ލަންޑަން (އޭޕްރީލް 22) - ފަހަތުން އަރައި ސައުތެމްޓަން އަތުން 2-1 އިން ޓޮޓެންހަމް ހޮޓްސްޕާސް މޮޅުވެ އެ ޓީމުގެ ޒުވާން ކޯޗު އިނގިރޭސި ޕްރިމިއާ ލީގުގެ ރެކޯޑެއް ހެދިއިރު، އެސްޓަން ވިލާ 2-1 އިން ބަލިކޮށް ލީގު ޗެމްޕިއަންކަން ހޯދުމާ ގާތަށް މެންޗެސްޓާ ސިޓީން ޖެހިލައިފި އެވެ.
ދާދިފަހުން ހޯސޭ މޮރީނިއޯ ވަކިކޮށް މި ސީޒަނުގެ ނިޔަލަށް ޓޮޓެންހަމްގެ ކޯޗަކަށް ހަމަޖެއްސި އުމުރުން 29 އަހަރުގެ ރަޔާން މޭސަން އަކީ ޕްރިމިއާ ލީގުގައި މޮޅެއް ހޯދި އެންމެ ޒުވާން ކޯޗެވެ. މި މޮޅާ އެކު އެ ޓީމު ވަނީ ލީގުގެ ހަ ވަނަ އަށް ޖެހިލައިފަ އެވެ. އެއީ ހަތް ވަނައިގައި މިހާރު އޮތް ލިވަޕޫލާ އެއްވަރަށް ޕޮއިންޓް ހޯދި ނަމަވެސް ލަނޑުގެ ތަފާތުން ކުރި ހޯދައިގެންނެވެ. ދެ ޓީމަށް ވެސް 53 ޕޮއިންޓް ލިބިފައިވާއިރު، ޓޮޓެންހަމުން ވަނީ 33 މެޗުން ކުޅެފަ އެވެ. ލިވަޕޫލުން ކުޅުނީ 32 މެޗެވެ.
މެޗުގެ 30 ވަނަ މިނިޓްގައި ޑެނީ އިންގްސް ވަނީ ސައުތެމްޓަން އަށް ލީޑުނަގައިދީފަ އެވެ. އަނިޔާގެ ސަބަބުން ހެރީ ކޭން ނުލައި ކުޅުނު ޓޮޓެންހަމަށް އެއްވަރުކޮށްދިނީ މެޗުގެ 60 ވަނަ މިނިޓްގައި ގަރެތު ބޭލް ޖެހި މޮޅު ގޯލުންނެވެ. ސައުތެމްޓަނަކީ ޓޮޓެންހަމަށް ބަދަލުވުމުގެ ކުރިން ބޭލް ކުޅުނު ޓީމެވެ. ޓޮޓެންހަމް މޮޅުވި ގޯލު އިތުރު ވަގުތުގައި ޕެނަލްޓީ އަކުން ޖެހީ ސޮން ހެއުން މިން އެވެ. މިއީ މޫސާ ޖެނެޕޯ އޭރިއާތެރެެއިން ސާޖް ރެގީލޯން އަށް ކުރި ފައުލަކަށް ރެފްރީ ދިން ޕެނަލްޓީ އެކެވެ.
މޭސަން ބުނީ މި މޮޅާ އެކު އަންނަ އާދިއްތަ ދުވަހުގެރޭ ކުޅޭ ލީގު ކަޕްގެ ފައިނަލް މެޗަށް ޓޮޓެންހަމް ދާނީ ރަނގަޅު ރޫހެއްގައި ކަމަށެވެ. ލީގު ކަޕް ފައިނަލުގައި ޓޮޓެންހަމް ބައްދަލުކުރާނީ މިރޭ ލީގު ހޯދުމާ ގާތަށް ޖެހިލި ސިޓީ އެވެ.

ސިޓީގެ ފޯޑެން (މ) އާއި ބެނާޑޯ ސިލްވާ އުފާފާޅުކުރަނީ.-- ފޮޓޯ: އޭއެފްޕީ
ސިޓީ އެއް ވަަނައިގައި އޮތީ 33 މެޗުން 77 ޕޮއިންޓާ އެކު އެވެ. ދެ ވަނައިގައި އޮތް މެންޗެސްޓާ ޔުނައިޓެޑަށް 32 މެޗުން ވަނީ 66 ޕޮއިންޓް ލިބިފަ އެވެ. ލީގުގެ ޗެމްޕިއަންކަން ހޯދަން ސިޓީ އަށް ބާކީ އޮތް ފަސް މެޗުން ބޭނުންވަނީ އަށް ޕޮއިންޓެވެ.
ވިލާ ދަނޑުގައި ކުޅުނު މެޗު ފަށައިގެން 20 ސިކުންތު ތެރޭގައި އޮލީ ވަޓްކިންސް ޖެހި ގޯލުން އެސްޓަން ވިލާ އިން ލީޑުނެގި އެވެ. ރިޔާދު މާރޭޒާއި ބެނާޑޯ ސިލްވާ އަދި އޮލެކްސަންޑަ ޒިންޗެންކޯ ގުޅިގެން އުފެއްދި އެޓޭކެއްގައި މެޗުގެ 22 ވަނަ މިނިޓްގައި ސިޓީ އަށް އެއްވަރުކޮށްދިނީ ފިލް ފޯޑެން އެެވެ. ސިޓީ އަށް މެޗުގެ 39 ވަަނަ މިނިޓްގައި ލީޑުނަގައިދިން ގޯލު ޖެހީ ރޮޑްރީ އެވެ.
ސިޓީން ލީޑުނެގިތާ ހަތަރު މިނިޓް ފަހުން އެސްޓަން ވިލާގެ ޖޭކަބް މާފީ އަށް ކުރި ނުރައްކާތެރި ފައުލަކަށް ސިޓީގެ ޖޯން ސްޓޯންސް އަށް ވަނީ ވީޑިއޯ އެސިސްޓަންޓް ރެފްރީ (ވީއޭއާރް) އިން ބެލުމަށް ފަހު ރަތް ކާޑެއް ދައްކައިފަ އެވެ. މެޗުގެ 57 ވަނަ މިނިޓްގައި އެސްޓަން ވިލާގެ މެޓީ ކޭޝް އަށް ދެ ވަނަ ރީނދޫ ކާޑާ އެކު ރަތް ކާޑެއް ދެއްކިއިރު، އެ ޓީމުން މެޗުގެ ފަހު ތިރީހަކަށް މިނިޓް ކުޅުނީ އެއް ކުޅުންތެރިއަކު މަދުކޮށެވެ. ދެ ޓީމުގެ ވެސް އެއް ކުޅުންތެރިއަކު މަދުވުމުން ސިޓީން ވަނީ މެޗުގެ ކޮންޓްރޯލް ނަަގައިގެން ރަނގަޅަށް ކުޅެފަ އެވެ.








