ސިޔާސީ ނުފޫޒުން ދިވެހި އަސްކަރިއްޔާ އެއްކިބާކޮށް "ޕްރޮފެޝަނަލް ފައިޓިން ފިޓް ފޯސް" އެއްގެ ގޮތުގައި އެންމެނަށް ހަމަހަމަކަމާއި އޯގާތެރިކަމާއެކު ސިފައިންގެ ހިދުމަތް ދޭނެ މަގު ފަހިކޮށްދެވިއްޖެކަމަށް ޑިފެންސް މިނިސްޓަރު މާރިޔާ އަހުމަދު ދީދީ މިއަދު ވިދާޅުވެއްޖެެ އެވެ.
ސިފައިންގެ 129 ވަނަ އަހަރީ ދުވަހާއި ގުޅިގެން ދެއްވި ހިތާބުގައި މިނިސްޓަރު މާރިޔާ ވަނީ ސިފައިންނަށް ތަހުނިޔާއާއި މުބާރިކްބާދީ އަރިސްކޮށްފަ އެވެ.
މި އަހަރުގެ ޝިއާރެއްގެ ގޮތުގައި "ސިފައިންގެ ގާބިލްކަން - ގައުމުގެ އަމާންކަން" ކަނޑައަޅާފައިވާއިރު، މިނިސްޓަރު ވިދާޅުވީ ކުރީގެ ރައީސް އަބްދުﷲ ޔާމީންގެ ވެރިކަމުގައި ސިފައިންގެ ދުވަސް ފާހަގަ ކުރަން އެކިއެކި ޝިއާރުތައް ހެދި ނަމަވެސް އެކަންކަމަށް އަމަލު ނުކުރާ ކަމަށެވެ.
"2017 އަދި 2018 ގެ ޝިއާރު ވެގެންދިޔައީ ހަމައެކަނި ސިފައިންގެ އަހަރީ ދުވަހު އިއުލާން ކޮށްލުމަށްފަހު، ވަތްގަނޑަށްލާ ތަޅުލާފައިވާ އޮތް ޝިއާރުތަކަކަށެވެ. އެއިން ޝިއާރެއް ހަގީގަތަކަށް ހެދުމަށް ކުރެވިފައިވާ އަމަލީ މަސައްކަތެއް ފެންނާކަށް ނެތެވެ." މާރިޔާ ވިދާޅުވި އެވެ.
މާރިޔާ ވިދާޅުވި ގޮތުގައި މިދިޔަ ހަތަރު އަހަރުގެ ޝިއާރުތަކަށް މިސަރުކާރުގެ ދެ އަހަރުތެރޭގައި މަސައްކަތްކޮށް ގިނަ ކާމިޔާބީތަކެއް ވަނީ ހާސިލްކުރެވިފަ އެވެ.
މީގެ އިތުރުންވެސް މިންތީގެ ހަމަހަމަކަން ގާއިމްކުރަން ސަރުކާރުން ގެންގުޅުއްވާ ސިޔާސަތުގެ ދަށުން އަންހެން ސިފައިން ބާރުވެރިކުރުމުގައި ގިނަ މަސައްކަތްތައް ކުރަމުން އަންނަ ކަމަށް މާރިޔާ ފާހަގަކުރައްވާފައިވެ އެވެ.
އެގޮތުން ފުރަތަމަ ފަހަރަށް ލެފްޓިނެންޓް ކާނަލްގެ މަގާމަށް އަންހެން ބޭފުޅަކު ވަނީ ހަމަޖައްސާފަ އެވެ. އެހެން ކަމުން ސިފައިންގެ ލީޑާޝިޕުން ނިންމާ ނިންމުން ތަކުގައި އަންހެނުންގެ ބަސް ހިމެނޭނެ ކަމަށް މިނިސްޓަރު ވިދާޅުވި އެވެ.
ސިފައިން ރާއްޖެ އާއި ރާއްޖެއިން ބޭރުގެ އެކި ރޮނގުތަކުން ގައުމު ފަހުރުވެރިވާ ފަދަ ރަން ވަނަތަކާއި މެޑަލްތައް ހާސިލްކޮށްފައިވާކަން ވެސް މިނިސްޓަރު ވަނީ ފާހަގަކުރައްވާފަ އެވެ.
މިހާ ކުރު މުއްދަތެއްގެ ތެރޭގައި ލިބިނު ކުރިއެރުމުގެ ފަހަތުގައި ވަނީ ރައީސް އިބްރާހިމް މުހައްމަދު ސޯލިހް ގެ ހަރުދަނާ ވިސްނުންފުޅާއި ތަސައްވަރުކަން ފާހަގަކޮށް މާރިޔާ ވަނީ ހާއްސަ ޝުކުރެއް ދަންނަވާފަ އެވެ.
