އދ. ގެ 76 ވަނަ އާންމު މަޖިލީހުގެ ރައީސް ހޮވުމަށް ބާއްވާ އިންތިހާބަށް ތައްޔާރުވަމުންދާ ދަނޑިވަޅެއްގައި ފޮރިން މިނިސްޓަރު އަބްދުﷲ ޝާހިދު ގިނަ ގައުމުތަކެއްގެ މަންދޫބުންނާ ނިއުދިއްލީގައި މިއަދު ބައްދަލު ކުރައްވައިފި އެވެ.
އަންނަ ޖޫން މަހު، އާންމު މަޖިލީހުގެ ރައީސް ހޮވުމަށް ބާއްވާ އިންތިހާބުގައި ވާދަ ކުރައްވަނީ އަބްދުﷲ ޝާހިދާއި އަފްގާނިސްތާނުގެ ކުރީގެ ފޮރިން މިނިސްޓަރު ޑރ. ޒަލްމާއި ރަސޫލެވެ.
އިންތިހާބު އިއުލާންކޮށްފައިވަނިކޮށް މިނިސްޓަރު ޝާހިދު ވަނީ އިންޑިއާއަށް ރަސްމީ ދަތުރުފުޅެއް ފައްޓަވާފަ އެވެ. މި ދަތުރުފުޅުގެ މައިގަނޑު މަގުސަދު ފޮރިން މިނިސްޓްރީން ހާމަކޮށްފައިނުވީ ނަމަވެސް ދަތުރުފުޅުގައި އިންޑިއާގެ އިސް ބޭފުޅުންނާ ބައްދަލު ކުރައްވާނެ ކަމަށް ވަނީ ފޮރިން މިނިސްޓްރީން ވަނީ ބުނެފަ އެވެ.
އެގޮތުން އެއް ދުވަހުގެ ދަތުރުފުޅުގެ އަޕްޑޭޓް ދެއްވަމުން ޝާހިދު ކުރެއްވި ޓްވީޓެއްގައި ވިދާޅުވި ގޮތުގައި އޭނާ މިއަދު ވަނީ އިންޑިއާގައި ތިއްބެވި 16 ގައުމެއްގެ މަންދޫބުންނާއި ހަތް ގައުމެއްގެ އެމްބެސެޑަރުންނާ ބައްދަލު ކުރައްވާފަ އެވެ.
ޝާހިދު ބައްދަލު ކުރައްވާފައިވަނީ ޗެކްރިޕަބްލިކް، ސްލޮވަކް ރިޕަބްލިކް، ޖޯޖިއާ، ޔޫކްރެއިން، ރޮމޭނިއާ، ސީބިއާ އަދި ހަންގޭރީގެ އެމްބެސެޑަރުންނާ އެވެ. ޝާހިދު ވިދާޅުވި ގޮތުގައި، ގައުމުތަކާއި ރާއްޖެއާ ދެމެދު އޮތް ގުޅުން ބަދަހިކުރުމަކީ އެންމެ އިސްކަންދޭ ކަމެވެ.
އެފެރިކާ އާއި ރާއްޖެއާ ދެމެދު އޮތް ގުޅުމުގެ މުހިންމުކަން ވެސް ފާހަގަ ޝާހިދުގެ ޓުވީޓްގައި ފާހަގަ ކުރެއްވި އެވެ. އޭނާގެ ޓުވީޓްގައިވާ ގޮތުން، އެކިއެކި ދާއިރާތަކާ ގުޅޭ ގޮތުން މިއަދު މަޝްވަރާ ކުރެއްވީ، އެފެރިކާގެ ނުވަ ގައުމު ކަމަށްވާ އަލްޖީރިއާ، މޮރޮކޯ، ސެނެގަލް، ޓިއުނީޝިއާ، ޔުގެންޑާ، ޒެމްބިއާ، ރުވަންޑާ، ގިނީ އަދި ނަމީބިއާގެ މަންދޫބުންނާ އެވެ.
