މިދިޔަ އަހަރު އެމެރިކާގެ މިނިއަޕޮލިސްގެ މަގެއްގައި ކަޅު ނަސްލުގެ ޖޯޖް ފްލޮއިޑް ނަމަކަށް ކިޔާ މީހަކު ހައްޔަރު ކުރަން އުޅުމުގެ ތެރޭގައި އޭނާ މަރާލި ކަމުގެ ކުށް ކުރީގެ ފުލުހަކަށް ސާބިތުވެއްޖެ އެވެ.
އުމުރުން 45 އަހަރުގެ ޑެރެކް ޗައުވިންގެ ކަކުލުން ފްލޮއިޑުގެ ކަރު މައްޗަށް އަރައިގެން ނުވަ މިނެޓަށް ވުރެ ގިނަ އިރު ހުންނަ މަންޒަރު ފެންނަ ވީޑިއޯއެއް މިދިޔަ މޭ މަހު އާއްމުވި އެވެ.
އެ ވީޑިއޯ ފެނި އެމެރިކާގައި ނަސްލީ ތަފާތު ކުރުމާއި ފުލުހުން ނަހަމަ ބާރު ބޭނުން ކުރުމާ ދެކޮޅަށް ބޮޑެތި މުޒާހަރާތައް ބޭއްވި އެވެ.
ޑެރެކް ޗައުވިން، ޖޯޖް ފްލޮއިޑުގެ ކަރު މައްޗަށް ކަކުލުން އަރައިގެން.--
ޗައުވިންއަށް މަރުގެ ކުށް ސާބިތުވުމާއެކު ހުކުމް އިއްވަން ދެން އޭނާ ހުންނާނީ ބަންދުގަ އެވެ. އަދަބެއްގެ ގޮތުން އެތައް އަހަރެއް ޖަލުގައި ހޭދަކުރަން ޖެހޭނެ އެވެ.
މި ޝަރީއަތް ތިން ހަފްތާއަށް ކުރިއަށް ދިޔައިރު، މިނިއަޕޮލިސްގައި ހަމަނުޖެހުން ބޮޑުވެދާނެ ކަމުގެ ބިރު އޮތެވެ. ގޮތެއް ނިންމަން 12 މެމްބަރުންގެ ޖޫރީން ނެގީ އެންމެ ދުވަހެކެވެ.
ޖޫރީން ނިންމި ގޮތް ކޯޓު ރޫމުގައި އިއުލާން ކުރުމާއެކު މަގުމަތީގައި ތިބި މީހުން އުފާ ފާޅުކުރަން ފެށި އެވެ. ފްލޮއިޑުގެ އާއިލީ ވަކީލު ބެން ކްރަމްޕް ވިދާޅުވީ މިއީ އެމެރިކާގެ ތާރީހުގައި މުހިއްމު ދަނޑިވަޅެއް ކަމަށެވެ.
"ވޭންދެނިވި ގޮތަކަށް ހޯދަން ޖެހުނު އިންސާފު މިއަދު ލިބިއްޖެ. މިއީ ގާނޫނު ތަންފީޒު ކުރާ ފަރާތްތައް ޖަވާބުދާރީ ކުރުވަން ޖެހޭ ކަމުގެ ސާފު މެސެޖެއް،" އޭނާ ޓްވީޓު ކުރެއްވި އެވެ.
ކުށް ސާބިތުވާ ކަމަށް ކަނޑައެޅުމާއެކު ރައީސް ޖޯ ބައިޑެން އާއި ނައިބު ރައީސް ކަމަލާ ހެރިސް ވަނީ ވަގުތުން ފްލޮއިޑުގެ އާއިލާއަށް ފޯނުން ގުޅުއްވާފަ އެވެ.
އޭގެ ކުޑައިރުކޮޅެއް ފަހުން ޓީވީ މެދުވެރިކޮށް ގައުމާ މުހާތަބު ކުރައްވަމުން ވެސް ބައިޑެން ވިދާޅުވީ ނިޒާމީ ނަސްލީ ތަފާތު ކުރުމަކީ "ގައުމުގެ ރޫހުގައި ޖެހިފައިވާ ލައްގަނޑެއް" ކަމަށެވެ.
ނައިބު ރައީސް ކަމަލާ ހެރިސް ވިދާޅުވީ އެމެރިކާގެ ފުލުހުން އިސްލާހު ކުރަން ހާއްސަ ޖޯޖް ފްލޮއިޑް ބިލުގެ މަސައްކަތް އަވަސް ކުރަން ޕާލިމެންޓު މެމްބަރުންނަށް ބާރު އަޅުއްވާ ކަމަށެވެ.
އެމެރިކާގެ ނޫސްތަކުން ބުނާ ގޮތުގައި މި ނިންމުން ޗައުވިންގެ ފަރާތުން އިސްތިއުނާފު ކުރާނެ ކަމަށް ބެލެވެ އެވެ.
