އެމެރިކާގެ ފާމަސޫޓިކަލް ކުންފުނި ފައިޒާއިން ކޮވިޑާ ދެކޮޅަށް އުފެއްދި ވެކްސިނުގެ ފޭކު އުފެއްދުންތައް މެކްސިކޯ އާއި ޕޮލޭންޑުން ފެނިއްޖެ އެވެ.
އެ ދެ ގައުމުގެ ކަމާ ބެހޭ އިދާރާތަކުން ވަނީ ގިނަ އަދަދެއްގެ ފޭކު ވެކްސިން އަތުލައިގަނެފަ އެވެ. އެ ތަކެތި ޓެސްޓު ކުރިއިރު، ފޭކުކަން ވަނީ ޔަގީން ކުރެވިފަ އެވެ.
މެކްސިކޯގައި ފައިޒާ ވެކްސިނުގެ ލޭބަލް ޖަހައިގެން ވިއްކަމުން ދަނީ ބަޔަކު އަމިއްލައަށް އުފައްދާފައިވާ ވެކްސިނެކެވެ. އަދި ޕޮލޭންޑުގައި ފައިޒާ ވެކްސިން ކަމަށް ހަދައިގެން ވިއްކަނީ ހަމަށް ރޫ ޖެހުން ފިލުވުމަށް ބޭނުން ކުރާ އެއްޗެކެވެ.
ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ބުނީ ފޭކު ވެކްސިން ވިއްކުމަކީ ދުނިޔެއަށް ސީރިއަސް ސިއްހީ ނުރައްކަލެއް ކުރިމަތިވެދާނެ ކަމެއް ކަމަށެވެ.
އެފަދަ ވެކްސިން ދެނެގަނެ، ބާޒާރުތަކުން ނެގުމަށް އެ ޖަމިއްޔާއިން ގޮވާލާފައި ވެއެވެ.
ޕޮލޭންޑުގެ ހެލްތު މިނިސްޓަރު ވިދާޅުވީ އެ ގައުމުގައި ވިއްކި ފޭކު ވެކްސިނުގެ ސަބަބުން އާއްމު ސިއްހަތަށް ނުރައްކަލެއް ނެތް ކަމަށެވެ.
މެކްސިކޯގައި މަދުވެގެން 80 މީހުންނަށް ފޭކު ވެކްސިން ދިން އިރު، އޭގެން ގެއްލުމެއް ވެފައެއް ނުވެ އެވެ. ނަމަވެސް އޭގެން ކޮވިޑާ ދެކޮޅަށް ރައްކާތެރިކަމެއް ނުލިބެ އެވެ.
ފައިޒާއިން ބުނީ ވެކްސިނުގެ ސަޕްލައިއަށް ވުރެ ޑިމާންޑު މަތިވުމުން ފޭކު އުފެއްދުންތައް ފެންނަމުންދާ ކަމަށާއި ސަޕްލައި އިތުރު ކުރުމުގެ މަސައްކަތް ކުރާ ކަމަށެވެ.
