ރަޝިއާއިން ދޭ ސައިބާ ހަމަލާތަކާ ދެކޮޅަށް ކަމަށް ބުނެ އެމެރިކާއިން އެ ގައުމާ ދެކޮޅަށް ދަތި ކުރުމުގެ ފިޔަވަޅު އަޅައިފި އެވެ.
ވައިޓް ހައުސްއިން ބުނީ ފިޔަވަޅުތަކުގެ ބޭނުމަކީ ރަޝިއާއިން ހިންގާ ނުރައްކާތެރި ހާރިޖީ ހަރަކާތްތައް ހުއްޓުވުން ކަމަށެވެ.
ވައިޓް ހައުސްގެ ބަޔާނުގައި ބުނީ މިދިޔަ އަހަރު ސައިބާ ހަމަލާއެއް ދިނުމުގެ ފަހަތުގައި އޮތީ ރަޝިއާގެ ޖާސޫސީ އިދާރާ ކަމަށާއި 2020 ވަނަ އަހަރު ރިޔާސީ އިންތިހާބަށް ވެސް ނުފޫޒު ފޯރުވި ކަމަށެވެ.
ރަޝިއާއިން އެ ތުހުމަތުތައް ދޮގު ކުރުމަށް ފަހު ބުނީ އެމެރިކާއާ ދެކޮޅަށް ވެސް ދަތި ކުރުމުގެ ފިޔަވަޅު އަޅާނެ ކަމަށެވެ.
މިއަދު އިއުލާނު ކުރި ދަތި ކުރުމުގެ ފިޔަވަޅުތަކަށް ހުއްދަ ދެއްވީ ރައީސް ޖޯ ބައިޑެން އެވެ. އެ ނިންމުން އައިސްފައި މި ވަނީ ދެ ގައުމުގެ ގުޅުން އަލުން ހީނަރުވެފައި ވަނިކޮށެވެ.
މިދިޔަ މަހު ވެސް އެމެރިކާއިން ވަނީ ރަޝިއާ ސަރުކާރުގެ ހަތް އޮފިޝަލަކާއި ގިނަ އަދަދެއްގެ ސަރުކާރު އިދާރާތަކާ ދެކޮޅަށް ފިޔަވަޅު އަޅާފަ އެވެ.
އެ ފަހަރު ފިޔަވަޅު އެޅީ ރަޝިއާގެ އިދިކޮޅު ލީޑަރު އެލެކްސީ ނަވަލްނީއަށް ޒަހަރު ދިނުމުގެ ތުހުމަތު ރަޝިއާ ސަރުކާރަށް ކުރުމަށް ފަހު އެވެ. އެކަމަކު ރަޝިއާއިން އެ ތުހުމަތު ދޮގުކުރެ އެވެ.
