ސިކުނޑީގެ އެކިއެކި ބަލިތައް ހުންނަ މީހުންނާއި އުމުރުން ދުވަސްވީ މީހުން ބަލަހައްޓަމުން އަންނަ ކ. ގުރައިދޫ މަރުކަޒުގައި ސިއްހީ ހިދުމަތްތެރިއަކު ނެތްތާ ތިން މަސް ފަހުން، އެތަނަށް ދެ ނަރުހުން ހަމަޖައްސައިފި އެވެ.
ޖެންޑާ މިނިސްޓްރީން ބަލަހައްޓާ އެ މަރުކަޒަށް މިދިޔަ ބުދަ ދުވަހު އިންޑިއާގެ ދެ ނަރުހުން ހަމަޖައްސައި ދިނީ ހެލްތު މިނިސްޓްރީންނެވެ. ރާއްޖެއަށް މުޅިން އަލަށް ގެނައި އެ ދެ ނަރުހުން މިހާރު ތިބީ ގުރައިދޫގައި ކަރަންޓީނުގަ އެވެ.
ގުރައިދޫ މަރުކަޒުގައި މިދިޔަ ޑިސެމްބަރު މަހުން ފެށިގެން ޑޮކްޓަރަކު ނެތެވެ. އަދި ޖެނުއަރީ 18 ވަނަ ދުވަހުން ފެށިގެން ނަރުހަކު ނެތެވެ. އެ މަރުކަޒުގައި ނަފްސާނީ ބަލިތަކަށް ފަރުވާދޭނެ ޑޮކްޓަރަކު ނެތި ވެސް އަހަރަކަށް ވުރެން ގިނަ ދުވަސް ވެއްޖެ އެވެ. މިހާ ދުވަހު އެ މަރުކަޒުގެ މީހުން ޑޮކްޓަރަށް ދައްކަމުން އައީ ގުރައިދޫގައި ހުންނަ ސިއްހީ މަރުކަޒަށެވެ.
ގުރައިދޫ މަރުކަޒުގެ ސީއީއޯ ޔޫޝައު ޝިހާން، "އަދަދު" އަށް މިއަދު ވިދާޅުވީ ދެ ނަރުހުން ހަމަޖެހުނީ ނައިބު ރައީސް ފައިސަލް ނަސީމާއެކު ބޭއްވި ތިން ބައްދަލުވުމަށް ފަހު ނަރުހުންނާއި ޑޮކްޓަރެއް އެ މަރުކަޒަށް ހަމަޖައްސައި ދިނުމަށް ނައިބު ރައީސް ހެލްތު މިނިސްޓްރީއަށް އެންގެވުމުން ކަމަށެވެ.
އަންނަ ހަފުތާގެ ތެރޭގައި އާއްމު ބަލިތަކުގެ ޑޮކްޓަރަކު ވެސް ހަމަޖެހޭނެ ކަމަށް ޝިހާން ވިދާޅުވި އެވެ.
ޝިހާން ވިދާޅުވީ އެ މަރުކަޒުގައި އެންމެ ގިނައީ ނަފްސާނީ ބަލީގެ ފަރުވާ ބޭނުންވާ މީހުންނަށްވާއިރު ސައިކޭޓްރިސްޓެއް ނެތުމުން ގިނަ ދަތިތަކަކާ ކުރިމަތިވާ ކަމަށެވެ. ސައިކޭޓްރިސްޓެއް ހަމަޖެހޭނެ ދުވަހެއް އަދި ނޭނގޭ ކަމަށް ވެސް އޭނާ ވިދާޅުވި އެވެ.
ގުރައިދޫ މަރުކަޒުގައި މިހާރު މީހުން ތިބި އަދަދަށް ބަލާއިރު އެތަނުގައި ހަ ނަރުހުން ތިބެން ޖެހެ އެވެ. ނަމަވެސް މީން ދުވަހަކުވެސް އެއް ފަހަރާ އެ އަދަދަށް އެމަރުކަޒުގައި ނަރުހުން ނުތިބެ އެވެ.
ސިކުނޑީގެ ނުކުޅެދުންތެރިކަން ހުންނަ މީހުންގެ އިތުރުން އުމުރުން ދުވަސްވީ, އަޅާލާނެ މީހަކު ނެތް 197 މީހުން ގުރައިދޫ މަރުކަޒުގައި މިހާރު ވެސް އެބަތިއްބެވެ. އޭގެ ތެރޭގައި ނަފްސާނީ މައްސަލަތައް ހުރި 158 މީހުންނާއި އުމުރުން ދުވަސްވީ 39 މީހުން ހިމެނެ އެވެ.
ޝިހާން ވިދާޅުވީ ބޭނުންވާ އަދަދަށް ނަރުހުން ނެތް ނަމަވެސް އެ މަރުކަޒުގައި މަސައްކަތް ކުރާ ތަޖުރިބާކާރު އެޓެންޑެންޓުންގެ އެހީތެރިކަމާއެކު ބަލި މީހުންގެ ކަންކަން ބަލަހައްޓަމުން އަންނަ ކަމަށެވެ.
"މި އަންނަ ނަރުހުންނަށް ވުރެވެސް އެ އެޓެންޑެންޓުން އެހީ ބޮޑު. އެއީ މިތާ މަސައްކަތް ކުރާތާ ވަރަށް ގިނަ ދުވަސް ވެފައިވާ ބައެއް،" ޝިހާން ވިދާޅުވި އެވެ.
ގުރައިދޫ މަރުކަޒުގައި ސިއްހީ ހިދުމަތްތެރިއެއް ނެތި ގިނަ ދުވަސްތަކެއް ވުމުން އެކަން މަޖިލީހުން ވެސް ވަނީ ބަލައިފަ އެވެ. މަޖިލީހުގައި ޖެންޑާއިން ބުނީ ސިއްހީ ހިދުމަތްތެރިން ހޯދަން ދަތީ ކަމަށެވެ. ސިއްހީ އެހީތެރިއެއް ނެތި ލަސްވި މައްސަލައިގެ ޒިންމާ ނަގާ ކަމަށް ވެސް ބުންޏެވެ.
