ފަަތުރުވެރިކަމުގެ ދާއިރާއިން ގުޅިގެން މަސައްކަތް ކުރުމަށް ރާއްޖެއާއި ކުވެއިތާ ދެމެދު އެއްބަސްވުމެއްގައި ސޮއިކޮށްފި އެވެ.
ފޮރިން މިނިސްޓަރު އަބްދުﷲ ޝާހިދު މި ވަގުތު ކުވެއިތަށް ކުރައްވަމުން ގެންދަވާ ރަސްމީ ދަތުރުފުޅުގެ ތެރެއިން ޓޫރިޒަމްގެ އިތުރުން ދެ ގައުމު ގުޅިގެން މަސައްކަތް ކުރުމާބެހޭ އިތުރު އެއްބަސްވުމެއްގައި ސޮއި ކުރެވުނެވެ.
ރޭ ކުވައިތުގެ ފޮރިން މިނިސްޓްރީ ބޭއްވި ރަސްމިއްޔާތެއްގައި ރާއްޖޭގެ ފަރާތުން އެއްބަސްވުންތަކުގައި ސޮއިކުރެއްވީ މިނިސްޓަރު ޝާހިދު އެވެ. ކުވައިތު ސަރުކާރުގެ ފަރާތުން ސޮއިކުރެއްވީ އެގައުމުގެ ފޮރިން މިނިސްޓަރު އަދި ސްޓޭޓް ފޯ ކެބިނެޓް އެފެއާޒް މިނިސްޓަރު ޑރ. އަހުމަދު ނާސިރު އަލް މުހައްމަދު އަލް އަހުމަދު އަލް ޖާބިރް އަލް ސަބާހް އެވެ.
ރޭގައި ސޮއި ކުރެވިގެންދިޔަ އެމްއޯޔޫ ތަކުގެ ސަބަބުން ދެގައުމުގެ ގުޅުން އިތުރަށް ބަދަހިވެގެންދާނެ ކަމަށް ފޮރިން މިނިސްޓްރީން ބުންޏެވެ.
އަދި ފަތުރުވެރިކަމުގެ ދާއިރާގައި އެކުގައި މަސައްކަތްކުރުމުގެ ފުރުސަތު ހުޅުވިގެންދާނެ އެވެ. އެހެންކަމުން ކުރިއަށް އޮތްތަނުގައި ދެގައުމުގެ ދެމެދު ވެވޭ އެއްބަސްވުންތައް ތަންފީޒުކުރުމަށް ފަސޭހަ ވެގެންދާނެ ކަމަށް މިނިސްޓްރީން ބުނެ އެވެ.
ކުވެއިތާއި ރާއްޖެއާ ދެމެދު ހާރިޖީ ގުޅުން ގާއިމް ކުރެވިގެން ދިޔައީ ޑިސެމްބަރު 1، 1977 ގައި އެވެ. ރާއްޖެއާއި ކުވެއިތާ ދެމެދު އޮތް ޒަމާންވީ ގާތް ގުޅުމުގެ ސަބަބުން ކުވެއިތުންވަނީ ގިނަ އެހީތަކެއް ދީފަ އެވެ.
