މާފުއްޓާއި ހިންމަފުށީ ޖަލުގެ އޮފިސަރުންތަކެއް ކޮވިޑް-19 އަށް ޕޮޒިޓިވްވުމުން، ގައިދީންނަށް ބަލި ޖެހިފައިވޭތޯ ބަލަން ސާމްޕަލް ނަގަން ފަށައިފި އެވެ.
މޯލްޑިވްސް ކަރެކްޝަނަލް ސާވިސްގެ އޮފިޝަލަކު މިއަދު ވިދާޅުވީ ފުރަތަމަ ޕޮޒިޓިވްކަން އެނގުނީ ހިންމަފުށީ އައްސޭރި ޖަލުގެ އޮފިސަރަކާއި ފާމަސިސްޓެއް ކަމަށެވެ. އޭގެފަހުން މާފުށީ ޖަލުގެ ދެ އޮފިސަރަކު ވެސް ވަނީ ޕޮޒިޓިވްވެފަ އެވެ.
މާފުށީ ޖަލުގެ އޮފިސަރެއް ޕޮޒިޓިވްވިއިރު އެ ރަށުގައި އޮތީ ބަލި ފެތުރިފަ އެވެ. އެޗްޕީއޭ އިން ވަނީ އެ ރަށް މޮނީޓަރިންއަށް ވެސް ލައިފަ އެވެ.
އޮފިޝަލް ވިދާޅުވި ގޮތުގައި ދެ ޖަލުގައި ވެސް ހުކުމްތަންފީޒުކުރަމުން އަންނަ ގައިދީންނަށް ބަލި ފެތުރިފައިވޭތޯ ބަލަން މިހާރު އަންނަނީ ސާމްޕަލްތައް ނަގަމުންނެވެ.
"ވީހާވެސް ގިނަ ސާމްޕަލް ނެގުމުގެ މަސައްކަތް ކުރަމުން އެބަދޭ،" އޮފިޝަލް ވިދާޅުވި އެވެ.
މާލެ އާއި އަތޮޅުތަކުގައި ކޮވިޑް ބަލި ފެތުރިފައިވާއިރު މި ފަހުން ކޮވިޑް ކޭސްތައް އެންމެ ގިނަވީ ރެ އެވެ. އެޗްޕީއޭގެ ތަފާސްހިސާބުން ދައްކާ ގޮތުގައި، 253 މީހަކު ޕޮޒިޓިވްވި އެވެ. މާލެއަށް ވުރެން ކޮވިޑް ކޭސްތައް މިހާރު ގިނައީ އަތޮޅުތަކުގަ އެވެ.
ރާއްޖެ އިން މިހާތަނަށް 26،920 މީހުން މި ބަލި ޖެހިފައިވާ އިރު 71 މީހަކު ވަނީ މަރުވެފަ އެވެ.
