"ދެން އެ ހިސާބުން ބޮޑީ ޑިސްޕޯސް ކޮށްލަން (ހަށިގަނޑު ނައްތާލަން) ވާހަކަ ދެއްކުނީ،"
އެއީ ގާނޫނީ ވަކީލު އަލްއުސްތާޒް އަހުމަދު ނަޖީބު (ކެރެޓް ނަޖީބު) މަރައިލި ގޮތާއި އޭނާގެ ހަށިގަނޑު ނައްތާލުމަށް ކުރި މަސައްކަތް ސުޕްރީމް ކޯޓުގައި، ވީޑިއޯ މެދުވެރިކޮށް މިއަދު ކިޔައިދެމުން، އޭނާގެ ގާތިލް ފާތިމަތު ހަނާ ދެއްކި ވާހަކައެކެވެ.
ވަކީލު ނަޖީބު މަރާލިތާ ނުވަ އަހަރު ވާން ކައިރިވެފައިވާއިރު އެ މައްސަލައިގައި މަރަން ހުކުމްކޮށްފައިވާ ށ. ގޮއިދުއަށް ނިސްބަތްވާ ހަނާ، އޭނާގެ ވާހަކަތައް މިއަދު ކިޔައިދިނީ އަލަށެވެ.
މިއަދުގެ އަޑުއެހުމުގައި ހަނާ ވަނީ ހަމަ އެ މައްސަލައިގައި މަރަން ހުކުމްކޮށްފައިވާ އޭނާގެ ލޯބިވެރިޔާ އަހުމަދު މުއްރަތުގެ ގެ ކަމަށްވާ މ. މަސްރޫރާ އަށް، ޖުލައި 1، 2012 ގައި ނަޖީބު ދާންޖެހުނު ގޮތާއި އެ ގޭ ތެރެއިން މައްސަލައެއް އުފެދުނު ގޮތާއި ނަޖީބުގެ ފަހު ވަގުތުކޮޅު ކޯޓަށް ކިޔައިދީފަ އެވެ.
"އަސްލު ވަރަށް އުނދަގޫވޭ އަޅުގަނޑަށް މި ވާހަކަތައް ކިޔައިދޭން. ފުރަތަމަ އެކަން ވެގެން ދިޔައިކީ... ފުރަތަމަ އަނެއް... ނަޖީބުއަށް ގުޅަނީކީއެއް... މުއްރަ ބުނެގެން ގުޅަނީ ނަޖީބުއަށް. މުއްރަގެ މަންމަގެ ގޭގެ މައްސަލައިގައި ގާނޫނީ އެހީތެރިކަން ހޯދުމަށް މުއްރަ ބުނީ ނަޖީބަށް ގުޅާށޯ. ދެން މުއްރަ ބުނީމަ އަޅުގަނޑު ނަޖީބަށް ގުޅީ،" ވާހަކަ ފަށަމުން ހަނާ ބުންޏެވެ.
މަސްރޫރާ ގެއަށް ނަޖީބު އައުމުން މުއްރަތާއި ހަނާ އާއި ނަޖީބު ވާހަކަ ދައްކަން ދިޔައީ މުއްރަތު ކޮޓަރިއަށް ކަމަށް ހަނާ ބުންޏެވެ. އެކަމަކު ގިނައިރުތަކެއްވީ އިރު ވެސް މުއްރަތު މަންމަ ގެއަށް ނައުމުން މުއްރަތު ދިޔައީ ތިރިއަށް ވާނުވާ ބަލަން ކަމަށް ހަނާ ބުންޏެވެ. މައްސަލަ ޖެހެން ފެށުނީ އެ ހިސާބުން ކަމަށް ހަނާ ބުންޏެވެ.
