ފަރުވާއަށް ބޭނުންވާ ސަޕްލައި ހުސްވެފައިވާ އިންޑިއާއަށް އެމެރިކާއިން އެހީ ފޯރުކޮށްދޭން ނިންމައިފި އެވެ.
އެމެރިކާގެ ސެކެޓްރީ އޮފް ސްޓޭޓް އެންތަނީ ބްލިންކެން އާއި ވައިޓް ހައުސްގެ ނޭޝަނަލް ސެކިއުރިޓީ އެޑްވައިޒަރު ޖޭކް ސަލިވަން މިއަދު ވިދާޅުވީ އެމެރިކާގެ އެހީ އިންޑިއާއަށް ލިބޭނެ ކަމަށެވެ.
ސަލިވަން ވިދާޅުވީ އެމެރިކާއިން "ވަރަށް ކަންބޮޑުވެފައިވާ" ކަމަށާއި އެ ހާލަތުން އަރައިގަތުމަށް އިންޑިއާއަށް އެހީވުމަށް "މެދުކެނޑުމެއް ނެތި" މަސައްކަތް ކުރަމުންދާ ކަމަށެވެ.
ބްލިންކެން ވިދާޅުވީ އިންޑިއާ ސަރުކާރާއެކު ގާތުން މަސައްކަތް ކުރަމުންދާ ކަމަށާއި އިންޑިއާގެ ރައްޔިތުންނާއި "ސިއްހީ މަސައްކަތުގައި އުޅޭ ބަތަލުންނަށް" އިތުރު އެހީ ވަރަށް އަވަހަށް ފޯރުކޮށްދޭނެ ކަމަށެވެ.
މިދިޔަ ހުކުރު ދުވަހު އިނގިރޭސި ވިލާތުގެ ބޮޑު ވަޒީރު ބޮރިސް ޖޯންސަން ވެސް ވިދާޅުވީ އިންޑިއާއަށް އެހީތެރިވެވޭނެ ގޮތްތައް ބަލަމުންދާ ކަމަށެވެ.
މާޗް މަހުން ފެށިގެން އިންޑިއާގައި ހާލަތު ކުއްލިއަކަށް ގޯސްވީ އާ ވޭރިއެންޓެއްގެ އިތުރުން ރައްކާތެރިކަމުގެ ފިޔަވަޅުތަކަށް ސަމާލުކަން ނުދީ އެތައް މިލިއަން ބަޔަކު އުޅުމުންނެވެ.
މިހާރު ކޮންމެ ދުވަހަކު ވެސް ތިން ލައްކަ އަށް ވުރެ ގިނަ މީހުން ޕޮޒިޓިވްވެ އެވެ. އަދި ދެ ހާހަށް ވުރެ ގިނަ މީހުން މަރުވެ އެވެ. އަދަދުތައް މާ މަތިވުމުން ފަރުވާ ދޭން ބޭނުންވާ އޮކްސިޖަން ހުސްވެ، ހޮސްޕިޓަލުތަކުން ވަނީ އެހީއަށް އެދިފަ އެވެ.
