މިލާން (އޭޕްރީލް 19) - އިޓާލިއަން ލީގުގެ އެންމެ ފަހުގެ ޗެމްޕިއަން ޔުވެންޓަސް 1-0 އިން އެޓަލަންޓާ އަތުން ބަލިިވިއިރު، ލީގުގެ އެއް ވަނައިގައި އޮތް އިންޓަ މިލާން ކުޅުނު މެޗުން 1-1 އިން ނަޕޯލީއާ އެއްވަރުވެއްޖެ އެވެ.
މިއީ ފާއިތުވި 12 މެޗުގެ ތެރެއިން އިންޓަ އަށް މޮޅެއް ނުލިބި ނިންމާލަން ޖެހުނު ފުރަތަަމަ ފަހަރެވެ. އިންޓަ އިން އަންނަނީ 2010 ވަނަ އަހަރަށް ފަހު ލީގު ޗެމްޕިއަންކަން ހޯދުމަށް މި ސީޒަނުގައި މޮޅު ކުޅުމެއް ދައްކަމުންނެވެ.
މިރޭގެ ނަތީޖާއާ އެކު އިންޓަ އެއް ވަނައިގައި އޮތީ ނުވަ ޕޮއިންޓުގެ ލީޑަކާ އެކު އެވެ. އެ ޓީމަށް 31 މެޗުން ވަނީ 75 ޕޮއިންޓް ލިބިފަ އެވެ. ލީގުގެ ދެ ވަނައިގައި އޮތް އޭސީ މިލާނުން މި ހަފްތާގައި ވަނީ ޖެނޯއާ ބަލިކޮށްފަ އެވެ. މިލާން ދެ ވަނައިގައި އޮތީ 31 މެޗުން 66 ޕޮއިންޓް ހޯދައިގެންނެވެ.
މިދިިޔަ 20 އަހަރުތެރޭ ލީގުގައި ޔުވެންޓަސް އަތުން ހޯދި ފުރަތަމަ މޮޅާ އެކު އެޓަަލަންޓާ ވަނީ ތިން ވަނަ އަށް ޖެހިލައިފަ އެވެ. އެޓަލަންޓާ އަށް 31 މެޗުން ލިބިފައިވަނީ 64 ޕޮއިންޓެވެ. ހަތަރެއްގައި އޮތް ޔުވެންޓަސް އަށް 31 މެޗުން ލިބިފައިވަނީ 62 ޕޮއިންޓެވެ. ނަޕޯލީ މިރޭ އިންޓަ ބަލިކުރިނަމަ ޔުވެންޓަސް ފަސް ވަނަ އަށް ވެއްޓޭނެ އެވެ. އެކަމަަކު ނަޕޯލީ އެއްވަރުވުމުން އެ ޓީމު ފަސް ވަނައިގައި އޮތީ 31 މެޗުން 60 ޕޮއިންޓާ އެކު އެވެ.
އަނިޔާގެ ސަބަބުން ކްރިސްޓިއާނޯ ރޮނާލްޑޯ ނުލައި ކުޅުނު ޔުވެންޓަސް އަށް ލަނޑު ޖަހައިދޭން އެ ޓީމުގެ ސްޕެއިން ފޯވާޑް އަލްވާރޯ މޮރާޓާ އަށް ރަނގަޅު ފުރުސަތުތަކެއް ލިބުނު ނަމަވެސް ބޭނުމެއް ނުކުރެވުނެވެ. މި މެޗުން އެޓަލަންޓާ މޮޅުކޮށްދިން ގޯލު މެޗު ނިމެން ތިން މިނިޓަށް ވެފައި ހުއްޓައި ކާމިޔާބުކުރީ ރަސްލާން މަލިނޯވްސްކީ އެވެ.
ޔުވެންޓަސްގެ ކޯޗު އަންދްރެއާ ޕިރްލޯ ބުނީ ލީގުގެ ރޭހުގައި އެ ޓީމަށް މިހާރު ފުރުސަތެއް ނެތްކަމަށާއި ގަދަ ހަތަރެއް ކަށަވަރުކުރަން ކުރެވެން ހުރި މަސައްކަތެއް ކުރަން ޖެހޭ ކަމަށެވެ. އަދި އެންމެ މުހިއްމު ކަމަކީ ފޯކަސް ބަހައްޓައިގެން ޕްލޭނާ އެއްގޮތަށް މަސައްކަތްކުރުން ކަމަށް ޕިރްލޯ ބުންޏެވެ.
ނަޕޯލީ ދަނޑުގައި ކުޅުނު މެޗުގެ 36 ވަނަ މިނިޓްގައި އެ ޓީމުން ލީޑުނެގީ އިންޓަގެ ކީޕަރު ސާމިރް ހަންޑަނޯވިޗް އަތުން ބައިކޮޅަށް ވަން ގޯލުންނެވެ. މިއީ ލޮރެންޒޯ އިންސީނިއާ ނެގި ހުރަހެއް ދިފާއުކުރަން އުޅުމުގެ ތެރޭގައި ހަންޑަނޯވިޗް އަތުން ބައިކޮޅަށް ވަން ގޯލެކެވެ. މެޗުގެ 55 ވަނަ މިނިޓްގައި އިންޓަ އަށް އެއްވަރުކޮށްދިނީ ކްރިސްޓިއަން އެރިކްސަން އެވެ. ނަޕޯލީ މޮޅުކޮށްދޭން އެ ޓީމުގެ ފޯވާޑް މަޓެއޯ ޕޮލިޓާނޯ ޖެހި ބޯޅައެއް ވަނީ ހުރަސްދަނޑިއަށް އަމާޒުވެފަ އެވެ.
