ކޮވިޑާ ދެކޮޅަށް އާބާދީގެ ބޮޑު ބަޔެއް ވެކްސިން ފުރިހަމަކޮށްފައިވާ އިޒްރޭލުގައި ބޭރަށް ނިކުމެ އުޅޭ އިރު މާސްކު އެޅުން މަޖުބޫރުކޮށްފައި އޮތް އޮތުން މިއަދު އުވާލައިފި އެވެ.
އެއާއެކު އެއް އަހަރަށް ވުރެ ދިގު މުއްދަތަކަށް ފަހު ފުރަތަމަ ފަހަރަށް ސްކޫލުތައް ވެސް ވަނީ އެއްކޮށް ހުޅުވާފަ އެވެ.
ޓައިމްސް އޮފް އިޒްރޭލު ނޫހުގައިވާ ގޮތުން ބޭރުގައި އުޅޭ އިރު މާސްކު އެޅުން ދެން މަޖުބޫރު ނުވި ނަމަވެސް، އާއްމު ތަންތަނުގައި މާސްކު އަޅަން ޖެހޭނެ އެވެ.
އެ ގައުމުގެ ހެލްތު މިނިސްޓްރީން ވެސް ލަފާ ދެނީ ބޭރަށް ނުކުންނަ އިރު އަދި ގިނަ މީހުން އުޅޭ ތަންތަނަށް ދާއިރު މާސްކު އެޅުމަށެވެ.
މީގެ އިތުރުން މިއަދު ވަނީ އެންމެ ތުއްތު ކުދިންގެ ޑޭކެއާއިން ފެށިގެން ގްރޭޑް 12 އާ ހަމައަށް ސްކޫލުތައް ހުޅުވާ، ދަރިވަރުން ސްކޫލަށް ހާޒިރުވެގެން ކިޔަވައިދޭ ގޮތަށް ހަމަޖައްސާފަ އެވެ.
ކްލާސްތަކުތަކުގައި ތިބޭ އިރު ކުދިންނަށް މާސްކު އެޅުން މަޖުބޫރު ވާނެ އެވެ. ނަމަވެސް ޖިމް ގަޑި އާއި އިންޓަވަލް ގަޑި އައި ދެ ކްލާސް ދެމެދުގައި ހޭދަވާ ހުސް ވަގުތުކޮޅުގައި މާސްކު އަޅާކަށް ނުޖެހެ އެވެ.
ކޮވިޑުގެ ތިން ވަނަ ރާޅެއްގައި އިޒްރޭލުގެ ހާލަތު ވަރަށް ގޯސްވި އެވެ. ނަމަވެސް އެންމެ ކާމިޔާބުކަމާ އެކު ގައުމަކުން ހިންގި ވެކްސިން ޕްރޮގްރާމަށް ފަހު ހާލަތު ވަރަށް ބޮޑަށް ރަނގަޅުވެއްޖެ އެވެ.
އާބާދީގެ ދެބައިކުޅަ އެއްބަޔަށް ވުރެ ގިނަ އަދަދެއްގެ މީހުން ވެކްސިންގެ ދެ ޑޯޒް ފުރިހަމަކޮށްފައި ވާއިރު، އަދަދުތައް ވަނީ ފާހަގަކުރެވޭ މިންވަރަށް ދަށަށް ގޮސްފަ އެވެ.
