އޭޑީކޭ ހޮސްޕިޓަލުގައި މިދިޔަ ފެބްރުއަރީ މަހު ވިހެއުގެ ގަޑިއިރުތަކެއް ފަހުން ސަލްމާ ނަސީރު، 25، މަރުވި، ޑޮކްޓަރުންގެ ޓީމަށް އޭނާގެ ހަށިގަނޑުން ލޭ ފޭބި މިންވަރު ނުބައިކޮށް އަންދާޒާ ކުރުމުގެ އިތުރުން ލޭ އެޅުން ވެސް އިންތިހާއަށް ލަސްވެފައި އޮއްވާކަން ހެލްތު މިނިސްޓްރީގެ ތަހުގީގަކުން ހާމަވެއްޖެ އެވެ.
ސަލްމާ މަރުވި މައްސަލަ ބަލައި ހެލްތު މިނިސްޓްރީން އޭނާގެ ފިރިމީހާއަށް ފޮނުވި ކުރު ތަހުގީގު ރިޕޯޓެއްގައި ބުނެފައި ވަނީ ވިހެއުމަށްފަހު އަންހެންމީހާގެ ހަށިގަނޑުން ވަރަށް ގިނައިން ލޭ ބޭރުވި ނަމަވެސް ހޮސްޕިޓަލުން ލޭ އަޅާފައި ވަނީ އޭނާ ވިހެއިތާ ތިން ގަޑިއިރު ފަހުން ކަމަށެވެ.
އެކަމަކު ވިހެއުމުގެ ކުރިން ސަލްމާއަށް ލޭ ދޭނެ ދެ މީހަކު އާއިލާއިން ހަމަޖައްސައި، ކްރޮސްމެޗު ހެދި ކަމަށް ވެސް މިނިސްޓްރީގެ ރިޕޯޓުން އެނގެ އެވެ.
ސަލްމާ ގަޔަށް އަޅަންޖެހޭ ލޭ ގެންނަން ބުނީ ވެސް އޭނާ ވިހެއިތާ އެއް ގަޑިއިރު ފަހުން ކަމަށާއި ލޭ ގެނައުމަށްފަހު ވެސް ވިހާ ކޮޓަރީގައި އޮތް ސަލްމާ ގަޔަށް ޑޮކްޓަރުން ލޭ އަޅާފައިނުވާ ކަމަށް އެ ރިޕޯޓުގައި ބުނެ އެވެ. ލޭ ގެނައީ ވެސް ސަލްމާގެ މޫނު މައްޗަށް އަނިދިރިވާން ފެށުމުންނެވެ.
"ބޭބީ ގެންދިޔައިރު ވެސް ބަލިމީހާ ވަރަށް ހެވިފައި އޮތްކަމަށް، އަދި އިރުކޮޅެއް ފަހުން ފުސްވާކަހަލަ ގޮތެއްވާ [މޫނު މައްޗަށް އަނދިރިވާން ފެށީ] ކަމަށް ބަލިމީހާ ބުނިކަމަށް އެހީތެރިޔާގެ ބަޔާނުން ފެންނަން ހުރުން،" ތަހުގީގު ރިޕޯޓުގައި ބުނެފައިވެ އެވެ.
ވިހެއުމަށްފަހު ލޭ ފައިބާތީ އޭގެ ސަބަބު ދަނެގަތުމަށް މަސައްކަތްކޮށް ލޭ މަނާ ކުރުމަށް ޑޮކްޓަރުން ބޭސްި ދީފައިވެ އެވެ. އަދި ސަލްމާގެ ފުރާނަ ސަލާމަތް ކުރަން ރަހިމު ނަގަންޖެހިދާނެކަން އާއިލާއަށް ވެސް ޑޮކްޓަރުން އެންގި އެވެ. ސަލްމާ ގަޔަށް ލޭ އަޅާފައި ވަނީ އޭގެ ވެސް އެއް ގަޑިއިރު ފަހުންނެވެ.
ސަލްމާ ގަޔަށް އެންމެ ފަހުން ލޭ އަޅާފައި ވަނީ އޮޕަރޭޝަން ތިއޭޓަރަށް ވެއްދުމަށްފަހު އެވެ. އެއިރު ސަލްމާ ބުނަމުންދިޔައީ އޭނާއަށް ނޭވާލާން އުނދަގޫވަމުންދާ ކަމަށެވެ. އެއިރު ސަލްމާގެ ލޭގެ ޕްރެޝަރެއް ނެތެވެ. އަދި ވިންދު ހުރީ ވަރަށް މަތިކޮށް މިނެޓަކު 190 ގަ އެވެ.
ހެލްތު މިނިސްޓްރީގެ ތަހުގީގުން އެނގިގެން ދިޔައީ ސަލްމާ ހަށިގަނޑުން ލޭ ބޭރުވެފައިވާ މިންވަރު އޭޑީކޭގެ ލިޔެކިޔެމުން ފެންނަން ނެތް ކަމަށެވެ.
"މި ކޭސްގައި ފާހަގަ ކުރެވުނީ ލޭ ދޭނެ ފަރާތެއް ހަމަޖައްސައިފައި ވީނަމަވެސް ބަލި މީހާއަށް ލޭ އެޅުމުގައި ލަސްވެފައިވާކަން،" މައްސަލަ ނިންމި ގޮތުގެ ރިޕޯޓުގައިވެ އެވެ.
ސަލްމާ ވިހެއި ކުއްޖާގެ ހާލު ރަނގަޅެވެ. ކުއްޖާ ބަލަމުންދަނީ އޭނާގެ ބައްޕަ އެވެ.
