މިދިޔަ ހުކުރު ދުވަހު މާލޭ މަގުމަތިން އަންހެނަކު ޖަހައިގަނެ، އޭނާ ގަދަކަމުން ގެއަކަށް ވައްދައި ރޭޕް ކުރުމުގެ ތުހުމަތުގައި ހައްޔަރު ކުރި ދެ މީހުންގެ ބަންދު ކްރިމިނަލް ކޯޓުން މިއަދު އިތުރުކޮށްފި އެވެ.
އެ މައްސަލައިގައި، މާރާމާރީ އާއި މީހަކު ވަގަށް ނެގުމާއި ރޭޕް ކުރުމުގެ ތުހުމަތުގައި ފުލުހުން ހައްޔަރު ކޮށްފައި ވަނީ ހދ. ނޭކުރަންދޫ، ވިނަރެސް، އާދަމް ވިޝާން، 18، އާއި ހދ. ވައިކަރަދޫ، މިލާފަރު، އަލީ ރަޝީދު، 23، އެވެ.
މިދިޔަ ހުކުރު ދުވަހު ހައްޔަރު ކުރި އެ ދެ މީހުންގެ ބަންދުގެ މުއްދަތު މިއަދު ހަމަވުމުން ކޯޓަށް ގެންދިއުމުން އެ ދެ މީހުންގެ ބަންދަށް ވެސް 10 ދުވަސް ވަނީ އިތުރުކޮށްފަ އެވެ.
އެނގިފައިވާ ގޮތުގައި އަލީ ރަޝީދާއި ވިޝާނަކީ ކުށްކުރުމުގެ މާހައުލަކުން ބޮޑުވެފައިވާ އާއިލީ ގުޅުން އޮންނަ ދެ މީހުންނެވެ. ވައްކަމުގެ ގިނަ މައްސަލަތަކެއްގައި އެ ދެ މީހުން ބައިވެރިވެފައިވާކަން އެނގިފައިވެ އެވެ.
އަދި ވިޝާނުގެ ބައްޕަ، ހދ. ނޭކުރަންދޫ، ވިނަރެސް، ހަސަން ވަހީދަކީ ކުޑަކުއްޖަކާ ބެހިގެން 10 އަހަރަށް ޖަލަށްލާފައިވާ މީހެކެވެ.
ވިޝާނުގެ ބައްޕަ ހަސަން ވަހީދު: މީނާ އަށް ވަނީ ކުޑަކުއްޖަކާ ބެހިގެން 10 އަހަރަށް ޖަލު ހުކުމެއް އައިސްފައި. -- ފޮޓޯ: ސެކްސް އޮފެންޑާސް އެމްވީ
މި މައްސަލައިގަ ކަން ހިނގާފައިވާ ގޮތުން ވަރަށް ގިނަ އާންމުންގެ ސަމާލުކަން ވަނީ މި ކުށަށް ހުއްޓިފަ އެވެ. އަދި ފަހުން، މާލޭގެ މަގުމަތިން، ކައިރީގައި މީހުން ވެސް ތިއްބާ، އެއްވެސް ބެލުމެއް ނެތި އަންހެން މީހާ ޖަހައިގަނެގެން ގެންދާ މަންޒަރު ފެންނަ ވީޑިއޯއެއް ވެސް ވަނީ އާންމުވެފަ އެވެ.