ނަޖީބުގެ މަރުގެ މައްސަލައިގައި ހަނާއާ އެކު ބައިވެރިވި މުއްރަތު
"އަސްލު ނަޖީބަށް ލަސްވާތީވެ މުއްރަތު ދިޔައީ މުއްރަތު މަންމަ ކޮބާތޯ ބަލާލަން ތިރިއަށް. އެވަގުތު ކޮޓަރި ތެރޭގައި ތިބީ އަޅުގަނޑާ ނަޖީބުއާ ދެ މީހުން. ދެން މުއްރަތު ދިޔުމުން އަޅުގަނޑަށް ނަޖީބުގެ ފަރާތުން ވަރަށް އުނދަގޫވާ ކަހަލަ ކަންތައްތަކެއް ދިމާވީ.... އެއީ... އަނެއް ... ފުރަތަމަ ނަޖީބުގެ ... އަނެއް ... ބެލުން ހުރި ގޮތް ވެސް އަޅުގަނޑަށް ކަމަކު ނުދިޔަ. އެއީ އަޅުގަނޑަށް ހަމަ ޔަގީން ކުރެވުނު ނަޖީބުގެ އިންޓެންޝަން ރަނގަޅެއް ނޫންކަން. ދެން އެކަމާ ހެދި އަޅުގަނޑު ހުރީ ވަރަށް ބޮޑަށް އަންއީޒީވެފަ (އުނދަގޫވެފަ)،" ހަނާ ކިޔައިދިނެވެ.
ނަޖީބު އުޅުނު ގޮތުގެ ވާހަކަ އޭނާ މުއްރަތު ކައިރި ބުނި ކަމަށް ހަނާ ކިޔައިދިނެވެ.
"ދެން އަޅުގަނޑު ތިރިއަށް މުއްރަތު ކޮބައިތޯ ބަލާލަން ދިޔައިރު މުއްރަތު ހުރީ ތިރީގައި ސިނގިރޭޓެއް ބޯންވެގެން. ދެން އަޅުގަނޑު މުއްރަތު ކައިރި ގޮސްފަ ބުނިން ނަޖީބު މިހެން މިހެން ކަންތައް ކޮށްފިޔޭ އަޅުގަނޑަށް ވަރަށް އުނދަގޫވެޔޭ. އޭނަ އަޅުގަނޑުގެ ގައިގަ އަތްލާ ހެދިއޭ. އޭނާ ބަލަނީކީ ވެސް ރަނގަޅަކަށް ނޫނޭ. އަޅުގަނޑަށް ވަރަށް އުނދަގޫވެޔޭ ދެން އޭނާ އަޅުގަނޑާ ވާހަކަ ދެއްކީ ވެސް ވަރަށް ފްލާޓީކޮށޭ. ބުނީމާ މުއްރަތު ބުނީ ދާށޯ މައްޗަށް އޭނާ މި އަންނަނީއޭ،" ކޯޓަށް ހަނާ ކިޔައިދެމުން ދިޔަ އެވެ.
އޭގެ ފަހުން ހަނާއަށް ވެސް ލިބުނީ ސިހުމެއް ކަމަށް އޭނާ ބުންޏެވެ.
"އަޅުގަނޑު ގޮސްފަ މައްޗަށް އަރާފަ މަޑުކޮށްލިތަނާ އިރުކޮޅަކުން މުއްރަތު އަންނަނީ އަނެއް ... ވަޅިއެއް ހިފައިގެން އައި ގޮތަށް އައިސް ނަޖީބު ކަރުގައި ޖައްސަނީ. ޖައްސާފަ ބުނަނީ ކަލެއަށް އިނގޭހޯ ކީއްކަން ތި ކުރެވުނީ. ކީއްކުރަންހޯ އޭނައާ ދޭތެރޭ ތިހެން ކަންތައް ކުރީ. ހަމަ ކޮންމެ އަންހެނެއް ފެނުނަސް އެހެނޯ ކަންތައް ކުރާނީ ކިޔާފަ ވަރަށް ހަޑިކޮށް ވާހަކަ ދެއްކީ،" އެ ބިރުވެރި ވަގުތުކޮޅު ހަނާ ސިފަކޮށްދިނެވެ.
ނަޖީބުގެ އަނގަ މަތީ ޓޭޕު އެޅީ ހަނާކަން އޭނާ އެއްބަސްވެ އެވެ. އެކަމަކު ހަނާ ބުނީ ޓޭޕު އެޅީ ނަޖީބަށް ނޭވާލެވޭނެ ވަރަށް ކަމަށެވެ.
