ކުރިން ޖައްވަށް ދަތުރުކޮށްފައިވާ އުޅަނދެއްގެ ރޮކެޓް ބޫސްޓަރު ދެ ވަނަ ފަހަރަށް ބޭނުންކޮށްގެން ނުވަތަ ރީސައިކަލްކޮށްގެން ހަތަރު އެސްޓްރޮނޮޓުން ޖައްވަށް ދަތުރުކޮށްފި އެވެ.
ރީސައިކަލްކޮށްފައިވާ ކެޕްސޫލެއްގައި ފުރަތަމަ ފަހަރަށް ޖައްވަށް ދިޔެ މީހުން މިހާރު ވަނީ އިންޓަނޭޝަނަލް ސްޕޭސް ސްޓޭޝަން (އައިއެސްއެސް) އަށް ފައިބާފަ އެވެ. އެމީހުން ދަތުރު ކުރީ ސްޕޭސް އެކްސްގެ ކްރޫ ޑްރެގަން ކެޕްސޫލް އެންޑެވާ ގަ އެވެ.
އެ ދަތުރުގައި ޖައްވަށް ދިޔެއީ އެމެރިކާ، ޖަޕާން އަދި ފްރާންސަށް ނިސްބަތްވާ ތިން ފިރިހެނުންނާއި އެއް އަންހެނެކެވެ. އެ ދަތުރު ނިންމާ އައިއެސްއެސްއަށް ފޭބުމަށް 23 ގަޑިއިރު ހޭދަވި އެވެ.
ކެޕްސޫލް އެންޑެވާއަކީ މިދިޔަ މޭ މަހު ސްޕޭސް އެކްސްއިން އަލަށް ޖައްވަށް ކުރި ދަތުރުގައި ވެސް ބޭނުންކުރި ކެޕްސޫލެވެ.
އޭގައި ހަތަރު އެސްޓްރޮނޮޓުން ޖައްވަށް ދިޔުމާއެކު މި ވަގުތު ދުނިޔެ ވަށާ ބުރު ޖަހަމުން އައިއެސްއެސް ލެބޯޓަރީގައި ޖުމްލަ 11 މީހުން އެބަ ތިއްބެވެ. މިއީ ގިނަ އަހަރުތަކަކަށް ފަހު މިހާ ގިނަ އަދަދެއްގެ އިންސާނުން އެއް ފަހަރާ ޖައްވުގައި ތިބި ފަހަރެވެ.
އެހެންކަމުން އައިއެސްއެސްގައި އެސްޓްރޮނޮޓުން އުފާ ފާޅުކޮށް ހަދާ މަންޒަރު ފެންނަ ވީޑިއޯ އެމެރިކާގެ ޖައްވީ އިދާރާ، ނާސާއިން އާއްމުކުރި އެވެ.