އޭގެއިތުރުން ދެން ބައްދަލު ކުރެއްވީ، ޔޫރަޕްގެ ހަތް ގައުމު ކަމަށްވާ އޮސްޓްރިއާ، ބެލްޖިއަމް، ސައިޕްރަސް، އަޔަލެންޑް، މާލްޓާ، ސްވެޑެން، ޑެންމާކް، އައިސްލޭންޑް އަދި ޕޯޖުގަލްގެ މަންދޫބުންނާ އެވެ. ޝާހިދު ވިދާޅުވި ގޮތުގައި އެ ބޭފުޅުންނާއެކު މަޝްވަރާ ކުރެއްވީ އެކިއެކި ދާއިރާތަކާއި ކޮވިޑުން އަރައިގަތުމާ ގުޅޭ ގޮތުންނެވެ.
އިންޑިއާގައި ހުންނަވައި، ސްރީލަންކާގެ ފޮރިން މިނިސްޓަރު ދިނޭޝްއާ ފޯނުން ގުޅުއްވައި ވެސް ވަނީ މަޝްވަރާތަކެއް ޝާހިދު މިއަދު ކުރައްވާފަ އެވެ. އެކަން ހާމަ ކުރައްވަމުން ޝާހިދު ކުރެއްވި ޓުވީޓްގައި ލަންކާ އާއި ރާއްޖޭގެ ގުޅުމުގެ މުހިންމުކަން ފާހަގަ ކުރައްވައި، އެ ގައުމަށް ތައުރީފު ކުރައްވާފައިވެ އެވެ.
މި ދަތުރުފުޅުގައި ޝާހިދު، އިންޑިއާގެ ފޮރިން މިނިސްޓަރު ޖައިޝަންކަރުއާ ބައްދަލު ކުރައްވާނެ ކަމަށް ފޮރިން މިނިސްޓްރީން ބުނެފައިވާއިރު އަދި އެ ބައްދަލުވުން ބާއްވާފައެއް ނުވެ އެވެ.
ޝާހިދު، އިންޑިއާގައި ގިނަ ގައުމުތަކެއްގެ މަންދޫބުންނާ ބައްދަލު ކުރައްވާފައިވާއިރު، އާންމު މަޖިލީހުގެ ރައީސް ހޮވުމުގެ އިންތިހާބުގައި އިންޑިއާގެ ތާއިދު ޝާހިދުއާ ލިބޭނެ ކަމުގެ ޔަގީންކަން އަރުވާފައިވާ ކަމަށް މައުލޫމާތު ލިބެ އެވެ.
އދ. އާންމު މަޖިލީހުގެ ރައީސުން އިންތިހާބު ކުރަނީ ރޮޓޭޝަނުގެ އުސޫލުންނެވެ. މިގޮތުން، އިންތިހާބުކުރަނީ ކޮންމެ އަހަރަކުވެސް އެފްރިކާ، އޭޝިއާ ޕެސިފިކް، އިރުމަތީ ޔޫރަޕު، ލެޓިން އެމެރިކާ، ކެރީބިއަންގެ އިތުރުން ހުޅަނގު ޔޫރަޕުގެ ގައުމުތަކުގެ ބޭފުޅެކެވެ. މިފަހަރު ފުރުސަތު ލިބުނީ އޭޝިއާ ޕެސިފިކް ގައުމުތަކަށެވެ.
މި ސަރަހައްދަށް ބަލާއިރު، މީގެ ކުރިން އިންޑިއާ، ސްރީލަންކާ، ބަންގްލަދޭޝްގެ އިތުރުން އަފްޣާނިސްތާނުން ވަނީ އދ.ގެ އާއްމު މަޖިލީހުގެ ރައީސްކަން ކޮށްފައި އެވެ.
މި މަގާމަށް ރާއްޖޭން ޝާހިދު ގެނައުމަށްޓަކައި ކެމްޕެއިން ކުރުމަށް މި އަހަރުގެ ބަޖެޓްގައި ވެސް ފައިސާ ވަނީ ހިމަނާފަ އެވެ.
އދ. އާންމު މަޖިލީހުގައި މެންބަރު ހުރިހާ 193 ގައުމު ބައިވެރިވެ އެވެ. މި މަޖިލީހަކީ އދ. ސިޔާސަތުތައް މައިގަނޑު ގޮތެއްގައި ކަނޑައަޅާ ފަރާތެވެ. އަދި މި މަޖިލީހުގައި މެންބަރު ހުރިހާ ގައުމެއްގެ މަސްލަހަތު ހިމާޔަތް ކުރުމަށް ވެސް މަސައްކަތް ކުރާނެ އެވެ.
