ދިވެހިރާއްޖެއަށް ކުވެއިތުގެ އިތުރު އެހީތައް ލިބޭނެ ކަމުގެ ޔަގީންކަން އެ ގައުމުން މިއަދު ދީފި އެވެ.
މި ޔަގީންކަން ކުވެއިތުން ދިނީ އެ ގައުމުގެ ބޮޑުވަޒީރު ޝައިހް ސަބާހް ހާލިދު އަލް ހަމަދުގެ އަރިހަށް ފޮރިން މިނިސްޓަރު އަބްދުﷲ ޝާހިދު ކުރެއްވި ޒިޔާރަތުގަ އެވެ. ރައީސް އިބްރާހިމް މުހައްމަދު ސޯލިހު ކުވެއިތުގެ އަމީރު ޝައިހް ނަވާފް އަލް އަހްމަދު އަލް ޖާބިރް އަލް ސަބާހްއަށް ފޮނުއްވި ސިޓީފުޅެއް، މިނިސްޓަރު ޝާހިދު ބޮޑުވަޒީރަށް ރައްދުކޮށްދެއްވި އެވެ.
މި ބައްދަލުވުމުގައި މިނިސްޓަރު ޝާހިދު ވިދާޅުވީ ދެ ގައުމުގެ ގުޅުމަކީ އެއް ގައުމުން އަނެއް ގައުމަށް ކުރާ އިތުބާރާއި ގަދަރުގެ މައްޗަށް ބިނާވެގެންވާ، ދީނީ އަދި ސަގާފީ ގުޅުމެއް ކަމަށެވެ. އަދި ރާއްޖޭގެ އިގުތިސޯދީ އަދި އިޖްތިމާއީ ތަރައްގީއަށް ކުވައިތު ފަންޑުންނާއި ކުވައިތު ސަރުކާރުން ރާއްޖެއަށް ފޯރުކޮށްދޭ އެހީއަށް ޝުކުރު އަދާކުރެއްވި އެވެެ.
މިނިސްޓަރު ޝާހިދު ވަނީ ކޮވިޑް-19 ގެ ސަބަބުން ރާއްޖެއިން އަޅާފައިވާ ފިޔަވަޅުތައް ކުވައިތުގެ ބޮޑުވަޒީރާ ހިއްސާކުރައްވައިފަ އެވެ.
ކުވައިތުގެ ބޮޑުވަޒީރުގެ ވާހަކަފުޅުގައި އެ މަނިކުފާނު ވަނީ ކޮވިޑު ބަލިމަޑުކަމުން ރައްކާތެރިވުމަށާއި ރާއްޖޭގެ ފަތުރުވެރިކަން އަލުން ހުޅުވާލަން ސަރުކާރުން ކުރި މަސައްކަތަށް ތައުރީފްކުރައްވައިފަ އެވެ. އަދި ދެ ގައުމުގެ ޒަމާންވީ ގުޅުން އިތުރަށް ބަދަހިކޮށް، މުސްތަގުބަލުގައި ވެސް ރާއްޖެއަށް ކުވައިތުގެ އެހީތެރިކަން ލިބޭނެ ކަމުގެ ޔަގީންކަން ދެއްވި އެވެ.
މި ބައްދަލުވުމުގައި ބައިނަލްއަގްވާމީ މަޝްރަހުގައި އެކުގައި ގުޅިގެން މަސައްކަތްކުރުމާ ބެހޭ ގޮތުން މަޝްވަރާކުރެވުނު ކަމަށް ވެސް ފޮރިން މިނިސްޓްރީން ބުންޏެވެ.
މިނިސްޓަރު ޝާހިދުގެ ކުވައިތު ދަތުރުގައި އެ ގައުމުގެ ގިނަ އިސް އޮފިޝަލުންތަކަކާ ބައްދަލުކުރައްވއި ކުވައިތުގެ އެހީގައި ރާއްޖޭގައި ހިނގަމުންދާ މަޝްރޫތަކާ ގުޅޭ ގޮތުން މަޝްވަރާ ކުރައްވާނެ އެވެ. އެ ގައުމުން ފޯރުކޮށްދީފައިވާ އެހީގެ ދަށުން މިހާރު ވެސް ރާއްޖޭގައި ބޮޑެތި ތަރައްގީގެ މަޝްރޫއުތަކަކަށް އަންނަނީ ފަންޑްކޮށްދެމުންނެވެ.
އޭގެ ތެރެއިން އެންމެ ފާހަގަކޮށްލެވެނީ ވެލާނާ އިންޓަނޭޝަނަލް އެއާޕޯޓުގެ އަޕްގްރޭޑިންގެ މަސައްކަތެވެ.
