ހދ. ކުޅުދުއްފުށީ ރީޖަނަލް ހޮސްޕިޓަލްގައި ވިހެއި ކުއްޖަކު، ނަރުހުންގެ އިހުމާލުން ވެއްޓުނު މައްސަލައެއްގައި އާއިލާއިން ކަންބޮޑުވުންފާޅުކޮށްފި އެވެ.
އުތުރުގެ މައި ހޮސްޕިޓަލްގައި މީގެ ހަ ދުވަސް ކުރިން ވިހެއި އެ ކުއްޖާ އޮތީ ރީނދޫވެގެން މަންމައާ ވަކިކޮށް ފަރުވާދިނުމަށް ނާސަރީގައި އެވެ. ކުއްޖާގެ ހުރިހާ ކަމެއް ބަލަހައްޓަމުން ގެންދިޔައީ ނަރުހުންނެވެ.
"ކުއްޖާއަށް ގާތުންދިނުމަށް މަންމަ މިއަދު ނަރުހުންނަށް ގުޅީމަ ބުނީ ގާތުންދީފައޭ އޮތީ، ދެން ކުއްޖާގެ މަންމަ ފަހުން ދިޔައިރު އެ ކުއްޖާ ހަރަކާތެއް ނުކުރޭ، އޭރު ވެސް ނަރުހުން ނުބުނޭ ކަމެއްވެފައިވާ ކަމެއް، ބުނީ ހަމައެކަނި ގާތުންދީފައި އޮތް ކަމަށް،" މިއަދު މެންދުރުފަހު އެ ހޮސްޕިޓަލްގައި ހިނގާ ދިޔަ މި ހާދިސާއާ ގުޅޭ ގޮތުން އާއިލާ މެންބަރަކު "އަދަދު"އަށް ކިޔައިދިނެވެ.
"އޭގެ އިރުކޮޅެއް ފަހުން ޑޮކްޓަރު ގުޅާފައި ކުއްޖާ މަންމަ ގާތު ބުނީ އައިސްދިނުމަށް، ދެން ޑޮކްޓަރު ބުނީ ވަރަށް ބޮޑު ކަމެއް އިހުމާލަކުން ވެއްޖެ ކަމަށް، ޑޮކްޓަރުން ބުނީ ކުއްޖާ އެނދުން ވެއްޓުނީ ކަމަށް،"
އޭނާ ބުނި ގޮތުގައި ކުއްޖާ ބާއްވާފައި އޮތް އެނދަކީ ވެއްޓޭ ގޮތަށް ހުންނަ އެނދެއް ނޫންކަމުން އެކަން ގަބޫލު ނުކުރެވޭ ކަމަށާއި އެހެންވެ، އަސްލުވީ ގޮތް ސާފުކުރުމަށް އާއިލާއިން ބޭނުންވި ކަމަށެވެ.
"އަޅުގަނޑުމެން އެދުނިން ނަރުހެއްގެ އަތުން ވެއްޓުނުނަމަ، އެ މީހެއް ބުނެދިނުމަށް، ޑޮކްޓަރު ބުނީ ވެއްޓުނީ ކާކުގެ އަތުން ކަމެއް ނުބުނެވޭނެ ކަމާއި ވަރަށް ބޮޑަށް އެކަމަށް މާފަށް އެދޭ ކަމަށް،" އާއިލާ މީހާ ބުންޏެވެ.
ވެއްޓުމުގެ ސަބަބުން ކުއްޖާއަށް އަނިޔާއެއްވި ކަމެއް އަދި ސާފު ނުވާއިރު ބައެއް ޓެސްޓްތައް ވަނީ ހަދާފަ އެވެ.
ހަ ދުވަހުގެ ކުއްޖާ ވެއްޓިފައިވަނީ ހޮސްޕިޓަލުގެ އިހުމާލުން ކަމަށް ޑޮކްޓަރު އާއިލާ ގާތުގައި ބުނެފައިވާއިރު އާއިލާގެ އެދުމުގެ މަތިން ކުއްޖާ މިހާރު ވަނީ އޭނާގެ މަންމަ ގާތަށް ގެނެސްފަ އެވެ.
ހޮސްޕިޓަލްގެ މެނޭޖަރު އަހުމަދު ދާއޫދު "އަދަދު"އަށް އެކަމާ ގުޅޭ ގޮތުން ވިދާޅުވީ މިއަދު ހޮސްޕިޓަލުގައި އެފަދަ ކަމެއް ހިނގާފައިވާ ކަމާއި އެކަން ހިނގާދިޔަ ގޮތް ބަލަމުން ގެންދާ ކަމަށެވެ.
"އިތުރު މައުލޫމާތެއް މިވަގުތަށް ދެވެން ނެތް،" ފޯނުން ޖަވާބު ދެއްވަމުން ދާއޫދު ވިދާޅުވި އެވެ.
ކުޅުދުއްފުށީ ހޮސްޕިޓަލަކީ އުތުރު ތިން އަތޮޅުން ވެސް ގިނަ އަދަދެއްގެ މީހުން ހިދުމަތް ހޯދާ ހޮސްޕިޓަލެކެވެ. ގިނަ ބަޔަކު ވިހެއުމަށް ވެސް އެ ހޮސްޕިޓަލް އިހުތިޔާރު ކުރާއިރު، ކޮވިޑްގެ ތެރޭގައި މާލެ އަތޮޅުން ވެސް މީހުން ވިހެއުމަށް އެ ހޮސްޕިޓަލަށް ގޮސްފައިވެ އެވެ.
