އަނިޔާވެރި ގޮތަކަށް ބްލޮގާ ޔާމީން ރަޝީދު މަރާލި މައްސަލާގައި އަޑީގައި ތިބި ބަޔަކު ހޯދުމުގެ މަސައްކަތް މިހާރު ވެސް ކުރަމުންދާ ކަމަށް މަރާލާފައިވާ މީހުންނާއި ގެއްލުވާލާފައިވާ މީހުންގެ މައްސަލަތައް ބަލާ ކޮމިޝަނުން ބުނެފި އެވެ.
ބަޔަކު ތޫނު އެއްޗަކުން ދިން ހަމަލާތަކަކާ ގުޅިގެން ޔާމީން ރަޝީދު މަރުވިތާ މިއަދަށް ވަނީ ހަތަރު އަހަރު ފުރިފަ އެވެ. މި މައްސަލާގައި އަމަލީ ގޮތުން ހަރަކާތްތެރިވި މީހުން ކަމަށް ތުހުމަތުވާ މީހުންގެ ޝަރީއަތް ކުރިމިނަލް ކޯޓުގައި ހިނގާތާ އަހަރުތަކެއްވީ ނަމަވެސް، އަދި މައްސަލާގެ ހުކުމާއަށް ވާސިލެއް ނުވެވެ އެވެ.
ރައީސް އިބްރާހިމް މުހައްމަދު ސޯލިހު އުފެއްދެވި، ރިޔާސީ ކޮމިޝަންގެ އެންމެ މުހިންމު މައްސަލަތަކުގެ ތެރޭގައި ޔާމީން ރަޝީދުގެ މަރުގެ މައްސަލައިގެ ފައިލް އޮތް ނަމަވެސް، އެ ކޮމިޝަނުން ވެސް މިހާތަނަށް އެ މަރާ ގުޅޭ ތަހުގީގުގައި މާބޮޑު ކުރިއެރުމެއް ލިބުނު ކަމެއް ހާމަކޮށްފައެއް ނުވެ އެވެ.
އެހެންވެ، އާއިލާއިން ވަނީ ޔާމީން ރަޝީދަށް އިންސާފު ލިބުން ލަސްވާ ކަމުގެ ކަންބޮޑުވުން ފާޅުކޮށްފަ އެވެ.
ޔާމީންގެ މަރަށް ހަތަރު އަހަރު ފުރުމާ ގުޅިގެން ކޮމިޝަނުން މިއަދު ނެރުނު ބަޔާނެއްގައި ބުނި ގޮތުގައި، ޔާމީން ރަޝީދުގެ މައްސަލާގައި ކުރިއަށްދާ ޝަރީއަތް ހިނގަމުންދާ ގޮތް އެ ކޮމިޝަނުން ބަލަމުންދާ ކަމަށެވެ. އަދި، ހިނގަމުންދާ ޝަރީއަތަށް އެއްވެސް ނުފޫޒެއް ނުފޯރާ ގޮތަށް މަރުގެ އަޑީގައި ތިބި ބައެއް ހޯދުމުގެ މަސައްކަތް ކުރަމުންދާ ކަމަށެވެ.
އެހެން ކޮމިޝަނުން ބުނު ނަމަވެސް، އެކަމުގައި އެއްވެސް ކުރިއެރުމެއް ލިބިފައިވާ ކަމެއް ނުވަތަ ނޫން ކަމެއް ބަޔާނުގައި ފާހަގަކޮށްފައެއް ނެތެވެ.
ދެން ކޮމިޝަނުން ބުނެފައި އޮތީ، މިހާރު ހިނގަމުންދާ ޝަރީއަތް ވީހާވެސް އަވަހަކަށް ނިމި، ޔާމީން ރަޝީދަށް އިންސާފު ލިބުމަށް އެ ކޮމިޝަނުން ވެސް އެދޭ ކަމަށެވެ.
"ޔާމީން ރަޝީދު ނެތުމުން އާއިލާއަށާއި ރަހުމަތްތެރިންނަށް ލިބިފައިވާ ފުން ހިތާމާގައި މި ކޮމިޝަނުން ބައިވެރިވަން،" ބަޔާނުގައިވެ އެވެ.
ޔާމީން ރަޝީދުގެ މަރާލި ކަމުގެ ދައުވާ އުފުލާފައިވަނީ، މ. އަންނާރުމާގޭ އިސްމާއީލް ހައިޝަމް ރަޝީދާއި މ. ކޮޅުފުށީ އީސްޓް، ހުސައިން ޒިޔާދާއި މ. ތާއިފް، އިސްމާއީލް ރަޝީދާއި މ. ކުދެހިގޭ، ހަސަން ޝިފާޒާއި، ގދ. ގައްދޫ ސިންދުބާދުގޭ މުހައްމަދު ދިފްރާން އަދި، މ. އިރާސްމިކުގެ އަހުމަދު ޒިހާން އިސްމާއީލްގެ މައްޗަށެވެ.
އެމީހުންނާ ދެކޮޅު ޝަރީއަތުގައި ފުންނާބު ގިނަ ވަކީލުންތަކެއް ދިފާއީ ވަކީލުންގެ ގޮތުގައި ހާޒިރުވާއިރު، ވަކީލުންގެ އަމަލުތަކާ ހެދި، ޝަރީއަތް ލަވަސްވަމުންދާކަން ކުރިމިނަލް ކޯޓުން ވެސް ފާހަގަކުރެ އެވެ. އެ މައްސަލާގައި ތާވަލެއް ހަދައި ޝަރީއަތުގެ އަޑުއެހުންތައް ކަނޑައަޅައި، 2019 ވަނަ އަހަރަށް ނިންމާލަން ވެސް މަސައްކަތްކުރި އެވެ. ނަމަވެސް، އެކިއެކި ސަބަބުތަކާ ހުރެ އަދިވެސް ހެކިންގެ ހެކި ބަސް ނެގުމުގެ މަރުހަލާ ވެސް ނިންމާނުލެވެ އެވެ.
މައްސަލާގެ އަޑުއެހުމެއް ނުބާއްވާތާ މިހާރު ވަނީ ދުވަސްކޮޅެއް ވެފަ އެވެ.
