ފާއިތުވި ދިހަ މަސް ތެރޭގައި ފުރަތަމަ ފަހަރަށް، މިދިޔަ ބުރާސްފަތި ދުވަހު އިޒްރޭލުގައި ކޮވިޑް ޖެހިގެން އެއްވެސް މީހަކު މަރުވެފައި ނުވާ ކަމަށް ތަފާސްހިސާބުން ދައްކައިފި އެވެ.
އެ ގައުމުގެ ހެލްތު މިނިސްޓްރީގެ ތަފާސްހިސާބުން ދައްކާ ގޮތުގައި ޖުމްލަ މަރުވެފައިވާ މީހުންގެ އަދަދަކީ 6،346 އެވެ. ބުރާސްފަތި ދުވަހު މި ބަލީގައި މީހަކު މަރުވެފައި ނުވާތީ ޖުމްލަ އަދަދަށް ބަދަލެއް ނާދެ އެވެ.
މިދިޔަ އަހަރު ލޮކްޑައުން ކުރުމަށް ފަހު ޖޫން މަހުގެ ތެރޭގައި ވެސް އިޒްރޭލުގައި ދުވާލެއްގެ މައްޗަށް ރިކޯޑު ކުރަމުން ދިޔައީ ސުން މަރެވެ. ނަމަވެސް އޭގެ ފަހުން ކޮންމެ ދުވަހަކު މީހުން މަރުވެ އެވެ.
އިޒްރޭލުގައި ކޮވިޑުގެ ބަލިމަޑުކަން "ޕީކަށް" އެރީ ޖެނުއަރީ ގަ އެވެ. އެއަށް ފަހު ވެކްސިން ދިނުމުގެ ޕްރޮގްރާމު ކާމިޔާބުކަމާ އެކު ހިނގަން ފެށުމުން އަދަދުތައް ދަށް ވާން ފެށި އެވެ.
އާބާދީގެ ނިސްބަތުން އެންމެ ގިނަ މީހުން ވެކްސިން ފުރިހަމަކޮށްފައިވާ ގައުމަކީ އިޒްރޭލެވެ. މިދިޔަ ބުރާސްފަތި ދުވަހާ ހަމައަށް ދިޔައިރު ފަސް މިލިއަން މީހުންނަށް ވެކްސިން ޖަހާފައި ވެއެވެ.
އެ ގައުމުގެ ހެލްތު މިނިސްޓްރީން ބުނީ ޖުމްލަ އާބާދީ ކަމަށްވާ ނުވަ މިލިއަން މީހުންގެ 53 ޕަސެންޓް ވެކްސިނުގެ ދެ ޑޯޒް ފުރިހަމަކޮށްފައިވާ ކަމަށެވެ.
އިޒްރޭލުގެ ރައްޔިތުންނަށް ދެނީ ހަމައެކަނި ފައިޒާއިން އުފެއްދި ދެ ޑޯޒް ޖަހަން ޖެހޭ ކޮވިޑް ވެކްސިން.
"މިއީ ސިއްހީ ނިޒާމަށާއި އިޒްރޭލުގެ ރައްޔިތުންނަށް ލިބުނު ބޮޑު ކާމިޔާބެއް. އަޅުގަނޑުމެން އެންމެން އެކުގައި ކޮރޯނާވައިރަސް ނައްތާލުމުގެ މަސައްކަތް މި ކުރަނީ،" ހެލްތު މިނިސްޓަރު ޔޫލީ އެޑެލްސްޓައިން އިއްޔެ ޓްވީޓު ކުރެއްވި އެވެ.
އިޒްރޭލުގެ އެންމެ ބޮޑު ހޮސްޕިޓަލް، ޝިބާ މެޑިކަލް ސެންޓަރުގެ ޑިރެކްޓަރު އިޔާލް ލެޝެމް މިދިޔަ ހަފްތާގައި ވިދާޅުވީ އެ ގައުމުން "ހާޑް އިމިއުނިޓީއަށް" ވާސިލްވުމާ ވަރަށް ގާތްވެފައިވާ ކަމަށެވެ.
"ހާޑް އިމިއުނިޓީ" އަކީ އާބާދީގެ ބޮޑު ބަޔެއް ވައިރަހާ ދެކޮޅަށް ރައްކާތެރިކަން ހޯދުމުން، އެ ފެތުރުން ހުއްޓޭ ހުއްޓުމަށް ކިޔާ ނަމެކެވެ.
ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) ގެ ތަޖުރިބާކާރުން ބުނީ "ހާޑް އިމިއުނިޓީ" އަށް ވާސިލްވެވޭނީ އާބާދީގެ 70-65 ޕަސެންޓު މީހުންނަށް ވެކްސިން ދީ ނިންމުމުން ކަމަށެވެ.
ލެޝެމް ވިދާޅުވީ އިޒްރޭލްގެ ކޭސްތައް މަދުވެ، ފިޔަވަޅުތައް އުވާލަމުން ދާއިރު ވެސް އަދަދު މަތި ނުވުމަކީ "އިމިއުނިޓީ" ލިބެމުންދާ ކަމުގެ ހެއްކެއް ކަމަށެވެ.
ރައްކާތެރިކަމުގެ ފިޔަވަޅު އުވާލާ، ދިރިއުޅުން "ނޯމަލްވުމުން" ވެސް ކޭސްތައް ދަނީ މެދުކެނޑުމެއް ނެތި ވެއްޓެމުން. މީގެން އަންގައިދެނީ މީހަކަށް ބަލި ޖެހިފައި ހުރި ނަމަވެސް، އޭނާއާ ބައްދަލުވާ ގިނަ މީހުންނަށް ބަލި ޖެހުމުގެ ފުރުސަތު ނޯންނަކަން. -- ޝިބާ މެޑިކަލް ސެންޓަރުގެ ޑިރެކްޓަރު އިޔާލް ލެޝެމް
އިޒްރޭލުގައި ވެކްސިން ޕްރޮގްރާމް ފެށީ މިދިޔަ ޑިސެމްބަރު މަހު އެވެ. ޕްރޮގްރާމު ފެށުމާއެކު އާބާދީގެ ނިސްބަތުން ވެކްސިން ދިނުމުގައި އެންމެ ކުރީގައި އުޅެނީ އެ ގައުމެވެ.
އިޒްރޭލުގައި މިހާތަނަށް ދީފައި ވަނީ ހަމައެކަނި ފައިޒާގެ ދެ ޑޯޒް ޖަހާ ވެކްސިނެވެ. މިދިޔަ ފެބްރުއަރީ މަހު އިޒްރޭލުގެ ހެލްތު މިނިސްޓްރީން ދިރާސާތަކާ ހަވާލަދީ ބުނީ ދެ ޑޯޒް ފުރިހަމަކޮށްފައިވާ މީހުން ބަލިވުމުގެ ފުރުސަތު 95.8 ޕަސެންޓަށް ކުޑަވެފައިވާ ކަމަށެވެ.
އެ ގައުމުން މިހާރު ތައްޔާރުވަމުން ދަނީ އެމެރިކާގެ ފުޑް އެންޑް ޑްރަގް އެޑްމިނިސްޓްރޭޝަނުން ހުއްދަ ދިނުމާއެކު އުމުރުން 15-12 އަހަރުގެ ކުދިންނަށް ވެކްސިން ދިނުމަށެވެ.