"ދެން އެވަގުތު ވެސް މުއްރަ ހުރީ ނަޖީބު ކަރުގަ ވަޅި ޖައްސާފަ. އަޅުގަނޑު ކައިރި ބުނީ އޮންނާނެއޯ ޓޭޕްރޯލެއް އޭގެން އޭނާގެ އަނގަމަތީގަ އަޅާށޯ ބުނީ. ދެން އަސްލު އެ ވަގުތު އަޅުގަނޑު ވެސް ބިރުގަނެފައި ހުރިވަރުން އަޅުގަނޑު ވެސް އެގޮތަށް ކަންތައް ކުރީ. ދެން އަޅުގަނޑު ޓޭޕް އެޅީ ނަޖީބުގެ މޫނުގައާ އަނގަމަތީގައާ ލޯމަތީގައާ. އެކަމަކު އަޅުގަނޑު ވަރަށް ރަނގަޅަށް ހަނދާން އެބަހުރި އަޅުގަނޑު އޭނާގެ ނޭފަތަކު ޓޭޕެއް ނާޅަން. އޭނަ ހުންނާނީ ހަމަ ނޭވާލެވޭ ގޮތަށް،" ހަނާ ބުންޏެވެ.
އެއަށް ފަހު ނަޖީބުގެ ވޮލެޓު ނެގުމަށް ފަހު މުއްރަތާއި ހަނާ ދިޔައީ ކާއެއްޗެއްސާއި ބަނގުރާ ގަތުމަށް ކަމަށް ހަނާ ބުންޏެވެ.
"ދެން ޓޭޕު އެޅުމަށްފަހު މުއްރަތު ބުނީ ވޮލެޓު ކޮބާހެއްޔޯ ވޮލެޓު ދޭށޯ. ބުނީމަ މުއްރަތު ވޮލެޓު ނަގަނީ. ދެން ބުނީ ޕިން ނަންބަރު ކިޔައިދޭށޭ. ބުނީމަ އަޅުގަނޑާ މުއްރަތާ ދެމީހުން ދަނީ އައިޖީއެމްއެޗު ކައިރީ ހުރީ އޭޓީއެމްއަކަށް. ގޮސްފަ އެތަނުން ލާރި ނެގުމަށްފަހު ކާއެއްޗެއްސާއި ރަލާ ގަނެގެން ދިޔައީ އެ ގެއަށް،" ކަންތައްވީ ގޮތް އޭނާ ކިޔައިދެމުން ދިޔަ އެވެ.
ހަނާގެ ބަހުން ނަމަ ނަޖީބު މަރުވީ ރާބޮއެގެން އޭނާ ނިދާފަ އޮއްވަ އެވެ. ނަޖީބުގެ މަރުގައި އޭނާގެ އެއްވެސް އަތެއް ނެތް ކަމަށް ހަނާ ހުވާ ކުރި އެވެ.
"ގެއަށް ދިއުމަށްފަހު އަޅުގަނޑާ މުއްރައާ އަނެއް.. ރާ ބޮއެގެން އަސްލު އަޅުގަނޑަށް ނިދުނީ. ނިދިފަ ދެން އަޅުގަނޑަށް ހޭލެވުނީ ހެނދުނު. އަޅުގަނޑަށް ހަނދާންވަނީ ހައެއް ނޫނީ ހަތެއް ޖަހާކަންހާއިރު ހޭލެވެނީ. މުއްރަ ވަރަށް ހާސްވެގެން އަޅުގަނޑަށް ގޮވަނީ. ގޮވާފަ ބުނަނީ މުއްރަ އަތުން ނަޖީބު މަރުވެއްޖެއޯ. ބުނީމަ އަޅުގަނޑު ބުނީ ކީއްހޭ ތި ކުރީކީ. އެ ވަގުތު އަޅުގަނޑު ވެސް ވަރަށް ހާސްވި. އެއީ އެއްވެސް އިރެއްގަ އަޅުގަނޑުގެ އިންޓެންޝަނެއް ނޫން އެހެން ހެދުމަކީ،" އޭނާގެ ނިޔަތް ހަނާ ކިޔައިދިނެވެ.
ހަށިގަނޑު ނައްތާލުމުގެ ވާހަކަތައް ދެކެވުނީ އެހާ ހިސާބުން ކަމަށް ހަނާ ބުންޏެވެ.
