މެންޗެސްޓާ (އޭޕްރީލް 23) - މެންޗެސްޓާ ޔުނައިޓެޑްގެ ޓްރެއިނިން ދަނޑަށް ވަދެ ހަޅުތާލުކުރި ސަޕޯޓަރުންގެ ބަޔަކާ ވާހަކަ ދައްކައި ޔުނައިޓެޑްގެ ކޯޗު އޮލެ ގުނަ ސޯލްޝެއާ އެ މައްސަލަ ހައްލުކޮށްފި އެވެ.
މައްސަލަ ބޮޑުވެފައިވާ ޔޫރަޕިއަން ސުޕަ ލީގުގައި ޔުނައިޓެޑުން އެންމެ ފުރަތަމަ ބައިވެރިވި މައްސަލައިގައި ކުރިއަށް ވުރެ ބޮޑަށް ސަޕޯޓަރުންގެ ނުރުހުން ޔުނައިޓެޑްގެ ވެރިން ކަމަށްވާ އެމެރިކާގެ ގްލޭޒާ އާއިލާ އަށް ވަނީ އަމާޒުވެފަ އެވެ. ޔުނައިޓެޑްގެ ސަޕޯޓަރުން އަންނަނީ މިއީ ގްލޭޒާ އާއިލާ އިން ޔުނައިޓެޑް ވިއްކާލަން ޖެހޭ ވަގުތު ކަމަށް ބުނެ ޝުއޫރުފާޅުކުރަމުންނެވެ.
އެ ގޮތުން ބުރާސްފަތި ދުވަހު ޔުނައިޓެޑްގެ ސަޕޯޓަރުންތަކެއް ވަނީ ބެނާއެއް ހިފައިގެން އެ ޓީމުގެ ޓްރެއިނިން ދަނޑަށް ވަދެ ހަޅުތާލުކޮށްފަ އެވެ. ޔުނައިޓެޑުން ނެރުނު ބަޔާނެއްގައި ބުނެފައިވަނީ ޓްރެއިނިން ދަނޑަށް ވަން ސަޕޯޓަރުންނާ ވާހަކަ ދައްކައި މައްސަލަ ހައްލުކުރުމުގައި ސޯލްޝެއާ ވެސް ބައިވެރިވި ކަމަށެވެ. ސޯލްޝެއާއާ އެކުގައި އެސިސްޓަންޓް ކޯޗު މައިކަލް ކެރިކް އާއި ޓެކްނިކަލް ޑިރެކްޓަރު ޑަރެން ފްލެޗާ އަދި އެ ޓީމުގެ މިޑްފީލްޑަރު ނަމަންޏާ މަޓިޗް ވެސް ބައިވެރިވި އެވެ.
ޔުނައިޓެޑްގެ ސަޕޯޓަރުން ޓްރެއިނިން ދަނޑުގައި ބެނާ ހިފައިގެން.
"ސަޕޯޓަރުންގެ ޝަކުވާތައް ގިނަ. އެކަމަކު އެ ގޮތަށް ސަޕޯޓަރުން ޓްރެއިނިން ދަނޑު ތެރެއަށް ވަނުން އެންމެ ރަނގަޅެއް ނުވާނެ. އެހެންވެ އެ ވާހަކަތައް އަހަރެމެން ސަޕޯޓަރުންނަށް ހިއްސާކުރީ،" ނޯވޭގެ ޓީވީ ޗެނަލަކަށް ސޯލްޝެއާ ބުންޏެވެ.
ސުޕަ ލީގުން ޔުނައިޓެޑް ވަކިވާން ނިންމުމާ ގުޅިގެން އެކަމާ ހިތްހަަމަނުޖެހި ޔުނައިޓެޑްގެ ވައިސް ޗެއާމަން އެޑް ވުޑްވާޑް ވަނީ މަގާމުން އިސްތިއުފާ ދޭން ނިންމައިފަ އެވެ. ޔުނައިޓެޑްގެ ގިނަ ސަޕޯޓަރުންގެ ނުރުހުން އަމާޒުވެފައިވާ ވުޑްވާޑް ވަކިވުމުން ހިތްހަމަޖެހޭ އެ ކްލަބްގެ ގިނަ ސަޕޯޓަރުންތަކެއް އެބަތިއްބެވެ. މިދިޔަ އަހަރުގެ ޖެނުއަރީ މަހު ޔުނައިޓެޑްގެ ސަޕޯޓަރުންގެ ބަޔަކު ވަނީ ވުޑްވާޑް ދިރިއުޅޭ ގެޔަށް ވެސް ހަމަލާދީފަ އެވެ.
މީގެ 15 އަހަރު ކުރިން 2005 ވަަނަ އަހަރު ގްލޭޒާ އާއިލާ އިން ޔުނައިޓެޑް ގަތުމަށް ފަހު އެ ކްލަބުން ލިބޭ އާމްދަނީ ޓީމަށް އެހާ ބޮޑަށް ހަރަދުނުކުރާ ކަމުގެ ވާހަަކަތައް އަބަދު ވެސް އިނގިރޭސި މީޑިއާގައި ދެކެވެ އެވެ. ޔުނައިޓެޑް ގަންނަން އެކި މަހުޖަނުން މީގެ ކުރިން ޝައުގުވެރިކަން ފާޅުކުރި ނަމަވެސް ގްލޭޒާ އާއިލާ އިން އެ ގޮތަށް ބޭނުމެއް ނުވިއިރު، އެ މީހުން ވަނީ އަހަރުން އަހަރަށް ކްލަބްގެ މެޖޯރިޓީ ހިއްސާގެ ޕަސެންޓް ވެސް އިތުރުކޮށްފަ އެވެ.
