ރައީސް އިބްރާހިމް މުހައްމަދު ސޯލިހު ވެރިކަމަށް ވަޑައިގެންނެވުމަށްފަހު އުފެއްދެވި ތިން ރިޔާސީ ކޮމިޝަނަށް މިހާތަނަށް 12.6 މިލިއަން ރުފިޔާ ދައުލަތުން ހަރަދުކޮށްފައިވާކަން ހާމަވެއްޖެ އެވެ.
ރައީސް ސޯލިހު އުފެއްދެވި ކޮމިޝަންތަކަކީ އެމަނިކުފާނު ރައީސުލްޖުމްހޫރިއްޔާ ކަމުގެ ހުވާ ކުރެއްވި ދުވަހު ނޮވެމްބަރު 17، 2018 އުފެއްދެވި މަރާލާފައިވާ މީހުންނާއި ގެއްލުވާލާފައިވާ މީހުންގެ މައްސަލަތައް ތަހުގީގު ކުރާ ކޮމިޝަނާއި ޕްރެޒިޑެންޝަލް ކޮމިޝަން އޮން ކޮރަޕްޝަން އެންޑް އެސެޓް ރިކަވަރީ އާއި ފެބްރުއަރީ 20، 2020 ގައި އުފެއްދެވި ކުޑަކުދިންނަށް ކުރާ އަނިޔާތަކުގެ މައްސަލަތައް ބަލާ ކޮމިޝަނެވެ.
މައުލޫމާތު ހޯދުމުގެ ގާނޫނުގެ ދަށުން "އަދަދު" އިން ހޯދި ލިޔުންތަކަށް ބަލާއިރު އެންމެ ގިނައިން ހަރަދުކޮށްފައި ވަނީ ކޮރަޕްޝަންތައް ތަހުގީގު ކުރާ ކޮމިޝަނުންނެވެ. އެ ކޮމިޝަނަށް ދައުލަތުން ވަނީ 7.7 މިލިއަން ރުފިޔާ ހަރަދުކޮށްފަ އެވެ. މީގެ ތެރެއިން 6.9 މިލިއަން ރުފިޔާއަކީ ކޮމިޝަން މެންބަރުންގެ މުސާރަ އާއި އެލަވަންސަށް ހަރަދުކޮށްފައިވާ ފައިސާ އެވެ.
ކޮރަޕްޝަންތައް ތަހުގީގު ކުރާ ކޮމިޝަނުން ކޮށްފައިވާ ހަރަދުތައް އެނގޭ ގުރާފެއް: އެންމެ ގިނައިން ފައިސާ ހަރަދު ކުރީ މެންބަރުންގެ މުސާރަ އާއި އެލަވަންސަށް -- އިލުަސްޓްރޭޝަން: އަހުމަދު އިހްސާން/އަދަދު
މަރާލާފައިވާ މީހުންނާއި ގެއްލުވާލާފައިވާ މީހުންގެ ކޮމިޝަނަށް މިހާތަނަށް ހަރަދުކޮށްފައި ވަނީ 4.3 މިލިއަން ރުފިޔާ އެވެ. އޭގެ ތެރެއިން 3.8 މިލިއަން ރުފިޔާއަކީ ކޮމިޝަން މެންބަރުންގެ މުސާރަ އާއި އެލަވަންސެވެ.
އެންމެ މަދުން ފައިސާ ހަރަދުކޮށްފައި ވަނީ މިިދޔަ އަހަރު ހުޅުވި ކުޑަކުދިންނަށް ކުރާ އަނިޔާ ބަލާ ކޮމިޝަނުންނެވެ. އެ ކޮމިޝަނަށް 14 މަސް ދުވަހުގެ ތެރޭގައި 504،124ރ. ވަނީ ހަރަދުކޮށްފަ އެވެ.
މަރު ކޮމިޝަނަށް ދައުލަތުން ކުރި ހަރަދު: ކޮންމެ ކޮމިޝަނަކުން ވެސް އެންމެ ބޮޑު ހަރަދު ކުރީ މުސާރައަށް -- އިލުސްޓްރޭޝަން: އަހުމަދު އިހްސާން/އަދަދު
ކޮރަޕްޝަންތައް ބެލުމަށް އުފެއްދި ކޮމިޝަނުން މައިގަނޑު ގޮތެއްގައި ބަލަނީ ރައީސް އަބްދުﷲ ޔާމީންގެ ދައުރުގައި ހިންގި އެމްއެމްޕީއާރްސީގެ ބޮޑު ވައްކަމުގެ މައްސަލަކަން އެނގިފައިވެ އެވެ. ނަމަވެސް މިހާތަނަށް އެކޮމިޝަނުން ކުރި މާ ބައިވަރު މަސައްކަތްތަކެއް އާންމުކޮށްފައެއް ނުވެ އެވެ.
ގެއްލުވާލާފައިވާ މީހުންނާއި މަރުތައް ތަހުގީގު ކުރާ ކޮމިޝަންގެ ފަރާތުން ނޫސްވެރިޔާ އަހުމަދު ރިލްވާންގެ މައްސަލައިގައި ވަނީ ރިޕޯޓެއް ނެރެފަ އެވެ. ފުލުހުން ކުރިން ހޯދާފައިވާ ގިނަ މައުލޫމާތުތަކެއް ހިމަނައިގެން ނެރުނު އެ ރިޕޯޓުގެ މައްޗަށް ބިނާކޮށް މިހާތަނަށް އެއްވެސް ދައުވާއެއް ކޮށްފައެއް ނުވެ އެވެ.
ކުޑަކުދިންނަށް ކުރާ އަނިޔާތައް ބަލާ ކޮމިޝަނުން މިހާތަނަށް އެއްވެސް މަސައްކަތެއް ކޮށްފައިވާކަން އެނގިފައެއް ނުވެ އެވެ.
