ޕެރިސް (އޭޕްރީލް 25) - ފްރެންޗް ލީގުގައި މިރޭ މެޓްޒް އަތުން 3-1 އިން މުހިއްމު މޮޅެއް ހޯދައި ޕީއެސްޖީން ލީގު އެއް ވަނަ އަށް އަރައި ހިތްހަމަޖެހުމެއް ހޯދި މެޗަށް އެ ޓީމުގެ ތަރި ކީލިއަަން އެމްބާޕޭގެ އަނިޔާގެ ހިޔަނި އެޅިއްޖެ އެވެ.
އުމުރުން 22 އަހަރުގެ އެމްބާޕޭ ވަނީ މިރޭގެ މެޗުގައި ދެ ގޯލު ޖަހައިފަ އެވެ. އެކަމަކު މެޗުގެ 87 ވަނަ މިނިޓްގައި އޭނާގެ ފަލަމަސްގަނޑަށް އަނިޔާވެގެން ބަދަލުކުރި އެވެ. ޕީއެސްޖީން މި ހަފްތާގައި ޗެމްޕިއަންސް ލީގުގެ ސެމީ ފައިނަލުގައި މެންޗެސްޓާ ސިޓީއާ ދެކޮޅަށް ނުކުންނާނެ އެވެ.
ޕީއެސްޖީގެ ކޯޗު މައުރީސިއޯ ޕޮޗެޓީނޯ ބުނީ އެމްބާޕޭ އަށް ލިބުނު އަނިޔާ ސީރިއަސްވާނެ ކަމަށް ނުބެލެވޭ ކަމަށާއި އެކަމަކު ސީދާ އެއްޗެއް ބުނެވޭނީ ޓެސްޓްތަކެއް ހެދުމަށް ފަހު ކަމަށެވެ.
މިރޭގެ މޮޅާ އެކު ޕީއެސްޖީ ލީގުގެ އެއް ވަނަ އަށް އެރީ 34 މެޗުން 72 ޕޮއިންޓާ އެކު އެވެ. ދެ ވަނައިގައި އޮތް ލިލް އަށް 33 މެޗުން 70 ޕޮއިންޓް ލިބިފައިވާއިރު، މާދަމާރޭ ލީގުގެ ހަތަރެއްގައި އޮތް ލިޔޯން ބަލިކޮށްގެން ލިލް އަށް އަލުން އެއް ވަަނަ އަށް އެރޭނެ އެވެ.
ޕީއެސްޖީ އަށް މިރޭގެ މެޗުގައި ލީޑުނަގައިދިން ގޯލު އެމްބާޕޭ ކާމިޔާބުކުރީ މެޗުގެ ހަތަރު ވަނަ މިނިޓްގައި އެންޑަ ހެރޭރާ ދިން ބޯޅައަކުންނެވެ. ދެ ވަނަ ހާފްގެ ކުޅުން ފެށިތަނުން ބޮލުން ގޯލެއް ޖަހައި މެޓްޒްގެ ފަބިއަން ސެންޓޯޒް އެ ޓީމަށް ނަތީޖާ ހަމަހަމަކޮށްދިނެވެ. ޕީއެސްޖީން ދެ ވަނަ ފަހަރު ލީޑުނެގީ 59 ވަނަ މިނިޓްގައި އެމްބާޕޭ ކާމިޔާބުކުރި ގޯލުންނެވެ.
މެޗުގެ ފަހު މިނިޓްގައި ޕީއެސްޖީގެ ތިން ވަނަ ގޯލު ޖެހީ ޕެނަލްޓީ އަކުން މައުރޯ އިކާޑީ އެވެ. އެ ޕެނަލްޓީ ހޯދީ ވެސް އިކާޑީ އެވެ. އިކާޑީ ކުޅެން އެރީ ދެ ވަނަ ހާފުގައި ބަދަލު ކުޅުންތެރިއެއްގެ ގޮތުގަ އެވެ.