"ދެން މުއްރަ ބުނީ އޭނަ ހަޅޭއްލަވާ އަޑުގަދަކުރަން ފެށުމުންނޯ އެހެން ކަންތައްވީ. ދެން އަޅުގަނޑު ބުނީ ކިހިނެއްހޭ ހަދާނީ. އެވަގުތު އަޅުގަނޑު ވެސް ވަރަށް ހާސްވި. އެއީ މުއްރަތަކީ އަޅުގަނޑު ވަރަށް... އެއިރު ވަރަށް ދުވަސްވަންދެން އުޅުނު މީހެއް ކަމާ އެކު އޭނަ އެގޮތަށް ހާސްވެގެން ރޯން ފެށީމަ... އަސްލު އެހެންވެ އަޅުގަނޑަށް ބޮޑަށް އިފެކްޓް ކުރީ. ދެން އެ ހިސާބުން ބޮޑީ ޑިސްޕޯސް ކޮށްލަން ވާހަކަ ދެއްކުނީ،" ހަނާ ބުންޏެވެ.
ގާނޫނީ ވަކީލް ނަޖީބް.
ހަނާ ބުނި ގޮތުގައި އޭނާ އިއުތިރާފްވީ އެކަމުގައި އޭނާގެ ބައިވެރިވުމެއް ވާކަން ހަމަ ހަގީގަތުގައި ވެސް ކުރިން އަމިއްލައަށް ގަބޫލު ކުރެވިގެން ކަމަށެވެ. އެކަމަކު ނަޖީބުގެ މަރުގައި އޭނާގެ އެއްވެސް ބައިވެރިވުމެއް ނޯންނާނެ ކަމަށް ހަނާ ބުންޏެވެ. ނަމަވެސް ނަޖީބުގެ ހަށިގަނޑު ފޮރުވައި، ނައްތާލަން މަސައްކަތް ކުރި ކަމަށް ހަނާ ވަނީ ކޯޓުގައި އެއްބަސްވެފަ އެވެ.
"ދެން އަސްލު އިއްޒަތްތެރި އުއްތަމަ ފަނޑިޔާރު ވެސް ހިތައް އަރާފާނެ ކީއްވެގެންހެއްޔޭ އަޅުގަނޑު ކުރިން އިނީ އިއުތިރާފްވެފަ. އަސްލު ވަރަށް ގިނަ މީހުން އަޅުގަނޑާ ކުރާ ސުވާލެއް އެއީ ކީއްވެގެންތޯ އިއުތިރާފްވެފަ އިނީ. އަސްލު އެކަންތައްވީ ގޮތަކީ އެއިރު ކަންތައް ދިމާވި ގޮތުން އަޅުގަނޑަށް ބިލީވް ކުރެވިފަ އިނީ އަޅުގަނޑަށް ކުރެވުނު ކަންތައްތަކަކުން... އެހެން ކަންތައް ދިމާވީ އަޅުގަނޑާ ހެދިއޭ،" ހަނާ އަސަރާއެކު ކިޔައިދިނެވެ. "ބޮޑީ ޑިސްޕޯސްކޮށްލަން ވެސް... އެ ހުރިހާ ކަންތައްތަކެއްގަ ބައިވެރިވެވުނީމަ."
އެ މައްސަލައިގައި ދެން އޮންނާނީ ހުކުމް ކުރުމެވެ. މައްސަލަ ބައްލަވަނީ އުއްތަމަ ފަނޑިޔާރު އަހުމަދު މުއުތަސިމް އަދުނާނު ހިމެނިވަޑައިގަންނަވާ ގޮތަށް އެ ކޯޓުގެ ފަސް ފަނޑިޔާރުންގެ ބެންޗަކުންނެވެ.
ކެރެޓް ނަޖީބުގެ ނަމުން މަޝްހޫރު ނަޖީބަކީ އޭރު ރާއްޖޭގައި މަޝްހޫރު ގާނޫނީ ވަކީލެކެވެ. އޭނާ ވަނީ ދިވެހި ތާރީހުގައި ފާހަގަކޮށްލެވޭ ޝަހުސިއްޔަތުންނާ ބެހޭ ފޮތެއް ވެސް ލިޔުއްވައިފަ އެވެ. ނަޖީބު މަރާލިއިރު އޭނާގެ 13 ކުދިން ދުނިޔޭގައި ތިއްބެވެ.
