އެމެރިކާގެ ޖައްވީ އިދާރާ، ނާސާއިން ކާމިޔާބުކަމާ އެކު މާސްގައި ކުޑަ ހެލިކޮޕްޓަރެއް ދުއްވައިފި އެވެ.
އިންޖެނުއިޓީގެ ނަން ދީފައިވާ ކުޑަ ޑްރޯން ވައިގެ ތެރޭގައި އުދުހުނީ މިނެޓަކަށް ވުރެ ކުޑަ ވަގުތުކޮޅެކެވެ.
ނާސާއިން އެކަން ފާހަގަކޮށް އުފާ ފާޅުކުރަމުން ދަނީ ދުނިޔޭގައި ތިބެގެން އެހެން ޕްލެނެޓެއްގައި ވައިގެ އުޅަނދެއް ކޮންޓްރޯލް ކުރެވުނު ފުރަތަމަ ފަހަރަށް ވާތީ އެވެ.
އިންޖެނުއިޓީ އުދުހުނުކަން ނާސާއަށް ޔަގީންވީ މާސްގައިވާ ސެޓެލައިޓަކުން ހެލިކޮޕްޓަރުގެ ޑޭޓާ ނެގުމަށް ފަހު ދުނިޔެއަށް ފޮނުވުމުންނެވެ.
އިންޖެނުއިޓީ އުދުހެމުން ދިޔައިރު މާސްގެ ބިމަށް އޭގެ ހިޔަނި އެޅިފައި. މި ފޮޓޯ ނަގާފައިވަނީ އިންޖެނުއިޓީގައި ހަރުކޮށްފައިވާ ދެ ކެމެރާގެ ތެރެއިން ކެމެރާއަކުން.-- ފޮޓޯ: ނާސާ
ނާސާއިން ބޭނުންވަނީ ކުރިއަށް އޮތް ދުވަސްތަކުގައި އެ ހެލިކޮޕްޓަރު ބޭނުންކޮށްގެން އިތުރު އުދުހުންތައް ކުރިއަށް ގެންދާށެވެ.
އެގޮތުން އިންޖެނުއިޓީއަށް އަންގަމުން ދާނީ ވީހާވެސް މައްޗަށް އަދި ދުރަށް އުދުހުމަށެވެ. އެއީ އެ އުޅަނދު ކޮންޓްރޯލް ކުރުމުގެ ޓެކްނޮލޮޖީ ޓެސްޓު ކުރުމުގެ ގޮތުންނެވެ.
މި ކުޑަ ހެލިކޮޕްޓަރު މާސްއަށް ފޮނުވާފައިވަނީ މިދިޔަ ފެބްރުއަރީ މަހު އެ ޕްލެނެޓަށް ތިރި ކުރި މާސްގެ ޕާސިވެރަންސް އުޅަނދުގަ އެވެ.
ސައިންސްވެރިން ބުނާ ގޮތުގައި މާސްގައި ވައިގެ ތެރެއަށް އުދުއްސައިގަތުމަކީ ވަރަށް އުނދަގޫ ކަމެކެވެ. އެ ޕްލެނެޓުގެ ވައިގެ ފަށަލަ ނުވަތަ އެޓްމޮސްފިއާ ދުނިޔެއާ އަޅާ ބަލާއިރު ވަރަށް ތުންޏެވެ.
ނަމަވެސް މާސްގައި ދުނިޔެއަށް ވުރެ ގްރެވިޓީ ނުވަތަ ބިމަށް ދަމާ ބާރު ކުޑަވުމުން ކޮންމެވެސް ވަރަކަށް އެހީވެދެ އެވެ.
އެހެންކަމުން އިންޖެނުއިޓީ އުފައްދާފައިވަނީ ވަރަށް ލުއިކޮށެވެ. އަދި އޭގެ ބުރަފަތި މިނެޓަކު 2500 ބުރު ޖެހޭ ވަރަށް ބާރު ދީފައި ވެއެވެ.
