ހުޅުމާލޭގައި ހުންނަ އެސްޓީއޯގެ ކާޑު ގުދަނުގައި ކާޑު ބަސްތާތަކެއް ދަށުވެ ތިން މީހަކަށް އަނިޔާވެއްޖެ އެވެ.
އެސްޓީއޯގެ މީޑިއާ އޮފިޝަލް "އަދަދު" އަށް ވިދާޅުވީ މިއަދު މެންދުރު ކުރީގައި އެ ހާދިސާ ހިނގީ ކާޑު އުފުލަން އުޅުމުގެ ތެރޭގައި ބަސްތާތަކެއް ފުރޮޅާލައިގެން ކަމަށެވެ. އެ ހާދިސާގައި އަނިޔާވި ތިން މީހުންނަށް ހުޅުމާލޭ ހޮސްޕިޓަލުގައި އަންނަނީ ފަރުވާ ދެމުންނެވެ.
ނަމަވެސް އެ މީހުންގެ ހާލަތާ ގުޅޭ ތަފްސީލެއް އަދި ނުލިބެ އެވެ.
މީޑިއާ އޮފިޝަލް ވިދާޅުވީ އެ ހާދިސާ ހިނގަން މެދުވެރިވި ގޮތް ބަލަމުން އަންނަ ކަމަށެވެ.
އެ ހާދިސާގައި އަނިޔާވީ ތިން ބިދޭސީންނަށެވެ. އެސްޓީއޯ ކާޑު ގުދަންތަކުގައި ކާޑު އުފުލުމަށް ގިނައިން މަސައްކަތް ކުރަނީ ވެސް ބިދޭސީންނެވެ.
