ހުޅުމާލޭގައި އިމާރާތްކޮށްފައިވާ ހިޔާ މަޝްރޫއުގެ ފްލެޓްތަކުގެ ގުރުއަތުލުން، މެދުކެނޑުމަކަށް ފަހު އަންނަ ހަފުތާގައި ފަށަން ނިންމާފައިވާ ކަމަށް ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ)ން މިއަދު ބުނެފި އެވެ.
ޓީވީން ލައިވް ކޮށްގެން މި މަހު އަށް ވަނަ ދުވަހު ގުރުއަތުލުން ފެށުމަށް ފަހު މިހާތަނަށް ގުރުއަތު ލައިފައި ވަނީ ނުކުޅެދުންތެރިކަން ހުންނަ މީހުންނަށް ހާއްސަކުރި އެޗް10 ކެޓަގަރީން އެކަންޏެވެ. ކުރިން ނިންމާފައި އޮތީ އޭރު ފެށިގޮތަށް ހަފްތާއެއްގެ ތެރޭގައި ގުރުއަތުލުން ނިންމާލުމަށެވެ.
އެޗްޑީސީގެ މެނޭޖިން ޑިރެކްޓަރު އަހްމަދު ސުހެއިލް މިއަަދު "އަދަދު"އަށް ވިދާޅުވީ ހިޔާ ފްލެޓްތަކުގެ ގުރުއަތުލުން މެދުކެނޑުނީ ހައުސިން މިނިސްޓްރީން ފައިނަލް ލިސްޓެއް ނުލިބިގެން ކަމަށެވެ. އިއްޔެ އެ ފައިނަލް ލިސްޓް ލިބުމާއެކު އަންނަ ހަފުތާގައި ގުރުއަތުލާން ފަށަން ނިންމާފައިވާ ކަމަށް އޭނާ ވިދާޅުވި އެވެ.
ރާއްޖޭގައި މިހާތަނަށް ބާއްވާ އެންމެ ބޮޑު ގުރުއަތުލުން ކުރިއަށް ގެންދަނީ ޔެސް ޓީވީން ލައިވްކޮށެވެ. ބޯހިޔާވަހިކަމުގެ މަޝްރޫއުތަކުގައި އެ މީހަކަށް ލިބޭ ފްލެޓް ހޮވުމުގެ ގުރުއަތު ކުރިން ނަގަނީ މީހުން ބައިވެރިކޮށްގެންނެވެ. އެކަމަކު ހިޔާ މަޝްރޫއުގައި މީހުން ގިނަކަމުން އެންމެން ހާޒިރުކޮށްގެން ކުރިއަށް ގެންދަން ދަތިވާނެ ކަމަށް އެޗްޑީސީން ބުންޏެވެ.
ސުހެއިލް ވިދާޅުވީ އަންނަ ހަފުތާގައި ގުރުއަތުލުން ނިންމައި ލިބޭނެ ފްލެޓްތައް ކަނޑައެޅޭނެ ކަމަށެވެ.
"ލިސްޓްގައި މިއުޅެނީ 6،000 އެއްހާ މީހުން. އެކަމަށް ފަސް ދުވަސް ނޫނީ ހަ ދުވަސް ވާނެ ކަމަށް ބެލެވެނީ. މިހާރުގެ ޓާގެޓަކީ އަންނަ ހަފްތާގައި ނިންމުން،" ސުހެއިލް ވިދާޅުވި އެވެ.
ގުރުއަތުލުމަށ ފަހު ފްލެޓް ލިބޭ ގޮތް ސްކްރީނުން ދައްކަނީ: އަންނަ ހަފްތާގައި ގުރުއަތުލުން ފަށަން ވަނީ ނިންމައިފައި-- ފޮޓޯ: އެޗްޑީސީ
ޓީވީ މެދުވެރިކޮށް ގުރުއަތު ނަގާއިރު އެ މީހަކަށް ފްލެޓް ލިބޭ ފްލޯ އާއި ޓަވަރު އެނގޭ ގޮތަށް ޓީވީ ސްކްރީނުން ދައްކަ އެވެ. އަދި އެސްއެމްއެސް މެދުވެރިކޮށް ފްލެޓްގެ ވެރި ފަރާތަށް އެ މައުލޫމާތު ދޭނެ ކަމަށް އެޗްޑީސީން ބުންޏެވެ.
ކުރީގެ ސަރުކާރުގައި ފެށި ހިޔާ މަޝްރޫއުގެ 16 ޓަވަރުގައި 6,720 ފްލެޓް އަޅާފައިވެ އެވެ. މި ފްލެޓްތަކުގެ ތަޅުދަނޑި މި މަހުގެ ތެރޭގައި ދޫކުރާނެ ކަމަށް ހައުސިން މިނިސްޓްރީން ބުނެ އެވެ. އެކަމަކު ފްލެޓްތަކަށް ވަދެވޭނީ ފިނިޝިން ނިންމައި ގާތްގަނޑަކަށް ތިން މަސް ދުވަހުގެ ތެރޭގަ އެވެ. އެ މުއްދަތުގައި ކުއްޔެއް ނުނަގާނެ އެވެ.
