ޕެރިސް (އޭޕްރީލް 18) - ފްރެންޗް ލީގުގައި މިރޭ ފަހު ވަގުތު 3-2 އިން ސެއިން އެޓިއެން ބަލިކޮށް އެންމެ ފަހުގެ ޗެމްޕިއަން ޕީއެސްޖީން ލީގުގެ އެއް ވަނައިގައި އޮތް ލިލްއާ ފަރަގުކުޑަކޮށްފި އެވެ.
ލީގުގައި ބާކީ ފަސް މެޗު އޮތްއިރު ލިލް އެއް ވަނައިގައި އޮތީ 33 މެޗުން 70 ޕޮއިންޓް ހޯދައިގެންނެވެ. ދެ ވަނައިގައި އޮތް ޕީއެސްޖީ އަށް 33 މެޗުން ވަނީ 69 ޕޮއިންޓް ލިބިފަ އެވެ.
ޕީއެސްޖީ ދަނޑުގައި މިރޭ ކުޅުނު މެޗުގެ ހުރިހާ ގޯލެއް ފެނުނީ މެޗުގެ ފަހު ކޮޅުގަ އެވެ. ޕީއެސްޖީ ސިއްސުވާލުމަށް ފަހު ސެއިން އެޓިއެން އިން ލީޑުނެގީ މެޗުގެ 77 ވަނަ މިނިޓްގައި ޑެނިސް ބޮއަންގާ ވައްދާލި ގޯލުންނެވެ. އޭގެ ދެ މިނިޓް ފަހުން ކީލިއަން އެމްބާޕޭ ވަނީ ފުރުސަތުގެ ބޭނުންހިފައި ޕީއެސްޖީ އަށް އެއްވަރުކޮށްދީފަ އެވެ. އޭނާ މި ގޯލު ޖެހީ އެންޑަ ހެރޭރާ ދިން ބޯޅައަކުންނެވެ.
އެމްބާޕޭ، ޕީއެސްޖީ އަށް ލީޑުގައިދިނީ މެޗުގެ 87 ވަނަ މިނިޓްގައި ލިބުނު ޕެނަލްޓީ އަކުންނެވެ. މިއީ ސެއިން އެޓިއެންގެ ކީޕަރު ގްރީން އޭރިއާތެެރެއިން އެމްބާޕޭ އަށް ކުރި ފައުލަކަށް ރެފްރީ ދިން ޕެނަލްޓީއެކެވެ. މި ގޯލާ އެކު އެމްބާޕޭ ވަނީ މި ފަހަރުގެ ލީގުގައި އޭނާ ކުޅުނު 28 މެޗުން 23 ގޯލު ޖަހައިފަ އެވެ.
ޕީއެސްޖީ މޮޅުވާނެ ކަމަށް ނިންމައިގެން ތިއްބައި އިތުރު ވަގުތުގެ ދެ ވަަނަ މިނިޓްގައި ސެއިން އެޓިއެންގެ ރޮމޭން ހަމޫމާ ވަނީ ގޯލެއް ޖަހައި އެ ޓީމަށް ނަތީޖާ ހަމަހަމަކޮށްދީފަ އެވެ.
އިތުރު ވަގުތުގެ ފަސް ވަނަ މިނިޓްގައި ޕީއެސްޖީ މޮޅުކޮށްދިން ގޯލު ޖެހީ މައުރޯ އިކާޑީ އެވެ. މިއީ އެންހެލް ޑި މާރިއާ ބޮލުން ޖައްސާލި ބޯޅައަކުން އިކާޑީ ޖެހި ގޯލެކެވެ.
މެޗަށް ފަހު ޕީއެސްޖީގެ ކޯޗު މައުރީސިއޯ ޕޮޗެޓީނޯ ބުނީ ފެނިގެންދިޔައީ އޭނާގެ ޓީމުން އެންމެ ފަހު ސިކުންތާ ހަމައަށް ވެސް މޮޅުވާން ކުރާ ހިތްވަރު ކަމަށާއި ކުރި މަސައްކަތާ ބަލާއިރު ޕީއެސްޖީ އަށް ލިބުނީ ހައްގު މޮޅެއް ކަމަށެެވެ.
